Na yâ ti Bible, a yeke wara pëpe mbeni versê so asara tënë ti adinosaure droit tongaso. Me Bible atene so Nzapa la “aleke aye kue”, tongaso kite ayeke dä ape so adinosaure ayeke lani na popo ti aye so Nzapa aleke a (Apocalypse 4:11). Bible asara tënë ti agroupe ti ambeni nyama so adinosaure apeut nga ti duti na milieu ni:

•   “Akota nyama ti ngu-ingo.”​—Genèse 1:​21

•   “Anyama kue so ayeke hara na ndö ti sese.”​—Genèse 1:​25.

•   “Anyama ti ngonda.”​—Genèse 1:25.

Eskê ambeni nyama la ague ngbii si aga adinosaure so?

 Abio ti adinosaure so a wara na gbe ti sese afa pëpe so ala yeke ândö ambeni nyama si na pekoni ala ga tongaso. A gue oko na tënë so Bible afa so atene Nzapa aleke anyama kue. Na tapande, Psaume 146:6 atene so Nzapa ayeke “Lo so asara yayu na sese, ngu-ingo na aye kue so ayeke na yâ ni.”

Adinosaure ayeke lani na fini na ngoi wa?

 Bible atene so a créé anyama so ayeke na yâ ti ngu nga na ala so ayeke na ndö ti sese na oku nga na omene lango ti création b (Genèse 1:20-25, 31). Tongaso Bible amû lege na e ti bâ so, teti mbeni ngoi so aninga, adinosaure avivre lani na ndö ti sese.

Eskê Béhémoth na Léviathan ayeke adinosaure?

 Ên-ën. Atâa so e lingbi pëpe ti hinga biani anyama wa la mbeti ti Job aye ti sara tënë ti ala so, mingi ni tongana a sara tënë ti Béhémoth a tene so aye ti sara tënë ti konô nga tongana a sara tënë ti Léviathan aye ti sara tënë ti ngunde. Ye ni so ague oko na asango so Bible amû na ndö ti anyama ni so (Job 40:15-​23; 41:​1, 14-​17, 31). Atâa ye ni ayeke tongana nyen, ‘‘Béhémoth’’ nga na ‘‘Léviathan’’ ayeke pëpe adinosaure. Nzapa ahunda lani na Job ti tene lo wani lo bâ anyama ni so, andâ na ngoi ni so adinosaure ayeke encore dä ape asara angu mingi awe.​—Job 40:16; 41:8.

Nyen la apassé si adinosaure ayeke encore dä ape so?

 Bible afa pëpe ngbanga ti nyen la adinosaure ayeke encore dä ape. Me Bible atene so Nzapa acréé aye kue ‘ndali ti ye so bê ti lo aye’, so ti tene Nzapa acréé adinosaure ndali ti mbeni raison (Apocalypse 4:11). So raison so lo créé ala lani ndali ni ayeke encore dä ape, lo zia lege si ala kue akui.