“Kota nzobe ti mbi alingbi na mo awe; ndali ti so na ngoi so mo woko, ngangu ti mbi aga ye so alingbi kue.”—2 aCorinthien 12:9, Mbeti ti Nzapa ti fini dunia.

 “Grâce ti Mbi alingbi na mo, teti na ndo so ngangu ayeke pëpe, ngangu ti Mbi alingbi kue.”—2 aCorinthien 12:9, La Sainte Bible en Sango.

 Nzapa amû zendo so lo yeke mû na bazengele Paul ngangu so lo yeke na bezoin ni ti gbu ngangu na yâ ti atara nga na akpale so lo wara.

 “Kota nzobe ti mbi alingbi na mo awe.” A peut nga ti kiri na peko ti tënë so Nzapa atene ti kiri tënë na asambela so Paul atene ni fani mingi na “nzoni bê ti mbi ayeke ye kue so mo bezoin ni.” Na mbeni mbage, kota nzobe ti Nzapa apeut ti aidé Paul ti gbu ngangu na yâ ti atara so lo wara. Na lege wa? Tënë so a kiri peko ni na “kota nzobe,” wala “grâce” aye ti sara tënë ti mbeni cadeau so e lingbi na ni ape so Nzapa amû ni na e na bê ti lo kue. Atënë so Paul asû lani afa so lo wara aye ti nzoni mingi na lege ti kota nzobe ti Nzapa. Atâa so Paul ayeke lani zo ti sarango ye ti ngangu na azo, Nzapa amû na lo ngangu so lo yeke na bezoin ni ti changé asarango ye ti lo nga ti aidé ambeni zo ti ga aChrétien (1 aCorinthien 15:9, 10; 1 Timothée 1:12-14). Paul apeut ti sara confiance na Nzapa ti aidé lo ti hon ndö ti akpale kue so lo tingbi na ni.

 “Na ngoi so mo woko, ngangu ti mbi aga ye so alingbi kue.” Jéhovah a adabe ti Paul so ngangu ti Lo ayeke sara kua na ndö ti azo so awoko nga so ayeke mbilimbili-kue ape (2 aCorinthien 4:7; 12:8). Tongana aChrétien ahinga alimite ti ala na ala hunda na Jéhovah ti aidé ala, ala yeke zia si ngangu ti Nzapa asara kua na ndö ti ala (aÉphésien 3:16; aPhilippien 4:13). A yeke tongaso la ngangu ti Nzapa ayeke sara kua na ndö ti azo so awoko.

 Na gbe ti yingo vulu ti Nzapa, Paul asû lani mbeni lettre na aChrétien ti Corinthe na ngu 55. Na yâ ti ndangba mbage ti lettre so, lo fa so lo yeke na ngangu ti duti mbeni bazengele. Lo bâ so lo bezoin ti défendre tënë ni ndali ti so ambeni zo so atene ala yeke awafango ye akasa lo lani, peut-être ndali ti fason ti sarango tënë ti lo wala ye so ala bâ.—2 aCorinthien 10:7-10; 11:5, 6, 13; 12:11.

 Ti tene Paul agbu koko ti lo wani, lo tene so na lege ti ngangu ti lo wani lo peut ape ti sara kua ti lo ti fango tënë nga ti gbu ngangu na yâ ti atara so lo wara (2 aCorinthien 6:4; 11:23-27; 12:12). Na yâ ti chapitre 12, lo sara tënë ti ‘mbeni kî na yâ ti terê ti lo,’ na bango ni so ye ni aninga na terê ti lo asara si lo yeke lani na vundu mingi (2 aCorinthien 12:7). Atâa so Paul afa kpale ti lo ni ape, lo leke na bê ti lo ti gbu ngangu na yâ ni, grâce na aide ti Nzapa.

 Laso, aChrétien apeut nga ti wara akpale na a peut ti sara ye ti ngangu na ala. Bê ti ala adë ti hinga so ngangu ti Nzapa apeut ti aidé ala ti gbu ngangu, atâa atara wa la ala tingbi na ni. Tongana ti Paul, mo peut ti tene na bê ti mo kue, mo tene: ‘Na ngoi so mbi woko, a yeke na ndembe ni so la si mbi yeke na ngangu.’—2 aCorinthien 12:10.

 Bâ nduru vidéo so ti bâ ambeni ye so ayeke na yâ ti Use mbeti na aCorinthien.