Bible atene: “Azo so angbâ na fini ahinga so mbeni lâ ala yeke kui, me azo so akui awe ahinga ti ala ye oko pëpe.” (Zo-ti-fa-tene 9:5; Psaume 146:4). Tongaso, tongana e kui, e yeke encore na fini ape. Azo so akui apeut ti pensé ape, ti sara mbeni ye ape nga ti hinga mbeni ye ape.

“Mo yeke kiri ande na fuku ti sese”

 Na yâ ti mbeni tënë so Nzapa atene na Adam, Lo fa ye so ayeke si na e tongana e kui. Ndali ti so Adam ake lani yanga ti Nzapa, Nzapa atene na lo atene: “Mo yeke fuku ti sese, na mo yeke kiri ande na fuku ti sese.” (Genèse 3:19). Kozo si Nzapa acréé Adam “na fuku ti sese,” Adam ayeke lani dä ape (Genèse 2:7). Legeoko nga, na ngoi so Adam akui, lo kiri na fuku ti sese na lo yeke na fini encore ape.

 Mara ti ye ni so ayeke si na azo laso tongana ala kui. Bible afa ye so ayeke si na azo nga na anyama, atene: “A sara ala kue na fuku ti sese, na ala kue ayeke kiri na fuku ti sese.”—Zo-ti-fa-tene 3:19, 20.

Tongana zo akui aye ti tene ape so ti lo awe la

 Fani mingi, Bible ahaka kuâ na lango (Psaume 13:3; Jean 11:11-14; Kusala 7:60). Tongana mbeni zo ayeke na yâ ti kota lango, lo yeke hinga ye so ayeke passé na terê ti lo ape. Legeoko nga, azo so akui ahinga ye oko ape. Me, Bible atene so Nzapa apeut ti zingo azo na kuâ tongana ti so a yeke zingo zo na lango, na lo yeke kiri na ala encore na fini (Job 14:13-15). Tongana zo akui aye ti tene ape so ti lo awe, ndali ti so Nzapa ayeke zingo ande azo so akui.