Mo tene ti mo nyen?

•   Eskê a yeke sioni ti bâ horoscope wala ti bâ azo so ayeke fa ye so ayeke si na zo kekereke?

•   Eskê ambaï so andu aye ti magie ayeke gï mbeni senge fason ti fa kangbi so ayeke na popo ti anzoni zo nga na asioni zo, wala ayeke mbeni ye so e doit ti sara hange na ni?

 Article so ayeke fa ngbanga ti nyen la aye ti magie akpa mbeni nzoni ye nga ngbanga ti nyen la mo doit ti sara hange na ni.

•  Ngbanga ti nyen la aye ti magie akpa mbeni nzoni ye?

•  Ngbanga ti nyen la a lingbi mo sara hange na ni?

•  Ye so mo peut ti sara

•  Amba ti mo atene ti ala nyen

 Azo ayeke wara laso gbâ ti nginza tongana ala sara tënë ti aye ti magie na yâ ti afilm ti ala, na yâ ti a-émission na télé, na yâ ti ajeu vidéo wala na yâ ti abuku. Ye so asara si amaseka akomanse ti ye aye so andu tënë ti avampire, adémon, nga na ti likundu. Ngbanga ti nyen la ala ye aye ni so? Ambeni raison ni ayeke so:

•   Ala ye ti hinga ambeni ye: Ala ye ti hinga wala a-ange na adémon ayeke biani dä

•   Ala yeke gi bê na ndö ti gigi ti ala: Ala ye ti gi ti hinga nyen la ayeke si ande na ala na yâ ti gigi ti ala

•   Ala ye ti causé: Ala yeke gi ti sara tënë na mbeni zo so ala ye lo mingi so akui

 Araison ni so kue ayeke sioni ape. Na tapande, a yeke sioni ape ti pensé na gigi ti e ti kekereke wala tongana e bâ so mbeni zo ti e so akui amanke e mingi. Me ambeni ye ayeke dä so a lingbi mo hinga ni.

 Bible awa e ti sara hange na aye kue so andu tënë ti magie, sarango yorö nga na ambeni ye ni nde. Na tapande, lo tene:

 “A lingbi a wara na popo ti ala pëpe . . . zo ti bango mbadi, wala zo ti sarango magie, wala zo ti fango ye so ayeke si kekereke, wala zo ti yorö, wala zo ti kangango amba ti lo na yorö, wala zo so ague abâ zo ti sarango tënë na yingo ti akuâ, wala zo so ague abâ zo ti fango aye so ayeke si ande na zo, wala zo so ayeke hunda tënë na akuâ. Zo so asara aye so, lo yeke sioni mingi na lê ti Jéhovah.”​—Deutéronome 18:10-​12.

 Ngbanga ti nyen la Bible ake aye ni so na kuru go?

•   Tongana e ndu aye ti magie, a fa so e yeke sara songo na asioni yingo nga e yeke mû mbage ti ala. Bible afa so ambeni ange ake lani yanga ti Nzapa na ala ga awato ti lo (Genèse 6:2; Jude 6). Asioni ange so, so a-iri ala adémon, ayeke handa azo na lege ti azo so atene ala yeke sara tënë na yingo ti akuâ, azo so ayeke diko aye so ayeke si na zo kekereke, azo ti bingo zeke nga na azo ti gingo nda ti ye na lege ti atongoro. Tongana e sara aye ni so wala e gue e bâ azo so ayeke sara ni, andâ e yeke sara kamarade na azo so ayeke awato ti Nzapa la.

•   Tënë ti magie ayeke pusu azo ti mä na bê na tënë ti mvene so atene zo apeut ti fa ye so ayeke si kekereke. Me gï Nzapa oko la apeut ti tene: “Na tongo nda ni, mbi fa tongana nyen ye ni ayeke hunzi, nga ngbene ye giriri mbi fa aye so ade ti si pëpe.”​—Ésaïe 46:10; Jacques 4:13, 14.

•   Tënë ti magie ayeke pusu azo ti mä na bê na tënë ti mvene so atene akuâ apeut ti sara tënë na azo so angbâ na fini. Me Bible atene: “Azo so akui awe ahinga ti ala ye oko pëpe . . . Na yâ ti Dû ti kuâ . . . kusala, lekengo kapa ti sara ambeni ye, hingango ye wala ndara ayeke dä pëpe.”​—Zo-ti-fa-tene 9:​5, 10.

 A yeke ndali ti araison so e londo ti bâ so la aTémoin ti Jéhovah ake aye kue so andu aye ti magie. Ala ke nga afilm, ajeu vidéo nga na ambeti kue so na yâ ni asara tënë ti avampire, ti atoro ti akuâ nga na ti aye ti ndima. Mbeni maseka-wali so iri ti lo ayeke Maria atene: “Tongana mbeni ye so andu ye ti adémon ayeke na yâ ti mbeni film, mbi yeke bâ ni ape.” a

•   Leke na bê ti mo ti “bata nzoni conscience” na lê ti Jéhovah na lege so mo ke ti sara magie nga mo ke aye kue so andu aye ti magie, na tapande afilm, abia, ajeu vidéo nga na ambeti.​—Kusala 24:16.

•   Bi aye kue so mo yeke na ni so andu aye ti magie. Diko Kusala 19:19, 20 na bâ pendere tapande so akozo Chrétien azia na e.

 Grisa ape: Tongana mo ke aye kue so andu tënë ti magie, na tapande afilm, abia nga na ambeti so aye ti magie ayeke na yâ ni, mo yeke fa polele so mo mû mbage ti Jéhovah. Tongana mo sara tongaso, mo yeke zia ngia na bê ti lo.​—aProverbe 27:11.