Ên-ën. Bible atene ape so sese ayeke plat plat. a Bible ayeke pëpe mbeni mbeti ti science. Nga, atënë ti Bible ague nde pëpe na tënë ti science. Atënë so Bible atene, “zo alingbi lakue ti zia bê ti lo dä, laso nga lakue lakue.”​—Psaume 111:8.

•  Nyen la Bible aye ti tene tongana lo sara tënë ti “andangoro osio ti sese”?

•  Nyen la mbeni tara so Zabolo atara na Jésus afa na e?

 Tongana Bible asara tënë ti “andangoro osio ti sese” nga na “nda ti sese” alingbi e comprendre ni gï tongana ti so e diko so ape; a yeke ga ande mo bâ mo tene sese ayeke carré carré wala fin ni ayeke dä (Ésaïe 11:12; Job 37:3). Atënë ni so ayeke gï mbeni fason ti sarango tënë la; a ye ti sara tënë ti lê ti sese kue. Legeoko nga, tongana Bible asara tënë ti “mbage ti est nga na ouest, nord na sud,” lo ye ti sara nga gï tënë ti lê ti sese kue la.​—Luc 13:29.

 Tënë ti hébreu so a traduire ni na “andangoro” wala “nda ti” akpa mbeni tënë so alondo na tënë so atene “aile.” Mbeni bakari (Gran Diccionario Enciclopédico de la Biblia) atene so tënë ti hébreu ni so ‘aye gï ti sara tënë ti aile ti anyama ape, me apeut nga ti sara tënë ti yanga ti mbeni ndo.’ Bakari ni akiri afa so na tapande a sara kua na tënë ni so na Job 37:3 ti sara tënë ti “mbeni ndo so ayo mingi wala ti fin ti mbeni ndo.”

 Ti tara Jésus, “Zabolo ague na lo na ndö ti mbeni hoto so ayo na nduzu mingi. Lo fa na lo aroyaume kue ti dunia so nga na gloire ti ala.” (Matthieu 4:8). Ambeni zo atene so mbaï ti Bible so aye ti fa so sese ayeke plat, na tongana zo aduti na mbeni place, lo peut ti bâ lê ti sese kue. Me, na bango ni tënë ti Bible so atene “mbeni hoto so ayo na nduzu mingi” aye ti sara pëpe tënë ti mbeni ndo so ayeke dä biani. Zia e bâ ngbanga ti nyen la e tene tongaso.

•   Na ndö ti sese, mbeni hoto tongaso ayeke dä ape, so mo peut ti luti na ndö ni na mo bâ aroyaume ti sese kue.

•   Zabolo afa na Jésus aroyaume ti sese kue, na lo fa nga na lo “gloire ti ala.” Zo apeut ti ngbâ ayo mingi, na lo bâ gloire ti aroyaume ape. Tongaso na bango ni, Zabolo asara kua na mbeni ye tongana vision ti fa aye ni so na Jésus. A yeke tongana ti so mbeni zo asara kua na projecteur nga na écran ti fa afoto ti ando nde nde na mbeni zo.

•   Gï na ndö ti oko mbaï ni so, Luc 4:5 atene so “gï na yâ ti kete ngoi, [Zabolo a]fa na [Jésus] aroyaume kue so ayeke na ndö ti sese so azo ayeke dä.” Lê ti zo apeut ti bâ aye so kue gï na yâ ti kete ngoi ape. Ye so aye ti fa so tara so Zabolo atara na Jésus so, lo sara ni na mbeni lege so lê ti e azo apeut ti bâ ni ape.