Batême ayeke nyen?
Kiringo tënë ti Bible
Ti tene mbeni zo awara batême, a doit ti yôro zo ni kue na yâ ti ngu. a Bible asara tënë ti gbâ ti azo so awara batême lani (Kusala 2:41). Na popo ni, a yeke wara batême ti Jésus so a yôro lo kue na yâ ti Ngu ti Jourdain na ngoi so a batize lo (Matthieu 3:13, 16). Ambeni ngu na pekoni, a batize mbeni zo ti Éthiopie na lege so a yôro lo kue “na yâ ti ngu” so ayeke na terê ti lege so lo yeke hon dä.—Kusala 8:36-40.
Jésus afa so adisciple ti lo adoit ti wara batême (Matthieu 28:19, 20). Bazengele Pierre nga kue ayeda na tënë so.—1 Pierre 3:21.
Na yâ ti article so e yeke bâ:
Ti batize zo na iri ti Babâ, ti Molenge na ti yingo vulu aye ti tene nyen?
Tongana a kiri a batize mbeni zo, eskê ayeke sarango siokpari?
Batême aye ti tene nyen?
Tongana mbeni zo awara batême, lo fa polele na lê ti azo so lo changé bê ti lo ndali ti asiokpari so lo sara nga lo mû zendo ti sara ye so bê ti Nzapa aye, atâa nyen la asi. Ye so aye ti tene nga so lo yeke mä yanga ti Nzapa nga na ti Jésus na yâ ti aye kue so lo yeke sara na yâ ti fini ti lo. Azo so awara batême ayeke tambela na ndö ti lege so ayeke gue na ala na fini ti lakue lakue.
Ti yôro zo ni kue na yâ ti ngu aye ti fa so zo ni asara ambeni changement na yâ ti gigi ti lo. Na lege wa? Bible ahaka batême na lungo kuâ (aRomain 6:4; aColossien 2:12). Tongana a yôro mbeni zo na gbe ti ngu aye ti fa so lo kui na lege ti angbene sarango ye ti lo. Tongana a sigi na lo na gbe ti ngu, a fa so lo komanse mbeni fini gigi tongana mbeni Chrétien so amû terê ti lo na Nzapa awe.
Bible atene nyen na ndö ti batême ti abébé?
Bible asara pëpe tënë ti batême ti abébé. b Nga, a fa pëpe so a doit ti batize abébé.
Batizengo abébé ague nde na ye so Bible afa. Bible afa so ambeni ye ayeke dä so zo so aye ti wara batême adoit ti sara. Na tapande, zo ni adoit ti hinga akozo fango ye ti Bible nga lo sara ye alingbi na ni. Lo changé bê ti lo ndali ti asiokpari so lo sara. Nga, na yâ ti mbeni sambela, lo fa so lo mû terê ti lo na Nzapa (Kusala 2:38, 41; 8:12). Abébé apeut ti sara aye ni so ape.
Ti batize zo na iri ti Babâ, ti Molenge na ti yingo vulu aye ti tene nyen?
Jésus amû yanga na adisciple ti lo, lo tene: “Ala sara si azo aga adisciple . . . , ala batize ala na iri ti Babâ, ti Molenge na ti yingo vulu. Ala fa na ala ti bata aye kue so mbi mû yanga na ala ti sara.” (Matthieu 28:19, 20). “Na iri ti” aye ti tene so zo so aye ti wara batême ayeda na komandema so Jéhovah nga na Jésus ayeke na ni, na lo hinga so Jéhovah ayeke kota ahon Jésus nga lo hinga kua so yingo vulu ayeke sara. Na tapande, bazengele Pierre asara tënë na mbeni koli so a dü lo na bubango gere, lo tene: “Na iri ti Jésus Christ, zo ti Nazareth, tambela!” (Kusala 3:6). Na lege ti atënë so, Pierre ahinga polele ngangu so Jésus ayeke na ni so na lege ni lo sava koli so na lege ti miracle.
“Babâ” aye ti sara tënë ti Jéhovah c Nzapa. So Jéhovah la acréé aye kue, Lo mû fini na aye kue nga lo yeke Nzapa so ngangu ti lo ahon angangu kue afa so lo yeke na komandema na ndö ti aye kue.—Genèse 17:1; Apocalypse 4:11.
“Molenge” ni ayeke Jésus Christ, so amû fini ti lo ndali ti e (aRomain 6:23). Ti wara salut, a yeke nzoni e hinga nga e yeda na kota kua so Jésus ayeke na ni na yâ ti ye so Nzapa aleke na bê ti lo ti sara ndali ti azo.—Jean 14:6; 20:31; Kusala 4:8-12.
