Bible amû zendo so: “Zo so asara ye so bê ti Nzapa aye, lo ngbâ lakue lakue.” (1 Jean 2:17). Nyen la Nzapa aye ti tene mo sara?

•   Hinga Nzapa nga na Molenge ti lo Jésus. Na yâ ti mbeni sambela so lo tene na Nzapa, Jésus atene: “Ti wara fini ti lakue lakue, a lingbi ala gi ti hinga mo, mo oko tâ Nzapa, nga na lo so mo tokua lo, Jésus Christ.” (Jean 17:3). So a tene a lingbi e “gi ti hinga” Nzapa na Jésus, a ye ti tene nyen? E peut ti gi ti hinga ala na lege so e yeke diko Bible nga e yeke sara ye alingbi na atënë so a tene na yâ ni. a Bible afa na e pensé ti Jéhovah Nzapa, so ayeke Zo so acréé aye nga Zo so amû fini na zo (Kusala 17:24, 25). Bible asara nga tënë ti Molenge ti lo Jésus, so afa lani “atënë so amû na zo fini ti lakue lakue.”​—Jean 6:67-69.

•   Mä na bê na sandaga ti kuâ ti Jésus. Jésus aga lani na sese ti “sara kua na azo na ti mû fini ti lo tongana ye so a futa ti zi azo mingi.” (Matthieu 20:28). Sandaga ti kuâ ti Jésus amû lege na azo ti wara fini ti lakue lakue na yâ ti Paradis na ndö ti sese (Psaume 37:29). b Jésus atene: “Nzapa andoye tâ azo ti dunia so mingi si lo mû gï oko Molenge ti lo si zo kue so amä na bê na lo, a lingbi ti futi lo pëpe, me lo yeke na fini ti lakue lakue.” (Jean 3:16). Hinga so, ti mä gï na bê na Jésus alingbi ape. E doit ti fa so e mä na bê na lo na lege so e yeke soro ti sara ye alingbi na aye so lo fa nga ti sara ye alingbi na ye so bê ti Babâ ti lo aye.​—Matthieu 7:21; Jacques 2:17.

•   Lë kpengba songo na Nzapa. Nzapa aye si e ga nduru na lo nga e ga kamarade ti lo (Jacques 2:23; 4:8). Nzapa ayeke dä lakue. Lo yeke kui ande lâ oko ape, na lo ye si akamarade ti lo nga kue aduti na fini lakue lakue tongana ti lo. Na yâ ti Mbeti ti lo, Nzapa afa ye so lo ye ndali ti azo so ayeke gi lo, lo tene: “Zia si ala ngbâ na fini lakue lakue.”​—Psaume 22:26.

 Ye so azo atene: Fini ti lakue lakue ayeke fun ande sen na hôn ti e.

 Tâ tënë ni: Zendo ti fini ti lakue lakue alondo na Nzapa, so aye e nga lo ye si e duti na ngia (Jacques 1:17; 1 Jean 4:8). Lo hinga so, ti tene e duti na ngia, e yeke na bezoin ti sara ambeni pendere kua (Zo-ti-fa-tene 3:12). Nzapa atene so azo so ayeke duti ande na fini lakue lakue na ndö ti sese ayeke duti na mbeni fini so ala yeke na ngia na yâ ni, ala yeke sara apendere kua so ayeke ga na ye ti nzoni na ala nga na azo ti ala so ala ye ala.​—Ésaïe 65:22, 23.

 Na ndö ni, azo so ayeke duti ande na fini lakue lakue ayeke ngbâ ande ti manda afini ye na ndö ti Nzapa so acréé ala, nga na gbâ ti apendere ye so lo créé. Lo zia nzara ti dutingo na fini ti lakue lakue na yâ ti e azo, nga na nzara ti manda ye na ndö ti lo; me e azo e lingbi “lâ oko pëpe ti hinga kua so tâ Nzapa asara, ti londo na tongo nda ni juska na ngoi so lo hunzi ni.” (Zo-ti-fa-tene 3:10, 11). Tongaso, azo so ayeke wara ande fini ti lakue lakue ayeke duti ande lakue na apendere ye mingi ti manda nga ti sara.