Mbi yeke zo ti kodro ti Tonga, mbeni kodro so azoa 170 la ayeke yâ ni, so ayeke na sud-ouest ti Pacifique. Gigi ti e na Tonga ayeke simple: wâ ti courant ayeke dä ape, oto kue ayeke dä ape. Me na yanga-da ti e, e yeke na ngu ti tuyau nga na akondo. Tongana ekole akanga, mbi na aita ti mbi ti koli use, e yeke aidé babâ ti e na kua ti yaka. E fâ yaka ti bule, guî, langa nga na ti gozo. Ti bâ lege ti sewa ti e, babâ ti e ayeke kä akobe ti yaka ni nga lo yeke sara ambeni kete kete kua na terê ni. Sewa ti e abâ Bible na nene ni mingi tongana ti gbâ ti azo na yâ ti azoa ti Pacifique, nga e yeke manqué ti gue na eglize ape. Me lakue e yeke pensé lani so ti tene gigi ti e aga nzoni, e doit ti quitté e gue na mbeni kodro so mosoro ayeke dä mingi.

 Na temps so mbi yeke ngu 16, ngambe ti mama ti mbi ti koli aleke ti tene sewa ti e ague na Californie, na États-Unis. So kota changement si e doit ti sara lani! Atâa so dutingo ti e aga nzoni kete, e vivre lani na yâ ti mbeni quartier so ayeke pauvre, so tënë ti sarango ngangu na zo nga nyongo mbangi ahon ndö ni dä. Lakue na abï, e yeke mä ka go ti ngombe, na mingi ti avoizin ti e asara mbeto ti abandit. Gbâ ti azo ayeke na ngombe na terê ti ala tongaso si ala bata na terê ti ala wala ala leke na atënë so ala wara na amba ti ala. Gï ndali ti mara ti aye ni so la juska laso mbeni lê ti balle angbâ na yâ ti kate ti mbi so.

 Na temps so mbi si na lycée, mbi ye ti sara ye tongana tanga ti amaseka ti yâ ti lycée ni. Yeke yeke, mbi komanse ti bi terê ti mbi na yâ ti apumba ti kirikiri, ti nyon sämba ahon ndö ni, ti sara ye ti ngangu na azo, nga ti nyon mbangi. A gue ngbii mbi ga mbeni zo ti nyongo mbangi. Mbi komanse ti nzi tongaso si mbi vo na mbangi ni. Atâa so na yâ ti sewa ti mbi e yeke manqué ka lani ti gue na eglize ape, lâ oko a mû pëpe na mbi mbeni wango so apeut ti aidé mbi ti dö sese na amba ti mbi so ayeke pusu mbi ti sara aye ti sioni. Fani mingi lapolice a-arrêté mbi. Gigi ti mbi aga lani kirikiri mingi! A gue ngbii na fin ni a bi mbi na da ti kanga.

 Mbeni lâ na ngu 1997, so mbi ngbâ encore na kanga, mbeni zo ti kanga ni abâ Bible so mbi gbu na maboko ti mbi. A yeke lani na temps ti Noël la, mbeni lango so mingi ti azo ti Tonga abâ ni tongana lango so ayeke nzoni-kue. Lo hunda mbi wala eskê mbi hinga vraiment ye so Bible atene na ndö ti dungo Jésus; me mbi hinga ti mbi ye oko dä ape. Lo fa na mbi na yâ ti Bible mbaï ti dungo Jésus, na mbi bâ so gbâ ti aye so a yeke sara na temps ti Noël ayeke même na yâ ti Bible ape (Matthieu 2:1-12; Luc 2:5-14). Ye ni a-étonné mbi ngangu, na mbi ye ti hinga ambeni ye nde wa la Bible afa ni so mbi hinga ape. Mba ti mbi zo ti kanga ni so ayeke gue ka lakue na abungbi so aTémoin ti Jéhovah ayeke sara na da ti kanga ni yenga na yenga, na mbi décidé ti gue nga legeoko na lo na abungbi ni. Ala yeke manda lani buku ti Apocalypse. Atâa so mbi mä lani yâ ti aye ni kue nzoni ape, ye so mbi bâ ayeke so ye kue so ala yeke fa lani alondo na yâ ti Bible.

