AVERSÊ TI BIBLE SO A FA NDA NI

A-Romain 10:13: “Fade a sö zo so adi iri ti Seigneur.”

JOUÉ NI

“A yeke sö ande zo kue so adi iri ti Jéhovah.”—aRomain 10:13, Mbeti ti Nzapa ti fini dunia.

“A yeke sö ande zo kue so adi iri ti Seigneur.”—aRomain 10:13, La Sainte Bible en sango.

Nda ti versê ti aRomain 10:13

Nzapa ayeke sara kangbi na popo ti azo ape; lo mû lege na azo kue ti sö fini ti ala nga ti wara fini ti lakue lakue, atâa mara ti ala wala kodro ti ala ayeke so wa, wala ala yeke wayere wala zo ti mosoro. Me ti wara aye ti nzoni so, a lingbi e di iri ti Jéhovah, so ayeke iri ti Nzapa wani, lo so ngangu ti lo ahon angangu kue. a—Psaume 83:18.

Na yâ ti Bible, tënë so a tene “di iri ti Jéhovah” aye ti tene ye mingi ahon gï ti hinga iri ti Nzapa nga ti sara kua na ni na ngoi so e yeke voro lo (Psaume 116:12-14). A ye nga ti tene ti sara confiance na Nzapa nga ti kpe na mbage ti lo ti wara mungo maboko.—Psaume 20:7; 99:6.

Iri ti Nzapa ayeke lani kota ye mingi na lê ti Jésus Christ. Akozo tënë ti yâ ti sambela so lo fa na adisciple ti lo lani ayeke: “Babâ ti e so mo yeke na yayu, zia a sara si iri ti mo aga nzoni-kue.” (Matthieu 6:9). Jésus afa nga so tongana e ye ti wara fini ti lakue lakue, a lingbi e gi ti hinga Jéhovah, e mä yanga ti lo nga e ndoye lo.—Jean 17:3, 6, 26.

Ngbanga ti nyen la e lingbi ti tene so Jéhovah la a iri lo “Seigneur” na aRomain 10:13 na yâ ti La Sainte Bible en sango? Ngbanga ti so versê ni so ayeke mbeni tënë ti yâ ti versê ti Joël 2:32 so na yanga ti Hébreu so a sû ândö na ni a yeke wara iri Jéhovah dä, me pëpe tënë “Seigneur” so ayeke gï titre ti Nzapa. b

Atënë so angoro versê ti aRomain 10:13

Na aRomain chapitre 10, Bible afa so ti tene mbeni zo anzere na lê ti Nzapa, a lingbi lo mä na bê na Jésus Christ (aRomain 10:9). Gbâ ti aversê so ayeke na yâ ti Ancien Testament aye peko ti tënë ni so. Mbeni zo ayeke fa so lo yeke na mabe na lege so lo yeke “fa tënë dandara,” so ti tene nga lo yeke fa nzoni tënë ti salut na azo so amä na bê pëpe. Ye so ayeke mû lege na ambeni zo nga ti mä na bê si ala wara fini.—aRomain 10:10, 14, 15, 17.

Diko aRomain chapitre 10 na bâ akete tënë so afa nda ti atënë ti aversê ni nga na aversê so a tokua zo dä.

a Iri ti Nzapa asigi fani 7 000 na yâ ti angbene manuscrit ti Bible. A sû iri ti Nzapa na yanga ti Hébreu na agere-mbeti osio, so a iri ni Tétragramme. Mingi ni, a kiri peko ni na sango na “Jéhovah,” me ambeni wandara ti Bible aye ti ala ti kiri peko ni na “Yahweh.”

b Kite ayeke dä ape so aChrétien so asû ambeni mbage ti Bible adoit ti bata lani iri ti Nzapa angbâ na place ni tongana ala yeke tene peko ti ambeni versê ti “Ancien Testament” so iri ti Nzapa ayeke dä. Mbeni bakari (The Anchor Bible Dictionary Volume 6, lembeti 392) atene: “Ambeni ye afa biani so, na ngoi so a sû ambeti ti yâ ti Fini Testament kpâ, agere-mbeti osio ti iri ti Nzapa, so ti tene Yahweh, asigi na yâ ti ambeni versê ni so a mû atënë ti yâ ni na yâ ti Ngbene Testament wala aversê ni kue so a mû atënë ti yâ ni na yâ ti Ngbene Testament.” Ti wara ambeni sango na ndö ni gue na yâ ti Mbeti ti Nzapa ti fini dunia na Appendix A5 so li ni ayeke “Iri ti Nzapa na yâ ti mbage ti Mbeti ti Nzapa so aChrétien asû ândö na Grec.”