“Mbeni ye ti kara Nzapa ayeke dä pëpe.”—Luc 1:37, Mbeti ti Nzapa ti fini dunia.

 “Ye ti hon ngangu ti Nzapa ayeke dä pëpe.”—Luc 1:37, Mbeti ti Nzapa, Tënë so amu fini.

 Nzapa so ngangu ti lo ahon angangu kue alingbi ti sara aye so azo apeut ti sara ape. Ye oko apeut ti kanga lege na lo ape ti sara ye so lo mû yanga ti sara wala ye so lo mû zendo ni.

 Tënë ti Grec so a kiri peko ni na “mbeni ye” aye ti sara tënë ti mbeni “tënë” wala mbeni “tënë so a tene”, ti ge so, tënë ni andu Nzapa. A peut nga ti sara tënë ti ye so Jéhovah a Nzapa atene lani. So atënë ti Nzapa ayeke ga lakue gï tâ tënë, a peut nga ti kiri na peko ti versê ti Luc 1:37 na: “Aye so Nzapa amû zendo ni ayeke tï na ngu lâ oko pëpe” wala “Nzapa alingbi ti sara ye kue.” Tënë ti Grec so a kiri na peko ni ague oko na tâ tënë so: Mbeni tënë so Nzapa atene wala so lo mû zendo ni ayeke ngbâ gï senge ape, ndali ti so mbeni ye ti kara lo ayeke dä pëpe.—Ésaïe 55:10, 11.

 Atënë so andu azendo ti Nzapa asigi fani mingi na yâ ti Bible. Na tapande, na lege ti mbeni ange, Jéhovah atene lani na Abraham so wali ti lo Sara so aga mbakoro awe na so apeut ti dü ape ayeke mû ngo. Nzapa akiri atene: “Mbeni ye ti kara Jéhovah ayeke dä?” (Genèse 18:13, 14). Na peko ti so Job agbu li na ndö ti aye so Nzapa acréé, lo tene: “Mbeni ye so mo pensé ti sara si akara mo ayeke dä pëpe.” (Job 42:2). Na temps so adisciple ti Jésus ayeke na kite so wala ala lingbi biani ti tene Nzapa asö ala, Jésus arappelé ala so “Nzapa alingbi ti sara ye kue.”—Matthieu 19:25, 26. b

 Mbeni ange so iri ti lo ayeke Gabriel atene lani atënë so ayeke na Luc 1:37 na Marie so ayeke mbeni maseka-wali Juif so ade ti hinga koli ape. Gabriel atene lani gï na lo so lo yeke dü ande “Molenge ti Lo so ayeke na nduzu na ndö ti aye kue” nga a lingbi “a zia iri ti lo Jésus.” Lo yeke ga ande Gbia ti Royaume ti Nzapa, na lo yeke komande teti lakue lakue.—Luc 1:26-33; Apocalypse 11:15.

 Marie ahunda terê ti lo tongana nyen la ye tongaso apeut ti si ndali ti so ade lo sara mariage ape nga ‘ade lo bungbi na koli ape.’ (Luc 1:34, 35). Gabriel akiri atene na lo so Nzapa ayeke sara kua na yingo vulu ti lo, wala ngangu so lo yeke sara na aye. Na temps ni so lani, Jésus ayeke déjà mbeni zo ti yingo na yayu awe. Tongaso, Jéhovah asara kua lani na yingo vulu ti lo ti zia fini ti Molenge ti lo na yâ ti Marie (Jean 1:14; aPhilippien 2:5-7). Na lege ti miracle, Marie amû ngo. Ti tene Marie amä na bê na ngangu ti Nzapa, ange ni asara na lo tënë ti fami ti lo Élisabeth so amû ngo ade ti ninga ape na “lâ ti mbakoro ti lo.” Élisabeth na koli ti lo, Zacharie, ayeke lani na molenge ape ndali ti so Élisabeth ayeke ngombo (Luc 1:36). Molenge ti ala ni aga Jean Baptiste, lo yeke fa tënë tongana ti so a tene lani.—Luc 1:10-16; 3:1-6.

 Peut-être, ange Gabriel atene lani atënë so ayeke na Luc 1:37, ti tene Marie na Élisabeth agbu li na ndö ni. Amême tënë so adë bê ti awakua ti Jéhovah laso, so Nzapa ayeke sara ye lakue alingbi na azendo ti lo. Ye so andu nga zendo so lo mû ti zi agouvernement ti azo na ti zia na place ni komandema ti Molenge lo, Jésus Christ, so ayeke Gbia ti Royaume ti Nzapa so ayeke na yayu.—Daniel 2:44; 7:13, 14.

 Bâ nduru vidéo so ti bâ ambeni ye so ayeke na yâ ti mbeti ti Luc.