 Na temps so aTémoin ti Jéhovah ni ahunda ti manda Bible na mbi, terê ti mbi anzere na mbi yeda. Ala fa na mbi zendo so Nzapa amû ti tene sese aga paradis, na a yeke lani kozo ti tene mbi mä tënë ni so la (Ésaïe 35:5-8). Mbi bâ polele so ti tene mbi zia ngia na bê ti Nzapa, mbi doit ti sara akota changement na yâ ti gigi ti mbi. Mbi hinga so Jéhovah ayeke yeda ape ti tene mbi duti na yâ ti Paradis, tongana mbi ngbâ na asioni sarango ye ti mbi ni so (1 aCorinthien 6:9, 10). Tongaso, mbi leke na bê ti mbi ti hon ndö ti sarango ngonzo, ti zia lege ti manga, ti zia ti nyon sämba ahon ndö ni nga ti zia lege ti mbangi.

 Na ngu 1999, kozo ti hunzi kanga ti mbi, akota zo ti kodro atokua mbi na mbeni da ti kanga ni nde. Ahon ngu oko tongaso, mbi bâ terê na aTémoin ti Jéhovah ape. Me, mbi leke lani na bê ti mbi ti ngbâ ti changé. Na ngu 2000, gouvernement ake na mbi ti ngbâ na États-Unis, na a kiri na mbi na Tonga.

 Na temps so mbi kiri na Tonga, mbi ye gï ti wara aTémoin ti Jéhovah na ti kiri ti manda Bible. Mbi ye aye so mbi yeke manda lani, na li ti mbi akpe ti bâ so aye so aTémoin ti Jéhovah ti zoa ni ayeke fa ague oko na Bible, tâ gï tongana ti so aTémoin ti Jéhovah ti États-Unis kue ayeke sara lani.

 Azo ahinga lani babâ ti mbi mingi na yâ ti ndo so lo yeke dä, ndali ti so lo yeke mbeni kota zo ti eglize ti lo. Tongaso, na début ni azo ti sewa ti mbi acomprendre pëpe ngbanga ti nyen la mbi sara beoko na aTémoin ti Jéhovah, na ye ni ason ala mingi. Me na pekoni, a nzere na babâ na mama ti mbi ti bâ so amama-ndia ti Bible a-aidé mbi ti zia lege ti asioni sarango ye, na ti duti na mbeni nzoni gigi.

 Mbeni ye so ayeke lani ngangu na mbi ti zia lege ni andu mbeni sarango ye so azo ti kodro ti mbi ayeke sara ni mingi. Na kodro ti Tonga, akoli ayeke passé ka temps ti ala mingi na nyongo kava, mbeni sämba so a yeke sara ni na aracine ti keke ti poivre. So mbi kiri na kodro awe so, mbi mû habitude ti gue na place ti nyongo kava presque na alakui kue, na mbi yeke nyon ngbii mbi soulé mo bâ mo tene mbi ye ti kui kuingo. Mbeni ye so asara si mbi tï na yâ ti ye ni so ayeke so, mbi yeke sara lani kamarade na azo so asara ye alingbi na amama-ndia ti Bible ape. Na nda ni, a fa na mbi so asarango ye ni so ayeke zia vundu na bê ti Nzapa. Mbi ngbâ mbi zia lege ti asioni sarango ye ti mbi tongaso si Nzapa asara tufa na ndö ti mbi nga mbi duti na nzoni songo na lo.

 Mbi komanse ti gue na abungbi kue ti aTémoin ti Jéhovah. So mbi yeke na terê ti azo so ayeke sara effort ti sara ye so anzere na Nzapa, a aidé mbi ti luti na lê ti atara. Na 2002, mbi wara batême mbi ga Témoin ti Jéhovah.

 Mbi wara ye ti nzoni ndali ti so Nzapa akanga bê ti lo tongana ti so a tene na yâ ti Bible a tene: “Jéhovah [a]yeke kanga bê na ala ngbanga ti so lo ye si a futi zo oko pëpe, me lo ye si azo kue achangé bê ti ala.” (2 Pierre 3:9). Lo peut fade ti futi sioni dunia so depuis awe, me lo zia dunia ni angbâ aninga kete ti mû lege na azo tongana mbi so ti ga akamarade ti lo. A nzere na mbi ti bâ so Lo peut nga ti sara kua na mbi ti aidé ambeni zo nga ti ga akamarade ti lo.

 Grâce na aide ti Jéhovah, gigi ti mbi akiri aga nzoni. Mbi yeke nzi encore ye ti azo ape ti vo na mbangi si mbi nyon. Nde na so, mbi yeke sara effort ti aidé amba ti mbi ti ga nga kamarade ti Jéhovah. A yeke na yâ ti bungbi ti aTémoin ti Jéhovah la mbi wara wali ti mbi Tea, so mbi ye lo mingi. E yeke na mbeni pendere sewa, mbi na wali ti mbi na kete molenge ti e ti koli. E kue e yeke fa na azo tënë so Bible atene na ndö ti beku ti fini ti lakue lakue na ndö ti sese so ayeke ga paradis.