Tënë so azo atene: A-Témoin ti Jéhovah ayeke sara ka matanga ti Noël ape ngbanga ti so ala mä na bê na Jésus ape.

 Tâ tënë ni: E yeke aChrétien. E mä na bê so a yeke gï na lege ti Jésus Christ la e lingbi ti wara salut.—Kusala 4:12.

 Tënë so azo atene: So ala tene na azo ti bungbi ti ala ti sara Noël ape asara si yâ ti afami akangbi.

 Tâ tënë ni: E yeke bâ ka lege ti azo ti sewa ti e mingi, nga e yeke zia si Bible a-aidé e ti sara si songo ti e na ala akpengba.

 Tënë so azo atene: Ala sara erreur, matanga ti Noël asara si azo amû ye na amba ti ala, siriri aduti na ndö ti sese nga azo asara songo na popo ti ala.

 Tâ tënë ni: E yeke sara kue ti mû ye na azo nga ti duti na siriri na ala lakue (aProverbe 11:25; aRomain 12:18). Na tapande, fason so e yeke sara na abungbi ti e nga na fango tënë ti e ague oko na yanga so Jésus amû lani so lo tene: “Ala wara ye senge senge, ala mû ni na azo senge senge.” (Matthieu 10:8). E yeke fa nga na azo so Royaume ti Nzapa oko la apeut ti ga na siriri na ndö ti sese.—Matthieu 10:7.

•   Jésus atene na e ti dabe ti e na kuâ ti lo, me lo tene ape ti sara matanga ti dungo lo.—Luc 22:19, 20.

•   Abazengele nga na akozo disciple ti Jésus asara lani matanga ti Noël ape. Mbeni bakari (New Catholic Encyclopedia) atene so azo akomanse ti sara matanga ti dungo na peko ti ngu 243 N.E, so ti tene ngu ngbangbo oko tongaso na peko ti so tanga ti abazengele akui.

•   Ye oko afa ape so a dü Jésus na lango 25 ti décembre; a fa lango ti dungo lo na yâ ti Bible ape.

•   E mä na bê so matanga ti Noël ayeke matanga so Nzapa ayeda na ni ape ndali ti so alondo na apaïen.—2 aCorinthien 6:17.

 Gbâ ti azo ayeke sara matanga ti Noël atâa so ala hinga so a yeke matanga so alondo na apaïen nga so Bible ayeda na ni ape. Azo tongaso alingbi ti tene: Ngbanga ti nyen la aChrétien adoit ti sara matanga ni ape, so gbâ ti azo ayeke sara ni so? Sioni ti nyen la ayeke na yâ ti sarango matanga ni so?

 Bible awa e ti gbu li ti e, ti sara kua na ‘hingango ndo ti e.’ (aRomain 12:1, 2). Bible afa nga na e ti bâ tâ tënë na nene ni (Jean 4:23, 24). A yeke tâ tënë so e yeke sara hange na fason so azo ayeke bâ na e, me e yeke sara ye lakue alingbi na andia ti Bible même si sarango tongaso ayeke sara si azo aye tënë ti e ape.

 E mû desizion ti sara matanga ti Noël ape, me e yeke ne desizion so zo oko oko ayeke mû na ndö ti tënë ni so. E yeke gi pëpe ti kanga lege na azo na ngoi so ala yeke sara matanga ti Noël.