A yeke pëpe Nzapa la asara si laso aye tongana ngu so asuku amû ndo wala sese so ayengi asi. Me lo yeke pensé mingi na azo so aye ni so asi na ala. Royaume ti Nzapa ayeke zi ande aye kue so asara si azo ayeke bâ pasi, so na popo ni a yeke wara aye tongana ngu so asuku amû ndo, akota pupu so aya wala sese so ayengi. Me kozo si Royaume ti lo aga azi aye ni so, Nzapa ayeke dë bê ti azo so laso akpale ni so asi na ala.​—2 aCorinthien 1:3.

•  Nyen la afa na e biani so akpale ni so ayeke punition ti Nzapa ape?

•  Akpale ni so aye ti fa so e yeke na lâ ti nda ni la?

•  Tongana nyen la Nzapa ayeke aidé azo so akpale ni so asi na ala?

•  Eskê Bible apeut ti aidé e ti leke terê ti e ndali ti akpale ni so?

•  Aversê ti Bible so adë bê ti azo so akpale ni so asi na ala

 Tongana e diko Bible e yeke bâ so na ambeni ngoi ândö, Jéhovah asara kua na aye tongana wâ, ngu wala sese so ayengi ti fâ ngbanga na ndö ti azo. Me aye ni so asi lani so ayeke nde mingi na akpale tongana ngu so asuku amû ndo, sese so ayengi wala akota pupu so aya, so e yeke bâ ni laso.

•   Tongana akpale tongana ngu so asuku amû ndo wala sese so ayengi asi, a yeke soro yâ ti azo si a fâ ala ape. Me ti Nzapa, tongana lo sara kua lani na aye tongana wâ wala ngu na ngoi ti fango ngbanga ti lo, lo yeke sara kue ti tene gï azo ti sioni la akui na yâ ni. Na tapande, na temps so Nzapa afuti lani gbata ti Sodome na Gomorrhe, lo sara si Lot so ayeke mbeni nzoni zo nga na amolenge ti lo ti wali use asö kuâ (Genèse 19:29, 30). Nzapa ahinga lani ye so ayeke na yâ ti bê ti azo na ngoi ni so, na lo fâ gï ala so lo bâ so ala yeke asioni zo.​—Genèse 18:23-​32; 1 Samuel 16:7.

•   Mingi ni, akpale tongana ngu so asuku amû ndo wala sese so ayengi ayeke si ka gï gbagburu tongaso, wala a hinga tënë ni hio ape. Me ti Nzapa, kozo si lo sara kua na aye tongana ngu ti futi na azo ti sioni, lo yeke gboto mê ti ala. Azo so amä tënë so lo tene na asara ye so lo hunda, ala sö lani kuâ na ngoi ni.​—Genèse 7:​1-5; Matthieu 24:38, 39.

•   Na yâ ti ambeni ye, azo la ayeke nga na gunda ti ambeni kpale ni. Na lege wa? Na lege so ala yeke buba aye so angoro e. Na mbage, ala yeke leke ada na aplace so sese ayeke yengi ka dä mingi, so ngu ayeke suku ka dä mingi wala akota pupu ayeke sara ka dä mingi (Apocalypse 11:18). A lingbi e bi tënë na li ti Nzapa ape tongana azo asara ye tongaso na ala wara sioni na pekoni.​—aProverbe 19:3.

 En. Aprophétie ti Bible afa so na “ngoi so aye ti ngoi so ayeke gue ti hunzi” wala na “lâ ti nda ni,” akota kpale ayeke si (Matthieu 24:3; 2 Timothée 3:1). Na tapande, Jésus asara tënë ti ambeni ye so ayeke si na temps ti e, lo tene: “Kota nzara ayeke tï nga sese ayeke yengi, na aye so ayeke si na ando nde nde na peko ti terê.” (Matthieu 24:7). Na yâ ti kete ngoi, Nzapa ayeke zi na ndö ti sese aye kue so ayeke sara si azo abâ pasi, so na popo ni a yeke wara aye tongana ngu so asuku amû ndo, sese so ayengi wala kota pupu so asara.​—Apocalypse 21:​3, 4.

•   Na lege ti Bible, Nzapa ayeke dë bê ti azo so akpale ni so asi na ala. Bible adë bê ti e so Nzapa ayeke pensé na e nga vundu ayeke sara lo tongana lo bâ so e yeke bâ pasi (Ésaïe 63:9; 1 Pierre 5:​6, 7). Bible asara nga tënë ti zendo so Nzapa amû, so na mbeni ngoi akpale tongana sese so ayengi wala ngu so asuku amû ndo ayeke duti dä mbeni pëpe.​—Bâ mbage “ Aversê ti Bible so adë bê ti azo so akpale ni so asi na ala.”

•   Nzapa ayeke sara kua na awakua ti lo ti aidé azo so akpale ni so asi na ala. Nzapa afa na awakua ti lo ti mû tapande ti Jésus na lege so ala yeke dë bê ti azo. Ambeni prophétie ti Bible afa so Jésus ayeke dë bê ti azo so “ayeke na kä na bê ti ala” nga na ala so “ayeke sara vundu”. (Ésaïe 61:1, 2). Awakua ti Nzapa ayeke sara kue ti mû tapande ti Jésus.​—Jean 13:15.

   Nga, Nzapa ayeke sara kua na awakua ti lo ti mû na azo so akpale ni so asi na ala aye tongana kobe, bongo, yorö, ndo ti lango nga na ambeni ye ni nde.​—Kusala 11:28-30; aGalate 6:​10.

 En. Atâa so raison so a sû Bible ayeke pëpe ti mû maboko na e ti leke terê ti e ndali ti akpale tongana sese so ayengi wala kota pupu so aya, na yâ ti Bible e yeke wara ambeni mama-ndia so apeut ti mû maboko na e. Na tapande:

•   Gi ti pensé kozo na aye so mo yeke sara tongana mbeni kota kpale asi. Bible atene: “Zo so lê ti lo ahan abâ kpale, na lo honde terê ti lo.” (aProverbe 22:3). A yeke na lege ti ndara ti hinga kozo ye so e peut ti sara tongana e yeke na yâ ti mbeni ngangu situation. E peut ti pensé ti leke mbeni bozo so e zia aye so e bezoin ni na yâ ni, tongana mbeni ye ti ngangu asi. E peut ti fa na azo ti sewa ti e ndo so e kue e peut ti wara terê dä tongana mbeni kota kpale asi.

•   Zia si fini ti mo la aduti kota ye na lê ti mo ahon amosoro so mo yeke na ni. Bible atene: “E ga na ye oko pëpe na yâ ti dunia so nga e lingbi ti mû ye oko pëpe ti hon na ni.” (1 Timothée 6:7, 8). A lingbi e leke na bê ti e ti dö da ti e nga na akungba ti e ti zia na ngoi so mbeni kota kpale asi, tongaso si e sö kuâ. A lingbi e hinga so fini ti e ayeke kota mingi ahon amosoro kue so e yeke na ni.​—Matthieu 6:​25.