A dü mbi na Montréal, mbeni kota gbata ti Québec (Canada). A dü e osio, na babâ na mama ti e so aye e mingi la abata e. E kono na yâ ti quartier ti Rosemont, mbeni pendere quartier. Sewa ti e ayeke lani na ngia nga e yeke na siriri.

 Na temps so mbi de lani maseka, mbi ye Bible mingi. Mbi rappelé so na ngoi so mbi yeke lani na ngu 12, mbi ye mingi ti diko mbaï ti fini ti Jésus na yâ ti Nouveau Testament. Mbi ye lani mingi ti sara ye tongana Jésus so andoye azo mingi nga lo yeke bâ mawa ti ala. Mawa ni ayeke so tongana mbi yeke kono, mbi perdre nzara ni so, na mbi komanse ti wara asioni kamarade.

 Babâ ti mbi ayeke lani mbeni zo so ayeke joué mbeni ye ti mozoko so a iri ni saxophone. Lo mû na mbi lani saxophone ti lo, nga lo zia nzara ti mozoko na yâ ti mbi. Teti so mbi ye lani mozoko mingi, hio mbi manda ti joué guitar. Tongana ngoi ayeke hon, mbi na ambeni kamarade ti mbi, e sigi na mbeni groupe ti hengo bia ti rock, na e sara gbâ ti aconcert. Ambeni kota zo ti ndokua ti sigingo na abia abâ ni, na ala hunda ti sigi na abia ti mbi. Mbi ngbâ mbi signé contract na mbeni kota ndokua ti sigingo na abia. Azo akomanse ti ye abia ti mbi, nga a yeke pika ni lakue na radio ti Québec.

 Mbi bâ lani mbi tene mbi wara aye kue so mbi ye ti wara awe. Mbi yeke lani maseka, azo ahinga mbi mingi, mbi wara lani gbâ ti nginza na yâ ti kua ti mbi so mbi ye ni mingi. Na kota lâ, mbi yeke sara sport, mbi yeke kiri tënë na ajournaliste, azo ayeke ga na mbi aye ti ala ti tene mbi zia signature ti mbi na ndö ni, nga a yeke fa mbi na télé. Na bï, mbi yeke sara aconcert nga mbi yeke gue na afête. Mbi yeke nyon lani sämba tongaso si mbi zi mbeto ti lê ti azo na yâ ti mbi. Me a gue ngbii mbi komanse ti nyon mbangi. Mbi tï nga na yâ ti sarango vie ti kirikiri.

 Ambeni zo aye mara vie ti mbi ni so lani ndali ti so ala pensé so mbi yeke na ngia. Me mingi ni tongana mbi yeke gï mbi oko, na yâ ti bê ti mbi kâ, mbi bâ so mbeni kota ye amanke mbi. Vundu ahon ndö ti mbi, nga mbi yeke pensé mingi. Ye ti mawa ni ayeke so, na temps so mbi ngbâ tâ na yâ ti gloire ti mbi, akoli use so ayeke bâ tënë ti sigingo na abia ti mbi akui na SIDA. Ye ni so asara mbi nzoni ape! Mbi ye lani mozoko mingi, me vie ni so anzere encore na mbi ape.

 Atâa so mbi réussir na yâ ti mozoko, mbi ga ti bâ so dunia ayeke sioni mingi. Ngbanga ti nyen la sarango ye na lege ni ape ahon ndö ni tongaso? Mbi yeke hunda lani terê ti mbi wala ndali ti nyen la Nzapa asara mbeni ye ape ti kanga lege na ni. Mbi yeke sambela ka Nzapa mingi ti wara akiringo tënë ni. Na temps so si e yeke sara lani mbeni tournée, na si e wara mbeni ngoi ti wu terê, mbi kiri mbi komanse ti diko Bible. Atâa so mbi comprendre mingi ti aye so mbi yeke diko so ape, mbi bâ so a ga nduru ti futi dunia so awe.

