“Fini Jérusalem” ayeke mbeni tënë so a wara ni fani use na yâ ti Bible. A ye ti sara tënë ti mbeni gbata so areprésenté groupe ti adisciple ti Jésus so ayeke gue na yayu ti komande na terê ti Jésus na yâ ti Royaume ti Nzapa (Apocalypse 3:12; 21:2). Bible afa so a peut nga ti iri groupe ni so wali ti Christ.

1.   Fini Jérusalem ni ayeke yayu. Lakue tongana Bible asara tënë ti Fini Jérusalem, a tene so a londo na yayu si a descend, na a-ange la ayeke bata ayanga ti gbata ni (Apocalypse 3:12; 21:2, 10, 12). Nga, so gbata ni akono mingi so aye ti fa so Fini Jérusalem ni ayeke na sese ape. A tene so forme ni ayeke tongana ti cube; yongo ni alingbi “stade 12000”. a (Apocalypse 21:16). Yongo ti aterê ni na nduzu asara nduru na kilomètre 560 tongaso.

2.   Fini Jérusalem ni ayeke mbeni groupe ti adisciple ti Jésus, wala wali ti Christ. A iri Fini Jérusalem ni ‘wali so amû koli fini fini, [wala] wali ti Molenge ti taba ni.’ (Apocalypse 21:9, 10). Na yâ ti tënë so, Molenge ti taba ni aye ti sara tënë ti Jésus Christ (Jean 1:29; Apocalypse 5:12). “Wali ti Molenge ti taba ni,” so ti tene wali ti Christ, aye ti sara tënë ti aChrétien so ayeke gue ande na terê ti Jésus na yayu. Bible ahaka songo so ayeke na milieu ti Jésus na aChrétien so na songo ti mbeni koli na wali ti lo (2 aCorinthien 11:2; aÉphésien 5:23-25). Na ndö ni, a tene so na ndö ti atênë ti fondation ti Fini Jérusalem ni “a sû iri 12 na ndö ni, iri ti abazengele 12 ti Molenge ti taba ni.” (Apocalypse 21:14). Tënë so amû lege na e ti hinga biani Fini Jérusalem ni, ndali ti so a leke aChrétien so a soro ala ti gue na yayu “na ndö ti gere ti da ni so ayeke abazengele nga na aprophète”.​—aÉphésien 2:20.

3.   Fini Jérusalem ni ayeke mbage ti mbeni gouvernement. Jérusalem ti ândö ayeke lani kota gbata ti Israël, place so Gbia David, molenge ti lo Salomon nga na ahale ti ala akomande dä “na ndö ti trône ti Jéhovah”. (1 Chronique 29:23). Tongaso, Jérusalem so a iri ni “gbata so ayeke nzoni-kue,” aye ti sara tënë ti komandema ti Nzapa na lege ti ahale ti David (Néhémie 11:1). Fini Jérusalem, so a iri ni nga “gbata so ayeke nzoni-kue” aye ti sara tënë ti azo so ayeke gue na terê ti Jésus na yayu ti “komande tongana agbia na ndö ti sese.”​—Apocalypse 5:9, 10; 21:2.

4.   Fini Jérusalem ni ayeke ga ande na aye ti nzoni na azo na sese. A tene so Fini Jérusalem ni “alondo na mbage ti Nzapa na yayu si ayeke descend,” ye so aye ti fa so Nzapa ayeke sara kua na Fini Jérusalem ni ti sara ambeni ye ge na sese (Apocalypse 21:2). Tënë so amû lege na e ti tingbi Fini Jérusalem ni na Royaume ti Nzapa, so Nzapa ayeke sara kua na ni ti sara ye so bê ti lo aye “na yayu legeoko nga na ndö ti sese.” (Matthieu 6:10). Bâ ambeni ye so Nzapa ayeke sara ande ndali ti azo na sese la:

   •   A yeke zi ande siokpari. “Mbeni kota ngu so amû fini na zo” alondo na Fini Jérusalem ni asuä na a-arrosé “akeke so amû fini na zo” so “ayeke ti sava na kobela ti amara.” (Apocalypse 22:1, 2). Savango zo na lege ti yingo nga na lege ti mitele so ayeke sara si siokpari ayeke duti ande dä encore ape na a yeke zi lege na azo ti ga nzoni-kue, tongana ti so Nzapa aye lani na tongo nda ni.​—aRomain 8:21.

   •   A yeke sara ande si nzoni songo aduti na milieu ti e na Nzapa. Siokpari akangbi e azo na Nzapa (Ésaïe 59:2). So siokpari ayeke duti ande dä encore ape so, prophétie ti Bible so ayeke ga ande biani tâ tënë, prophétie ni atene: “Tente ti Nzapa ayeke na azo, Nzapa ayeke sara ande kodro na ala, na ala yeke duti azo ti lo. Nga Nzapa wani ayeke duti ande na ala.”​—Apocalypse 21:3.

   •   A yeke sara ande si pasi nga na kuâ ahunzi. Na gbe ti Royaume ti Nzapa, Nzapa ayeke “mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.”​—Apocalypse 21:4.