Gbâ ti atouriste ayeke ga ka na Pagsanjan na kodro ti Philippines, ti bâ achute so iri ni awu mingi. A yeke na ndo so la babâ ti mbi, Nardon Leron, akono dä; lo kono na yâ ti yere. Na bango tënë ti petengo goro so amû yâ ti gouvernement, lapolice nga na place ti kua ti lo, lo ga zo so aye ngonzo ngangu mingi.

 Babâ na mama ti e ayeke sara lani kua ngangu ti bata e amolenge ti ala so e yeke miombe. Ala yeke sara kua ti yaka na ndö ti ahoto, na ala yeke gue ka alango na yaka teti alango mingi. Mbi na yaya ti mbi ti koli Rodelio e doit ti pika li ti e wani ti wara ye ti tengo ni, na a si fani mingi so e kui nzara. Na temps so e de molenge, e wara nga lege ti sara ngia nzoni ape. Ti londo na ngoi so e yeke na ngu mbasambala, e doit ti gue lani ti sara kua na yâ ti yaka; e yeke yô asac ti coco so ane mingi, e descend na ni na li ti hoto. Tongana kungba ni ane ahon ndö ni, e doit ti gboto ni gbotongo ti descend na ni.

 Babâ ti e ayeke pika e lani mingi, me a kiri a sara e nzoni ape ti bâ lo na pikango mama ti e. E tara lani ti kanga lege na lo ti sara ni, me ngangu ayeke dä ape. Mbi na Rodelio e mä terê na hongengo ni ti tene, tongana e kono, e fâ babâ ti e. Mbi ye tâ lani ti wara mbeni babâ so aye e!

 So babâ ti mbi ayeke sara lani ye ti ngangu mingi so, ason mbi mingi na a sara si mbi quitté yanga-da na ngoi so mbi yeke na ngu 14. Teti mbeni ngoi, mbi lango na lege, na mbi komanse ti nyon mbangi. Na pekoni, mbi sara kua ti yongo atouriste na yâ ti kete bateau ti gue na ala na place so achûte ti ngu ayeke dä.

 Ambeni ngu na pekoni, mbi komanse ti manda mbeti na dasendagi ti Manille. Me teti so na asamedi na adimanche mbi doit ti kiri na Pagsanjan ti sara kua, mbi wara nga lani ngoi mingi ape ti diko mbeti. Gigi ayeke lani ngangu na mbi, na mbi hinga ye ti sara ape. Mbangi so mbi yeke nyon lani so asara nga si mbi grisa souci encore ape. Mbi komanse ti tï na terê ti ambeni mara ti mbangi ni nde ti nyon ni. Mbi yeke nyon mbangi nga mbi yeke gï awali. Gï tënë ti yere, sarango ye na zo na lege ni ape nga na pasi la mbi yeke bâ na ndo so mbi yeke dä. Mbi ke azo ti gouvernement ti kodro ti mbi bê oko ndali ti so na lê ti mbi ala la asara si aye ni so kue ayeke dä so. Mbi hunda na Nzapa mbi tene: “Ngbanga ti nyen la gigi ayeke tongaso?” Mbi gue na yâ ti a-eglize nde nde, me mbi wara kiringo tënë na ni ape. Mbi kiri mbi nyon mbangi mingi ahon ti kozo, tongaso si vundu asara mbi mingi ape.

 Na ngu 1972, awamandango mbeti na dasendagi ti Philippines asara grève na terê ti gouvernement ti kodro ni. Mbi tï nga na milieu ti ala na mbeni ngoi, na aye apassé nzoni ape na ngoi ni so. A gbu azo ngbani a bi ala na da ti kanga, nga ambeni nze na pekoni gouvernement amû yanga ti tene a zia aturugu na ndo kue si ala kiri na ordre na yâ ti kodro ni.

 A gue ngbii mbi kiri mbi komanse ti fono na ndö ti lege tongana ti kozo, me teti so mbi kue mbi mû lani mbage na yâ ti grève so asi lani, mbeto asara mbi. Ti tene mbi wara pata ti vo na mbangi, mbi yeke nzi nga mbi komanse ti zia terê ti mbi na amba ti mbi koli so ayeke azo ti mosoro nga na awande. Ti mbi, même mbi kui wala mbi kui ape, ye oko ason nga mbi ape.

 Me na atemps ni so, aTémoin ti Jéhovah akomanse ti manda Bible na mama ti mbi nga na gambe ti mbi ti koli. Ngonzo agbu babâ ti mbi ngangu, na lo gbi ambeti ti ala. Atâa so kue ala ngbâ ti manda Bible juska ala gue awara batême ala ga Témoin ti Jéhovah.

 Mbeni lâ, mbeni Témoin ti Jéhovah afa na babâ ti mbi so Bible amû zendo so mbeni ngoi ayeke ga ande so a yeke sara ande ye mbilimbili na azo na ndö ti sese kue (Psaume 72:12-14). Tënë ni so anzere na lo mingi juska lo wani lo décidé ti sara recherche na ndö ni. Lo bâ na yâ ti Bible so Nzapa amû zendo so mbeni gouvernement so ayeke sara ye mbilimbili ayeke duti dä mbeni lâ, nga lo bâ nga ye so Nzapa ahunda na akoli ti awali nga na ababâ ti sara (aÉphésien 5:28; 6:4). Kete na pekoni, lo na ambeni ita ti mbi ti koli na ti wali kue aga Témoin ti Jéhovah. So mbi lango ayo mingi na ala, mbi hinga ye oko na ndö ti aye so apassé so ape.

