Bible afa pëpe mbeni ndia polele tongaso na ndö ti gbingo kuâ ti mbeni zo so akui. A yeke wara pëpe na yâ ti Bible mbeni commandement so ahunda ti lu kuâ ti mbeni zo wala ti gbi ni gbingo.

 Bible asara tënë ti ambeni wakua be-ta-zo ti Nzapa so alu kuâ ti azo ti ala so akui. Na tapande, Abraham asara kue ti wara mbeni ndo ti tene lo lu lani kuâ ti wali ti lo Sara dä.​—Genèse 23:2-20; 49:29-​32.

 Bible asara nga tënë ti ambeni wakua be-ta-zo so agbi kuâ ti azo ti ala lani. Na tapande, na ngoi so a fâ Gbia Saül na amolenge ti lo ota na yâ ti mbeni bira, kuâ ti ala angbâ lani na kodro ti awato ti ala, na awato ni asara ye na lege ni ape na akuâ ni. Tongana aturugu ti Israël so ayeke be-ta-zo amä tënë ni, ala gue amû akuâ ni, ala gbi ni na ala mû abio ni alu ni (1 Samuel 31:8-13). Bible afa so ye so aturugu ti Israël asara na kuâ ti Saül na amolenge ti lo so ayeke sioni ape.​—2 Samuel 2:4-6.

 Ye so azo atene: Tongana a gbi kuâ ti mbeni zo, Nzapa apeut ti zingo zo ni ape.

 Tâ tënë ni: Nzapa apeut ti zingo mbeni zo so akui, même tongana a lu kuâ ti zo ni lungo, a gbi kuâ ti lo, zo ni akui na yâ ti la mer wala nyama ti ngonda la ate lo (Apocalypse 20:13). Nzapa so ngangu ti lo ahon angangu kue apeut ti kiri ti créé zo ni senge.​—1 aCorinthien 15:35, 38.