“Alpha na Oméga” aye ti sara tënë ti Jéhovah Nzapa, Lo so ngangu ti lo ahon angangu kue. Iri ni so asigi fani ota na yâ ti Bible.​—Apocalypse 1:8; 21:6; 22:13. a

 Alpha ayeke kozo gere-mbeti ti yanga ti grec, na Oméga ayeke ndangba gere-mbeti ni. A sû mbage ti Bible so a iri ni Nouveau Testament na yanga ti grec, so na yâ ni a yeke wara nga mbeti ti Apocalypse. A sara kua na tënë Alpha, so ayeke kozo gere-mbeti na yanga ti grec, nga Oméga, so ayeke ndangba gere-mbeti ti yanga ti grec ti fa so Jéhovah lo oko la lo yeke tongo nda ti ye nga na kongo nda ti ye (Apocalypse 21:6). Ngbene ye giriri lo yeke Nzapa so ngangu ti lo ahon angangu kue, na lo yeke ngbâ ande lakue Nzapa so ngangu ti lo ahon angangu kue. Lo oko la “ngbene ye lakue lakue nga lakue lakue” lo yeke gï dä.​—Psaume 90:2.

 Bible airi Jéhovah Nzapa nga na Molenge ti lo Jésus na iri ni so. Me ndani so a mû na ala iri ni so ayeke nde nde. Bâ atapande use so:

•   Na Ésaïe 44:6, Jéhovah atene: “Mbi yeke kozoni nga mbi yeke ndangba ni. Mbeni Nzapa ayeke dä pëpe, gï mbi oko.” Na yâ ti tënë so, Jéhovah afa polele so lo oko la lo yeke Nzapa so ayeke ngbâ lakue lakue; mbeni nzapa ayeke dä ape, gï lo oko awe (Deutéronome 4:35, 39). Ge, nda ti tënë “kozoni nga ndangba ni” ayeke oko na tënë “Alpha na Oméga.”

•   A yeke wara nga tënë “Kozoni [pro’tos, so ayeke nde na alpha] nga Ndangba ni [e’skha·tos, so ayeke nde na oméga]” na Apocalypse 1:17, 18 nga na 2:8. Na yâ ti aversê ni a tene so zo ni akui na pekoni a kiri na lo na fini. Tongaso, aversê so aye pëpe ti sara tënë ti Nzapa ndali ti so lo kui lâ oko ape (Habakuk 1:12). Me, Jésus akui na a zingo lo na kuâ (Kusala 3:13-15). Lo la lo yeke kozo zo so a zingo lo na terê so ayeke ti yingo, so alingbi ti kui lâ oko ape. Fadeso lo yeke ‘na fini ti lakue lakue’ na yayu (Apocalypse 1:18; aColossien 1:18). Na peko ti so a zingo Jésus na kuâ, lo la na lege ti lo a yeke zingo tanga ti azo na kuâ (Jean 6:40, 44). Tongaso, lo la lo yeke tanga ti zo so Jéhovah lo wani la azingo lo na kuâ (Kusala 10:40). Ndali ni la a peut ti iri lo a tene lo yeke “Kozoni nga Ndangba ni”.

 Ên-ën. A fa pëpe zo so ayeke sara tënë na yâ ti Apocalypse 22:13 so; nga na yâ ti chapitre 22 ti Apocalypse ni so kue, azo nde nde la asara tënë. William Barclay, so ayeke wafango-mbeti na mbeni université asara tënë so na ndö ti chapitre ti Apocalypse so, lo tene: “A sû atënë ni na mbeni ordre so e peut ti bâ ni polele hio tongaso ape; . . . nga fani mingi a yeke ngangu ti hinga mbilimbili azo so angbâ ti sara tënë.” (The Revelation of John, Volume 2, Édition so a kiri a leke peko ni, lembeti 223) Tongaso, “Alpha na Oméga” so a sara tënë ti lo na Apocalypse 22:13, a yeke oko Zo so na ambeni versê ti yâ ti Apocalypse a mû na lo iri ni so, so ti tene a yeke Jéhovah Nzapa.