“Na tongo nda ni Nzapa asara yayu na sese.”—Genèse 1:1, Mbeti ti Nzapa ti fini dunia.

“Kozoni, Nzapa acréé ayayu na sese.”—Genèse 1:1, La Sainte Bible en sango.

Kozo versê ti Bible so afa ambeni kpengba tâ tënë use. Kozo ni “yayu na sese,” so ti tene aye kue so ayeke na yâ ti dunia so lê ti e abâ, ayeke na mbeni commencement. Use ni, Nzapa la acréé ni.—Apocalypse 4:11.

Bible afa pëpe ngoi oke la Nzapa amû ti créé na dunia nga afa pëpe tongana nyen la lo créé ni. Me Bible afa so Nzapa acréé dunia na lege ti “ngangu ti lo [so] ayeke kota mingi nga [so] amû mbeto na zo.”—Ésaïe 40:26.

Verbe ti Hébreu so a traduire ni ge na “acréé,” ayeke mbeni tënë so a yeke sara kua ka gï na ni tongana a ye ti sara tënë ti mbeni ye so Nzapa la asara ni. a Na yâ ti Bible, gï Jéhovah b Nzapa oko la a iri lo, Lo so acréé aye kue.—Ésaïe 42:5; 45:18.

Kozo versê ti mbeti ti Genèse so la ayeke tongo nda ti mbaï ti création so a wara ni na Genèse chapitre 1 na 2. Ti londo na Genèse 1:1 ti si na 2:4, Bible afa na mbeni lege so ayeke simple aye so Nzapa asara na ngoi so lo créé sese nga na aye kue so ayeke na fini, so na popo ni nga a yeke wara kozo koli na kozo wali. Na peko ti so a sara tënë ti akota ye nde nde so Nzapa acréé, Bible afa anzene nzene tënë so afa tongana nyen la Nzapa acréé kozo koli na kozo wali.—Genèse 2:7-25.

Mbeti ti Genèse afa so Nzapa acréé aye na yâ ti “lango” omene. A ye pëpe ti sara tënë ti lango oko so ayeke na al’heure 24, me a ye ti sara tënë ti mbeni ngoi so e lingbi pëpe ti hinga ningango ni. A lingbi e hinga so na yâ ti Bible tënë “lango” aye nga ti sara tënë ti mbeni ngoi so aninga ahon l’heure 24. Na tapande, na mbeti ti Genèse 2:4, a sara kua na ambeni tënë use ti sara tënë ti ye oko; a yeke atënë tongana “lango” nga na “ngoi.” Nga, a sara tënë ti alango omene so Nzapa acréé na aye tongana mbeni ye so mo bâ mo tene asi na yâ ti “lango” oko.

Ye so azo apensé: Genèse 1:1 aye ti fa so Nzapa ayeke Trinité ndali ti so tënë ti yanga ti Hébreu so a traduire ni na “Nzapa ” na yâ ti versê so ayeke na pluriel.

Tâ tënë ni: Tënë ti yanga ti hébreu Èlohim so a traduire na titre “Nzapa” ayeke na pluriel ti fa kota ti lo wala ti mû nengo na lo, me a ye ti fa ape so Nzapa ni ayeke gbani. Mbeni bakari (The New Catholic Encyclopedia) atene so verbe so aga na peko ti tënë Èlohim tongana ti so a sara kua na ni na Genèse 1:1, ayeke ka “lakue na singulier ..., ye so aye ti fa so a sara kua na pluriel so ti mû nengo na [Nzapa], me pëpe pluriel so aye ti fa wungo ti azo.”—Use Édition ni, Volume 6, lembeti 272.