“Yingo vulu” ayeke ngangu ti Nzapa wala ngangu so lo yeke sara kua na ni ti sara na aye. d Nzapa asara lani kua na yingo vulu ti lo ti créé aye, ti mû fini na aye, ti tokua aprophète ti lo nga na ambeni zo ti tene atokua ti lo na azo, nga ti mû na ala ngangu so ala yeke na bezoin ni ti sara ye so bê ti lo aye (Genèse 1:2; Job 33:4; aRomain 15:18, 19). Nzapa asara nga kua na yingo vulu ti lo ti pusu azo so asû Bible ti sû apensé ti lo.—2 Pierre 1:21.
Tongana a kiri a batize mbeni zo, eskê ayeke sarango siokpari?
A yeke fini ye ape ti tene azo achangé bungbi ti Nzapa ti ala. Me, ka tongana na yâ ti bungbi ti Nzapa so ala yeke dä kozo ala wara batême awe? Tongana ala kiri awara batême, eskê ala sara siokpari la? Ambeni zo akiri tënë atene en, peut-être ala luti na ndö ti tënë so ayeke na aÉphésien 4:5, so atene: “Seigneur ayeke oko, mabe ayeke oko, batême ayeke oko”. Me, versê ni atene ape so apeut pëpe ti kiri ti batize mbeni zo. E tene tongaso ngbanga ti nyen?
Atënë so angoro versê ni. Atënë so angoro versê ti aÉphésien 4:5 afa so bazengele Paul aluti na ndö ti dutingo beoko ti atâ Chrétien nga na ye so ala mä na bê na ni (aÉphésien 4:1-3, 16). Mara ti beoko ni so ayeke duti dä gï tongana ala mû peko ti Seigneur so ayeke oko, Jésus Christ; aye so ala mä na bê na ni ayeke oko wala aye so ala manda na yâ ti Bible ayeke oko; nga aye so a hunda na mbeni zo ti sara kozo si lo wara batême ayeke oko.
Bazengele Paul a-encouragé azo so awara batême awe ti tene a kiri a batize ala. Paul atene tongaso ndali ti so ala wara lani batême sân ti hinga aye so Jésus afa.—Kusala 19:1-5.
Nda ti batême. Ti nzere na lê ti Nzapa, zo so aye ti wara batême adoit ti hinga atâ tënë so ayeke na yâ ti Bible (1 Timothée 2:3, 4). Tongana batême so mbeni zo awara aluti na ndö ti afango ye ti abungbi ti Nzapa so ague nde na ye so Bible afa, Nzapa ayeke yeda na batême ni so ape (Jean 4:23, 24). Atâa so zo ni ayeke na nzoni bibe na lege so lo sara ye na lege ni, me batême so lo wara ayeke “na lege ti tâ hingango ye pëpe.” (aRomain 10:2). Ti nzere na lê ti Nzapa, lo doit ti hinga atâ tënë so ayeke na yâ ti Bible, lo sara ye alingbi na aye so lo manda, lo mû terê ti lo na Nzapa nga lo kiri lo wara batême. Na yâ ti aye tongaso, so lo kiri lo wara batême, lo sara siokpari ape. Ti vrai ni, a yeke na lege ni ti tene zo ni asara tongaso.
Ambeni batême so Bible asara tënë ni
Bible asara tënë ti ambeni batême so ndani ayeke nde na batême so adisciple ti Jésus awara na lege so a yôro ala kue na yâ ti ngu. Zia e bâ ambeni tapande ni.
Batême so Jean Baptiste ayeke batize na azo lani. e AJuif nga na aprosélyte so ayeke ga lani ti tene Jean abatize ala aye ti fa so ala changé bê ti ala ndali ti so ala sara ye ague nde na ndia so Nzapa amû lani na azo ti Israël na lege ti Moïse. Batême so Jean ayeke batize na azo ni lani a-aidé ala ti hinga nga ti yeda na Messie, so ayeke Jésus zo ti Nazareth.—Luc 1:13-17; 3:2, 3; Kusala 19:4.
Batême ti Jésus. Batême so Jean abatize na Jésus ayeke lani nde. Jésus ayeke lani mbilimbili-kue nga lo sara siokpari ape (1 Pierre 2:21, 22). Batême ti lo aye lani ti tene ape so lo changé bê ti lo wala lo ‘hunda na Nzapa ti wara nzoni conscience.’ (1 Pierre 3:21). Me, a fa so lo mû terê ti lo na Nzapa tongana Messie, wala Christ ti sara ye so bê ti Nzapa aye tongana ti so a tene lani. Na ye so andu nga fini ti lo so lo mû ndali ti e.—aHébreu 10:7-10.
Ti wara batême na lege ti yingo vulu. Jean Baptiste nga na Jésus Christ asara lani tënë ti warango batême na lege ti yingo vulu (Matthieu 3:11; Luc 3:16; Kusala 1:1-5). Batême ni so ayeke nde na warango batême na iri ti yingo vulu (Matthieu 28:19). Ngbanga ti nyen la e tene tongaso?
