Nzapa ayeke lakue gï dä na ndo kue?

JOUÉ NI

Kiringo tënë ti Bible

Nzapa alingbi ti bâ ye kue nga lo lingbi ti sara ye so bê lo aye na ndo kue (aProverbe 15:3; aHébreu 4:13). Me, Bible afa ape so Nzapa ayeke lakue gï dä na ngoi kue nga na ndo kue. Ye oko, Bible afa Nzapa tongana zo so ayeke na mbeni mbilimbili ndo.

Terê ti Nzapa: Nzapa ayeke mbeni yingo (Jean 4:24). Azo apeut ti bâ lo ape (Jean 1:18). Avision so a sû na yâ ti Bible na ndö ti Nzapa, a fa lo na mbeni mbilimbili ndo. A fa lâ oko ape so lo yeke na ndo kue (Ésaïe 6:1, 2; Apocalypse 4:2, 3, 8).
Ndo so Nzapa ayeke dä: Nzapa ayeke na yayu, a yeke nde na ndo so lê ti zo apeut ti bâ ni. Nzapa ayeke ‘kâ na yayu, ndo so lo yeke dä.’ (1 aGbia 8:30). Bible atene so na mbeni ngoi acréature ti yingo “aga aluti na gbele Jéhovah,” a a fa so Nzapa ayeke na mbeni mbilimbili ndo (Job 1:6).

Tongana Nzapa ayeke lakue gï dä na ndo kue ape, eskê lo lingbi ti pensé biani na mbi?

En. Nzapa ayeke pensé mingi na zo oko oko kue. Atâa so Nzapa ayeke na yayu, lo yeke bâ na ndö ti sese azo so aye biani ti zia ngia na bê ti lo, nga lo yeke sara mbeni ye ndali ti ala (1 aGbia 8:39; 2 aChronique 16:9). Bâ tongana nyen la Jéhovah afa so lo yeke pensé na azo so ayeke voro lo na bê ti ala kue:

Tongana mo yeke sambela: Jéhovah alingbi ti mä sambela ti mo na ngoi so mo yeke tene ni (2 aChronique 18:31).
Tongana kota vundu ahon ndö ti mo: “Jéhovah ayeke nduru na azo so mbeni ye amû vundu na ala ngangu; lo sö azo so bê ti ala awoko kue.” (Psaume 34:18).
Tongana mo bezoin fango lege: Jéhovah ‘ayeke sara si mo hinga ti bâ yâ ti aye nzoni nga lo yeke fa na mo lege’ na lege ti Bible (Psaume 32:8).

Atënë so ayeke na lege ni ape na ndö ti Nzapa so a tene lo yeke ndo kue

Tënë so ayeke na lege ni ape: Nzapa ayeke na ndo kue na yâ ti création.

Tâ tënë ni: Ndo so Nzapa ayeke dä ayeke pëpe na ndö ti sese wala na mbeni ndo so lê ti zo alingbi ti bâ ni (1 aGbia 8:27). A yeke tâ tënë so atongoro nga na ambeni créature “ayeke fa na gigi gloire ti Nzapa”. (Psaume 19:1). Me, Nzapa ayeke lango pëpe na yâ ti mbeni mbage ti création so lê abâ ni, legeoko tongana ti so mbeni zo ti sarango dessin ayeke lango pëpe na yâ ti tableau so lo sara. Ye oko, mbeni tableau ayeke fa na e ye na ndö ti zo so aleke ni. Legeoko nga, dunia so lê abâ ayeke fa na e “asarango ye ti terê ti Nzapa so lê abâ ni pëpe”, aye tongana ngangu ti lo, ndara ti lo nga na ndoye ti lo (aRomain 1:20).

Tënë so ayeke na lege ni ape: Nzapa adoit ti duti lakue na ndo kue tongaso si lo hinga ye kue nga lo duti na ngangu na ndö ti aye kue.

Tâ tënë ni: Yingo vulu ti Nzapa ayeke ngangu so lo yeke sara na aye. Na lege ti yingo vulu, Nzapa alingbi ti bâ ye nga ti sara ye kue, na ndo kue nga na ngoi kue sân ti tene lo duti dä na ndo ni (Psaume 139:7).

Tënë so ayeke na lege ni ape: Psaume 139:8 afa so Nzapa ayeke lakue na ndo kue, a tene: “Tongana mbi monté na yayu, mo yeke kâ; nga tongana mbi leke gbogbo ti mbi na yâ ti Dû ti kuâ, mo yeke kâ.”

Tâ tënë ni: Versê so asara pëpe tënë ti ndo so Nzapa ayeke dä. Versê ni afa na lege ti suma-tene so mbeni ndo oko ayeke dä ape so ayo mingi na Nzapa ti sara mbeni ye ndali ti e.

a Bible afa so iri ti Nzapa ayeke Jéhovah.