 Na ngoi so mbi yeke diko Bible, mbi bâ so Bible atene so mbeni lâ Jésus amû jeûne na yâ ti benyama teti lango 40 (Matthieu 4:​1, 2). Mbi tene so tongana mbi kue mbi sara mara ni, peut-être Nzapa ayeke fa terê ti lo na mbi. Tongaso, mbi leke mbeni lango ti komanse ti sara ni. Yenga use kozo si mbi komanse jeûne ni, aTémoin ti Jéhovah use apika yanga-da ti mbi, mbi hunda na ala ti lï mo bâ mo tene mbi yeke ku fade ala kungo. Iri ti mbeni oko ayeke Jacques. Mbi bâ yâ ti lê ti lo na mbi hunda lo mbi tene: “Nyen la apeut ti fa na e biani so e yeke na lâ ti nda ni?” Ti kiri tënë na mbi, lo zi Bible ti lo na lo diko na mbi 2 Timothée 3:​1-5. Mbi hunda na ala gbâ ti ahundango tënë, na bê ti mbi adö ti bâ tongana nyen la akiringo tënë ti ala ni ayeke na lege ni nga adë bê ti mbi, na lakue ala mû ni na yâ ti Bible. Gï na peko ti so ala ga oko use si e na ala e sara lisoro, mbi ga ti bâ so mbi bezoin encore ape ti mû jeûne ni.

 A-Témoin ti Jéhovah akomanse ti ga lakue ti manda Bible na mbi. A gue ngbii mbi fâ yongoro kuä ti li mbi na mbi komanse ti gue na abungbi na Da ti Royaume. Fason so a yamba na mbi akiri asara si mbi yeda biani so mbi wara tâ tënë awe.

 Ti sara ye alingbi na aye so mbi manda na yâ ti Bible, a lingbi mbi sara lani encore ambeni changement na yâ ti gigi ti mbi. Kozoni, mbi doit lani ti zia lege ti nyongo mbangi nga na vie ti kirikiri. Mbi doit nga lani ti zia ti pensé gï na mbi wani na ti pensé mingi na amba ti mbi. So gï mbi oko la lani mbi yeke bata amolenge ti mbi use, mbi doit ti ndoye ala nga ti bâ lege ti ala na lege ti yingo. Ni la mbi zia lege ti mozoko na mbi yeda ti sara kua na yâ ti mbeni usine, so a yeke payé nga mbi cher ape.

 Ti sara lani achangement so kue ayeke kete ye ape. So mbi ye lani ti zia lege ti nyongo mbangi, mbi doit ti tiri na akpale ti peko ni. A si so mbi kiri mbi nyon ni (aRomain 7:19, 21-24). Ti zia vie ti kirikiri ti mbi ayeke lani ngangu mingi. Na ndö ni, fini kua ti mbi ni ayeke fatigué mbi lani mingi nga mbi découragé ndali ti so salaire ni akono ape. Nginza ti mbi ti nze ota alingbi na nginza so mbi yeke wara lani gï na yâ ti l’heure use na temps so mbi ngbâ lani ti pika mozoko.

 Sambela a-aidé mbi lani ti ngbâ ti sara akota changement so. Mbi bâ nga lani so ayeke kota ye ti tene mbi diko Bible lakue. Ambeni versê ti Bible a-aidé mbi lani mingi. Mbeni oko ayeke versê ti 2 aCorinthien 7:1 so ahunda na aChrétien ti “sukula terê ti [ala] wani ti zi aye kue so asara si terê na bibe aga sioni.” Mbeni versê ni nde so afa na mbi biani so zo apeut ti zia lege ti asioni sarango ye ti lo ayeke versê ti aPhilippien 4:13, so atene: “Mbi wara ngangu ti sara aye kue ndali ti lo so lo mû ngangu ni na mbi.” Jéhovah Nzapa akiri tënë na sambela ti mbi nga lo aidé mbi ti mä yâ ti Bible na ti sara ye alingbi na ni.Ye so asara si mbi mû fini ti mbi na lo (1 Pierre 4:1, 2). Mbi wara batême ti ga Témoin ti Jéhovah na ngu 1997.

 Ti tâ tënë ni, tongana mbi ngbâ lani na yâ ti vie ti mbi ti ândö so, ka mbi kui awe. Me laso, mbi yeke na tâ ngia na yâ ti gigi ti mbi! Wali ti mbi Elvie so ayeke mbeni nzoni wali a-aidé mbi mingi. Mbi na lo kue e yeke mû l’heure mingi ti fa tënë ti Nzapa na azo. Kua ni so asara si e yeke na ngia mingi. Mbi kiri vraiment singila mingi na Jéhovah so lo gboto mbi na mbage ti lo.​—Jean 6:44.