Gï kete wungo ti adisciple ti Jésus la awara lani batême na lege ti yingo vulu. A soro ala na lege ti yingo vulu ndali ti so ala yeke sara ande kua na terê ti Jésus na yayu nga ala yeke komande tongana agbia nga na aprêtre na ndö ti sese f (1 Pierre 1:3, 4; Apocalypse 5:9, 10). Ala yeke komande ande na ndö ti adisciple ti Jésus kutu mingi so ayeke na beku ti wara fini ti lakue lakue na yâ ti Paradis na ndö ti sese.—Matthieu 5:5; Luc 23:43.
Ti batize azo na yâ ti Christ Jésus nga na yâ ti kuâ ti lo. Azo so a batize ala na lege ti yingo vulu ‘a batize ala nga na yâ ti Christ Jésus’. (aRomain 6:3). Tongaso, batême ni so abâ adisciple ti Jésus so a soro ala, so ayeke komande ande legeoko na Jésus na yayu. So a batize ala na yâ ti Jésus, ala ga amembre ti congrégation so a soro ala. Lo yeke li ni, nga ala yeke terê ni.—1 aCorinthien 12:12, 13, 27; aColossien 1:18.
A batize nga aChrétien so a soro ala ‘na yâ ti kuâ ti [Jésus].’ (aRomain 6:3, 4). So ala mû tapande ti Jésus, ala yeke mä yanga ti Nzapa na lege so ala yeke sara pëpe ye so bê ti ala aye nga ala hinga so ala yeke na beku ti ngbâ na fini ti lakue lakue na ndö ti sese ape. A yeke batize ala ande biani biani na lege ti fä na ngoi so ala kui nga a zingo ala ti wara fini na yayu tongana acréature ti yingo.—aRomain 6:5; 1 aCorinthien 15:42-44.
Batême ti wâ. Jean Baptiste atene lani na azo so ayeke mä lo, lo tene: “Lo [Jésus] la lo yeke batize ande ala na yingo vulu nga na wâ. Ye ti lo ti pengo na alê ti kobe ayeke na maboko ti lo. Lo yeke sara ande si ndo ti pikango lê ti kobe ti lo avuru kue. Lo yeke bungbi blé ti lo na yâ ti gogoro, me poro ti peko ni, lo yeke gbi ni na wâ so a lingbi ti mingo ni pëpe.” (Matthieu 3:11, 12). Tënë so aye ti fa so mbeni kangbi ayeke na popo ti batême ti wâ nga na warango batême na lege ti yingo vulu. Nyen la Jean aye ti tene na lege ti atënë so?
Blé ni aye ti sara tënë ti azo so adengi mê na tënë ti Jésus nga ala mä yanga ti lo. Ala yeke na pasa ti tene a batize ala na lege ti yingo vulu. Poro ti peko ti blé ni aye ti sara tënë ti azo so amä Jésus ape. A yeke batize ala ande na wâ, so ti tene, a yeke futi ande ala biani biani.—Matthieu 3:7-12; Luc 3:16, 17.
a Tënë “batême” na yanga ti Grec aye ti tene “ti yôro zo kue na yâ ti ngu nga ti sigi na lo na gigi.” (Vine’s Complete Expository Dictionary of Old and New Testament Words)
b Na yâ ti ambeni eglize, tongana a yeke zia iri ti mbeni bébé, a yeke sara mbeni matanga so na ngoi ni a yeke batize bébé ni na a yeke tuku ngu na li ti lo.
c Jéhovah ayeke iri ti Nzapa (Psaume 83:18). Bâ article “Jéhovah ayeke zo wa?”
d Bâ article “Yingo vulu ayeke nyen?”
e Bâ article “Qui était Jean le Baptiseur ?”
f Bâ article “Qui va au ciel ?”
g Na yâ ti Bible, tënë “batême” aye nga ti sara tënë ti ambeni ye so a yeke sara ti sukula aye, na tapande ti rincé asembe na ngu (Marc 7:4; aHébreu 9:10). Ti vrai ni, batême ni so ayeke nde mingi na batême ti Jésus nga na ti adisciple ti lo so lani a yôro ala kue na yâ ti ngu.
Bâ nga
BIBLE ATENE TI LO NYEN
Eskê abungbi ti vorongo Nzapa kue ayeke oko? Ala kue ague na zo na Nzapa?
Aye use afa kiringo tënë ti Bible na ndö ni.
AKOTA FANGO YE TI BIBLE
Eskê Nzapa ayeda na abungbi ti Nzapa kue?
Gbâ ti azo atene so même si mo sara nzapa wa, a sara ye ape.