“Mo yeke bata azo so azia bê ti ala kue na mo; mo yeke sara si ala duti lakue na siriri, ndali ti so ala zia bê ti ala kue na mo.”—Ésaïe 26:3, Mbeti ti Nzapa ti fini dunia.

 “Zo so abi bê ti lo na Mo, fade Mo bata lo na tâ siriri teti lo zia bê ti lo na Mo.”—Ésaïe 26:3, La Sainte Bible en Sango.

 Na lege ti atënë ti dengo bê so, prophète Ésaïe afa so Nzapa ayeke bata azo so azia bê ti ala kue na lo. Lo yeke sara ni na lege so lo yeke aidé ala ti tene ala sentir terê ti ala bien nga ala duti na siriri.

 “Mo yeke bata azo so azia bê ti ala kue na mo.” Mbage ti versê so asara tënë ti azo so aleke na bê ti ala ti zia bê ti ala kue na Jéhovah a Nzapa na ngoi kue. Azo so azia bê ti ala na Nzapa ahinga so ala dépend na lo. Na tapande, ala yeke zia bê ti ala na ndö ti apensé ti ala wani ape na ngoi so ala yeke mû akota desizion. Me ahon ti sara tongaso, ala yeke gi ti hinga bango ndo ti Nzapa na yâ ti aye kue so ala yeke sara (aProverbe 3:5, 6). Ala yeke gi ti hinga bango ndo ti Nzapa na ndö ti mbeni ye na lege so ala yeke diko Tënë ti lo, Bible, nga ala yeke gbu li nzoni na ndö ti ye so ala diko (Psaume 1:2; 119:15). Tongana ala yeke na yâ ti mbeni ngangu kpale, ala yeke sambela Jéhovah na bê ti ala kue ti tene lo mû maboko na ala (Psaume 37:5; 55:22). Na sarango tongaso, ala fa so ala sara confiance na Nzapa, na ye ti peko ni ayeke so lo yeke mû na ala siriri.

 “Mo yeke sara si ala duti lakue na siriri.” Na yâ ti Mbeti ti Nzapa so a sû ândö na Hébreu, a kiri na ndö ti tënë ti “siriri” ni so fani use; tongaso, a peut ti kiri na peko ti tënë ni so na ti “duti lakue na siriri,” “tâ siriri,” wala “siriri so alingbi kue.” So ti tene, azo so azia bê ti ala kue na Jéhovah ayeke na ngia nga na siriri, na siriri ti bê ni so adépend pëpe na dutingo ti ala (Psaume 112:7; 119:165). Siriri ni so ayeke ga na lege ti kpengba songo so zo ayeke na ni na Jéhovah nga ti sara kue ti sara ye so lo ye.—aProverbe 3:32; Ésaïe 48:18.

 Ti “duti lakue na siriri” aye pëpe ti tene so Nzapa ayeke zi akpale ti awakua ti lo kue si ala gi bê ti ala ape (1 Samuel 1:6, 7; Job 6:1, 2; Psaume 31:9). Me, lo yeke aidé ala ti gbu ngangu na yâ ti akpale so ala wara (Ésaïe 41:10, 13). Lo yeke kiri tënë na asambela ti ala, na lege so lo yeke mû na ala ndara, ngangu nga na dengo bê (Psaume 94:19; aProverbe 2:6; Ésaïe 40:29). Ye ti peko ni ayeke so, ala yeke duti kpô atâa kpale wa la ala tingbi na ni.—aPhilippien 4:6, 7.

 Prophète Ésaïe ayeke lani na fini na popo ti ngu 800 ti kiri na ngu 700 K.N.E. Mingi ti azo ti Juda na ngoi ni so, nga na yâ ti angu so aga na pekoni, avoro lani Jéhovah Nzapa be-ta-zo ape. Na ye ti pekoni ayeke so, Jéhovah azia si a futi Jérusalem, so ayeke li-kodro ti ala na ngu 607 K.N.E.

 Me, ahon ngu ngbangbo oko kozo ti tene a futi gbata ni, Ésaïe asû mbeni bia ti prophétie ti gonda Jéhovah so a wara ni na chapitre 26 (Ésaïe 26:1-6). Bia ni asara tënë ti ngoi so a yeke kiri ti leke ande mbeni gbata so ayeke na sese ti Juda, so na bango ni ayeke Jérusalem.

 A kiri a leke lani Jérusalem na yâ ti angu 537 K.N.E. Na ngoi so ye so asi lani, aJuif so ayeke lani be-ta-zo akiri na Jérusalem na ala tene: “E yeke na ngangu gbata.” (Ésaïe 26:1). A yeke pëpe angangu gbagba ti gbata ni la asara si gbata ni aluti ngangu. Me, nzoni duti ti gbata ni adépend na tufa ti Jéhovah nga na lege so lo bata gbata ni.—Ésaïe 26:2.

 A yeke nga tongaso laso. Azo so azia bê ti ala kue na Jéhovah ayeke bâ so ala yeke duti nzoni ndali ti so ala bâ lo tongana “Kota tênë,” wala ndo ti batango terê.—Ésaïe 26:4.

 Bâ nduru vidéo so ti bâ ambeni ye so ayeke na yâ ti mbeti ti Ésaïe.