Awandara ayeke na aye so afa na ala biani so Jésus ayeke lani dä. Na ndö ti atënë so awasungo mbaï so ayeke na fini na ngoi ti akozo Chrétien nga na yâ ti angu 100 so aga na pekoni atene na ndö ti Jésus na akozo Chrétien, mbeni bakari (Encyclopædia Britannica) so a sigi na ni na ngu 2002 atene: “Atënë so azo nde nde so atene afa so na ngoi ti giriri, même awato ti aChrétien adë kite kete pëpe so Jésus ayeke lani dä biani; a yeke gï na hunzingo ti angu 1700, na yâ ti angu 1800 nga na tongo nda ti angu 1900 si ti kozo ni ambeni zo ato nda ti dë kite so Jésus ayeke lani dä biani, atâa so ala yeke pëpe na anzoni nda ti tënë ti sara ni.”

 Na ngu 2006, mbeni mbeti (Jesus and Archaeology) atene: “Laso, mbeni kota wandara oko tongaso adë kite ape so mbeni Juif so iri ti lo ayeke Jésus . . . ayeke lani dä; yeke yeke e komanse ti hinga gbâ ti aye na ndö ti aye so lo sara lani nga na afango ye ti lo.”

 Bible afa so Jésus ayeke tâ zo biani. Lo fa iri ti akotara ti lo, ti babâ na mama ti lo nga na ti aita ti lo (Matthieu 1:1; 13:55). Lo fa nga iri ti akota zo ti komande ti ngoi ti Jésus (Luc 3:1, 2). Atënë ni so amû lege na azo ti gingo nda ti ye ti bâ wa la afango ye ti Bible ayeke tâ tënë.