A yeke gï azo so ayeke fa nzoni tënë ti Royaume ti Nzapa nze oko oko la a yeke diko ala tongana aTémoin ti Jéhovah (Matthieu 24:14). Ye so andu aTémoin ti Jéhovah so awara batême, me nga na ala so ade ti wara batême ape, so alingbi awe ti fa tënë.

 Ên-ën. Mbeni zo ayeke ga Témoin ti Jéhovah pëpe ndali ti mbeni ye ti maboko so lo mû wala ndali ti mbeni kua so a mû na lo so ayeke nde na yâ ti bungbi ti e (Kusala 8:18-20). Ti vrai ni, mingi ti adîme so a yeke mû ni, a hinga zo ni ape. A yeke Témoin ti Jéhovah oko oko la ayeke mû ngoi ti lo, ngangu ti lo, nga na aye so lo yeke na ni ti aidé na kua ti e na yâ ti dunia kue tongana ti so bê ti lo aye nga alingbi na dutingo ti lo (2 aCorinthien 9:7).

 Ala yeke hinga ni na lege so, nze oko oko, aTémoin ti Jéhovah ayeke mû wungo ti al’heure so ala fa na tënë na yâ ti congrégation so ala yeke dä. Ala mû wungo ti al’heure ni so na bê ti ala wani.

 A yeke diko wungo ti al’heure kue so acongrégation ni atokua, na a tokua ni na filiale ti kodro ni. Filiale ni ayeke tokua wungo ti al’heure kue so akodro ni atokua na kota ndokua ti e.

 Na hunzingo ti ngu ti kusala oko oko, a a yeke calculé maximum ti wungo ti aTémoin ti Jéhovah ti kodro oko oko kue. Na abungbi awungo ni kue ti hinga nombre ti aTémoin ti Jéhovah na yâ ti dunia kue. Arapport ti kodro oko oko kue ayeke na ndö ti site Internet ti e, na mbage “Aux 4 coins du monde”. Arapport so ayeke kpengba e, gï tongana ti akozo Chrétien (Kusala 2:41; 4:4; 15:3).

 Ên-ën. Atâa so e diko ala ape na popo ti aTémoin ti Jéhovah, e yeke yamba ala na yâ ti abungbi ti e. Mingi ti ala ayeke ga na dango bê na kuâ ti Christ, na nombre ni so la asara si wungo ti azo so aga na Mémorial ayeke mingi ahon wungo ti aTémoin ti Jéhovah. Na ngu 2023, wungo ti azo so aga lani na Mémorial ayeke 20 461 767.

 Mingi ti azo so ayeke ga na abungbi ti e ape ayeke wara ye ti nzoni na lege so e yeke manda Bible na ala senge senge. Na ngu 2023, e manda Bible na azo ahon 7 281 212 nze na nze, na mingi ni e yeke manda Bible na gbâ ti azo na même temps.

 Mingi ni, azo ti sarango recensement ayeke wara wungo ti azo ni so na lege so ala hunda azo ni ti fa bungbi ti Nzapa so ala yeke na yâ ni. Na tapande, azo ti sarango recensement ti États-Unis atene so: “Ala yeke diko mbeni zo tongana zo ti mbeni bungbi ti Nzapa gï tongana zo ni atene ni yeke na yâ ti bungbi ti Nzapa ni so.” Ye so a sara si wungo ti azo ti bungbi ti Nzapa ni ayeke mingi ahon ti “vrai wungo ti ala.” Nde na atënë so, azo so ayeke mû wungo ti al’heure nze na nze ti fa na tënë la e yeke diko ala tongana aTémoin ti Jéhovah, me pëpe azo so ala wani abâ terê ti ala tongana aTémoin ti Jéhovah.