“Mo iri mbi, na mbi yeke yeda na mo, mbi yeke fa na mo akota ye nga na aye so zo alingbi ti mä yâ ni pëpe, ye so mo de ti hinga ni pëpe.”—Jérémie 33:3, Mbeti ti Nzapa ti fini dunia.

 “Mo iri Mbi, na fade Mbi yeda, Mbi fa na mo kota ye, na ye ti ngangu, so mo hinga pëpe.”—Jérémie 33:3, La Sainte Bible en Sango.

 Atënë so, Nzapa atene ni lani na azo kue so ayeke sambela lo. Tongana azo ni ayeda na tënë ni na ala sambela Nzapa, lo lingbi ti fa na ala ye so ayeke si ande na yâ ti angoi so ayeke ga.

 “Mo iri mbi, na mbi yeke yeda na mo.” Tënë so a tene “mo iri mbi” ayeke gï mbeni senge iringo ndo ape wala ti dekongo na iri ti Nzapa. Me, na yâ ti tënë ni ge, ti iri Nzapa aye ti tene mo sambela lo, mo hunda lo ti mû maboko na mo nga ti fa lege na mo.—Psaume 4:1; Jérémie 29:12.

 Peut-être, mara ti tënë ni so ayeke lani na ngoi ti azo ti Israël ti giriri. Azo ti Israël ni ayeke lani be-ta-zo na Nzapa ape, na aturugu ti Babylone aga ti sara bira na ala (Jérémie 32:1, 2). Ni la, Jéhovah a atene na ala ti kiri na mbage ti lo na lege so ala iri lo na lege ti sambela.

 “Mbi yeke . . . fa na mo akota ye nga na aye so zo alingbi ti mä yâ ni pëpe, ye so mo de ti hinga ni pëpe.” Aye so Nzapa amû zendo ni ti fa ayeke “mbeni ye so azo alingbi ti mä yâ ni pëpe” (wala ye so azo apeut lâ oko ape ti comprendre ni), so ti tene, ye so azo apeut ti hinga ni lâ oko ape ala wani. Tënë so a tene “aye so zo alingbi ti mä yâ ni pëpe”, a peut nga ti kiri peko ni na “aye so a honde.”

 Aye wa la “a honde” so Nzapa ayeke fa ni? A yeke aye so ayeke si ande na yâ ti angoi so ayeke ga, so ti tene, a yeke futi ngbene gbata ti Jérusalem, zo oko ayeke sara kodro dä encore ape, nga so a yeke kiri ti leke ni na azo ayeke kiri ti vivre dä (Jérémie 30:1-3; 33:4, 7, 8). Me, Nzapa atene nga so a yeke futi awakua ti lo ape.—Jérémie 32:36-38.

 Jéhovah asara lani tënë so na prophète Jérémie na ngu 608 K.N.E, na yâ ti ngu bale-oko ni ti komandema ti Gbia Sédécias. Jérémie atene lani kozo awe so a yeke futi Jérusalem nga a yeke gue na Sédécias na ngbâa. Ndali ti so gbia ni ake tënë ni so, lo kanga Jérémie.—Jérémie 32:1-5; 33:1; 37:21.

 Ye so apassé na temps so Nzapa atene lani atënë so e wara ni na Jérémie 33:3. Ye ti mawa ni ayeke so, Gbia Sédécias nga na mingi ti azo ti mara ni angbâ ti sara kpengbango-li (Jérémie 7:26; 25:4). Ala sambela Nzapa ape ti hunda fango lege ti lo. Ngu oko na pekoni, Sédécias aperdre mbata ti lo ti gbia, a futi Jérusalem, na a mû mingi ti azo so asö kuâ a gue na ala na ngbâa na Babylone.—Jérémie 39:1-7.

 Atënë so ayeke na Jérémie 33:3 arappelé e so e yeke diko ni laso, so Nzapa alingbi ti mû ‘tâ hingango ye ti ye so bê ti lo aye’ nga ti fa ‘aye so ndani alï mingi’ na azo so ayeke sambela lo nga so ayeke manda Bible (aColossien 1:9; 1 aCorinthien 2:10). Aye so ndani alï mingi andu nga aye so Nzapa amû zendo ni ti sara na yâ ti angoi so ayeke ga.—Apocalypse 21:3, 4.

 Bâ nduru vidéo so ti bâ ambeni ye so ayeke na yâ ti mbeti ti Jérémie.