“Ala yeke wara ande ngangu tongana yingo vulu aga na ndö ti ala, ala yeke duti atémoin ti mbi na Jérusalem, na yâ ti Judée kue nga na Samarie, nga juska na ambage ti sese so ayeke tâ yongoro.”—Kusala 1:8, Mbeti ti Nzapa ti fini dunia.

 “Fade ala yeke wara ngangu na ndembe so Yingo-Vulu ayeke zu na ndö ti ala. Tongaso, ala yeke ga azo ti tenengo tënë ti ye so ala hinga na ndö ti mbi na Jérusalem, na Judée kue, na Samarie, ngbii ala si na nda ti sese kue.”—Kusala 1:8, Mbeti ti Nzapa, Tënë so amu fini.

 Jésus amû zendo na adisciple ti lo so ala yeke wara ande ngangu na lege ti yingo vulu ti Nzapa ti sara kusala ti ala juska na ambage ti sese so ayeke tâ yongoro.

 “Ala yeke wara ande ngangu tongana yingo vulu aga na ndö ti ala.” Jésus akiri na ndö ti tënë so lo tene ni fade na adisciple ti lo, so ala yeke wara mungo maboko na lege ti yingo vulu ti Nzapa a na peko ti so lo kiri na yayu (Jean 14:16, 26). Alango bale-oko na peko ti so Jésus ague na yayu na ngu 33 na ngoi ti e, adisciple ti lo awara yingo vulu (Kusala 2:1-4). Yingo vulu ti Nzapa amû lege na ala ti sara tënë na ayanga ti kodro nde nde na ti sara amiracle, nga a mû na ala ngangu ti fa tënë ti mabe so ala yeke na ni na Jésus sân mbeto.—Kusala 3:1-8; 4:33; 6:8-10; 14:3, 8-10.

 “Ala yeke duti atémoin ti mbi.” Tënë so a kiri peko ni na “témoin” aye ti sara tënë ti “mbeni zo so atene tâ tënë” wala mbeni zo so “abâ mbeni ye” so asi na lo fa pekoni. So abazengele abâ tâ na lê ti ala aye so asi na yâ ti fini ti Jésus, ala peut ti fa peko ti aye so asi na yâ ti kusala ti lo juska ti si na kuâ ti lo nga na zingongo ti lo na kuâ (Kusala 2:32; 3:15; 5:32; 10:39). Tënë ti aye so ala bâ so zo apeut ti dë kite na ni ape apusu azo mingi ti yeda so Jésus ayeke Christ, Messie so a mû zendo ti lo (Kusala 2:32-36, 41). Ala so ayeda na tënë ti abazengele ni aga atémoin ti Jésus, na ala nga kue afa na ambeni zo tënë na ndö ti fini ti Jésus, kuâ ti lo nga na zingongo ti lo na kuâ.—Kusala 17:2, 3; 18:5.

 “Juska na ambage ti sese so ayeke tâ yongoro.” A peut nga ti kiri na peko ti tënë so na “juska na nda ti sese kue” wala “na ambeni kodro.” Atënë ti Jésus so afa tongana nyen la adisciple ti lo ayeke gue ande na ando so ayo ti fa tënë ti témoin na ndö ti lo. Ala yeke gue ande ayo ahon Judée nga na Samarie ti fa tënë ti ye so ala mä na bê na ni. Ti tâ tënë ni, ala yeke fa tënë na yâ ti mbeni territoire so akono mingi nga ala yeke fa tënë na azo mingi ahon ti so Jésus asara lani (Matthieu 28:19; Jean 14:12). Nduru na ngu 30 tongaso na peko ti so Jésus atene atënë so, bazengele Paul asû lani atene so a fa nzoni tënë na ndö ti Jésus awe na “création kue so ayeke na gbe ti yayu,” même na ando so ayo mingi tongana Rome, Parthie (so ayeke na sud-est ti ngu-ingo ti Caspienne), nga na Afrique du Nord.—aColossien 1:23; Kusala 2:5, 9-11.

 Mbeti ti Kusala akomanse na ndo so Évangile ti Luc a-arrêté dä (Luc 24:44-49; Kusala 1:4, 5). Disciple Luc, so asû mbeti ni, akomanse mbaï ti lo na lege so lo fa tongana nyen la Jésus asi na adisciple ti lo na peko ti so a zingo lo na kuâ (Kusala 1:1-3). Na pekoni, lo fa tongana nyen la congrégation ti aChrétien ni abâ gigi nga tongana nyen la ague na li ni na popo ti ngu 33 ti ngoi ti e ti si na ngu 61 ti ngoi ti e.—Kusala 11:26.

 Atënë so angoro versê ti Kusala 1:8 afa so adisciple ti Jésus ayeke hunda terê ti ala lani wala Jésus ayeke ga Gbia ti Royaume ti Nzapa na ngoi so ala ngbâ na fini (Kusala 1:6). Na yâ ti kiringo tënë ti Jésus, lo tene na ala ti gi bê ti ala ahon ndö ni ape na ndö ti ngoi so a yeke zia ande gere ti Royaume ni na sese (Kusala 1:7). Ahon ti tene adisciple ti lo agi bê ti ala, ala doit ti zia li ti ala na ndö ti fango tënë na ndö ti Jésus “juska na ambage ti sese so ayeke tâ yongoro.” (Kusala 1:8). Laso, aChrétien ayeke mû peko ti tapande so, ala yeke fa nzoni tënë ti Royaume ti Nzapa na bê ti ala kue.—Matthieu 24:14.

 Bâ nduru vidéo so ti bâ ambeni ye so ayeke na yâ ti mbeti ti Kusala.