 Na ngu 1978, mbi gue na Australie. Me atâa so mosoro nga na siriri ayeke na yâ ti kodro ni, mbi yeke na siriri ti bê ape. Mbi ngbâ ti nyon sämba nga na mbangi. Ambeni ngoi na pekoni gï na yâ ti oko ngu ni so, aTémoin ti Jéhovah aga na dä ti mbi. Ye so ala fa na mbi na yâ ti Bible na ndö ti siriri so Nzapa ayeke ga ande na ni na ndö ti sese anzere lani na mbi, me mbi yeke sara lani hange mingi na ala.

 Kete ne pekoni, mbi kiri na Philippines teti ambeni yenga. Aita ti mbi atene na mbi so babâ ti e asara effort mingi ti changé asarango ye ti lo. Me teti so bê ti mbi ason lani na terê ti lo mingi, mbi sara kue ti tingbi na lo ape.

 Kete ngambe ti mbi ti wali afa na mbi na yâ ti Bible ndani so si gigi ti e asi singo na pasi nga na sarango ye mbilimbili ape so. A étonné mbi so tâ kete maseka-wali tongaso akiri tënë na ahunda so mbi yeke hunda terê ti mbi na ni. Kozo ti tene mbi kiri, babâ ti mbi amû na mbi buku Mo lingbi ti douti la koue la koue na paradis na ndo sesse. a Lo tene na mbi: “Zia lege ti aye so mo yeke sara so. Buku so ayeke aidé ande mo ti wara ye so mo yeke gi so.” Lo ha mbi ti gi ti wara aTémoin ti Jéhovah tongana mbi kiri na Australie.

 Mbi mä wango so babâ ti mbi amû na mbi, na mbi gue na Da ti Royaume ti aTémoin ti Jéhovah so ayeke nduru na mbi na Brisbane. Mbi yeda ti tene a ga a manda Bible na mbi. Aprophétie ti Bible tongana Daniel chapitre 7 nga na Ésaïe chapitre 9 afa na mbi so gouvernement ti Nzapa, so sarango sioni ayeke dä ape, ayeke komande ande e na yâ ti ngoi so ayeke ga. Mbi manda so e yeke duti ande na fini na yâ ti Paradis na ndö ti sese. Mbi ye ti sara ye so anzere na lê ti Nzapa, me mbi bâ so mbi doit ti changé ti hon ndö ti anzara ti bê ti mbi, ti zia ti nyon mbangi, sämba, nga ti zia ti sara lango-sioni. Mbi séparé na ndeko ti mbi so mbi na lo e yeke vivre, nga mbi zia lege ti nyongo aye ti mbi ni. So confiance so mbi yeke na ni na Jéhovah ayeke kono, mbi sambela lo ti aidé mbi ti sara ambeni changement ni.

 Yeke yeke, mbi ga ti bâ so ye so mbi yeke manda so apeut biani ti changé zo. Bible atene so tongana e sara effort, e peut ti yü “fini zo.” (aColossien 3:9, 10). So yeke yeke mbi sara effort mbi changé, mbi ga ti bâ so ye so mbi mä lani na ndö ti babâ ti mbi so atene lo changé so ayeke tâ tënë. A hon ti ngbâ ti sara ngonzo nga ti ke lo, mbi gi lege ti duti na siriri na lo. Na ndani, mbi pardonné babâ ti mbi na mbi zia ti ke lo tongana ti so mbi ke lo lani depuis molenge so.

 Na temps so mbi ngbâ lani maseka, mbi yeke mû ka lani peko ti sioni sarango ye ti amba ti mbi. Mbeni tënë so Bible atene aga lani tâ tënë na ndö ti mbi: asioni kamarade asara si mbi buba anzoni sarango ye ti mbi (1 aCorinthien 15:33). Me mbi wara anzoni kamarade na popo ti aTémoin ti Jéhovah, na ala aidé mbi ti ga mbeni nzoni zo. A yeke nga na popo ti ala la mbi wara pendere wali ti mbi Loretta. Mbi na lo kue e yeke fa na azo tongana nyen la Bible apeut ti aidé ala.

 Grâce na Bible, mbi bâ so babâ ti mbi aga mbeni zo so mbi pensé lo peut ti ga ni lâ oko ape: mbeni koli so aye wali ti lo, nga mbeni Chrétien so asara terê ti lo kete, so ayeke na siriri na azo nga aye azo. Na ngoi so mbi na lo e wara terê na ngu 1987 na peko ti so mbi ga Témoin ti Jéhovah, lo gbu mbi na kate. Depuis so a dü mbi so, kozo ti tene lo gbu mbi na kate ti lo la!

 Ahon angu 35, babâ na mama ti mbi angbâ ti fa tënë ti beku so ayeke na yâ ti Bible. Babâ ti mbi aga mbeni zo so aye tënë ti Nzapa mingi, nga a hinga lo tongana mbeni zo so ayeke aidé azo. Na yâ ti angu so kue, mbi manda ti ne lo nga ti ye lo. Terê ti mbi anzere so a hinga mbi tongana molenge ti lo. Lo kui na ngu 2016, me mbi ngbâ ti pensé lakue na lo, mbi hinga so e use kue e sara akota changement na yâ ti gigi ti e, ndali ti so e sara ye alingbi na aye so Bible afa na e. Mbi yeke ke azo encore ape. Na mbi kiri merci so mbi wara Babâ ti mbi ti yayu Jéhovah Nzapa, so amû zendo ti hunzi aye kue so ayeke sara si asewa ayeke bâ pasi na ndö ti sese.