“Ala gi bê ti ala lâ oko pëpe ngbanga ti kekereke, ndali ti so kekereke ayeke ande na agingo bê ti lo wani. Akpale ti lango oko oko alingbi na lango ni.”—Matthieu 6:34, Mbeti ti Nzapa ti fini dunia.

“I gi bê ti i tënë ti kekereke pëpe, teti fade kekereke agi ye ti lo mveni. Vundu ti lâ oko alingbi na lâ ni.”—Matthieu 6:34, La Sainte Bible en sango.

Jésus la atene atënë so, lo yeke tene lani na azo so ayeke mä lo so, a lingbi ala gi bê ti ala ahon ndö ni ape wala ala gi bê ti ala senge senge ape na ndö ti akpale ti kekereke. Me, a yeke nzoni ala gi ti hon ndö ti agingo bê ti ala na lege so ala zia li ti ala gï na ndö ti akpale ti ala ti lango oko oko.

Jésus aye ti tene lani pëpe so a lingbi e pensé na kekereke ape, wala e leke aye ndali ti gigi ti kekereke ape (aProverbe 21:5). Me, Jésus awa e ti gi bê ahon ndö ni ape na ndö ti aye so apeut ti si kekereke. Mara ti gingo bê tongaso apeut ti sara si e perdre ngia ti e nga azi lê ti e na terê ti aye so e doit fade ti sara. Ti gi bê ahon ndö ni laso na ndö ti akpale ti kekereke la ayeke sara si e leke akpale ni ape. Nga mingi ni, aye so e yeke gi ka bê ti e na ndö ni ayeke si ka ape wala tongana asi ayeke duti ngangu tongana ti so e pensé na ni kozo ape.

Atënë ti Jésus so ayeke na popo ti fango tënë ti lo na ndö ti hoto, so a wara ni na Matthieu chapitre 5 ti si na 7. Na yâ ti fango tënë ti Jésus ni, lo fa so ti gi bê ahon ndö ni la apeut ti sara si gigi ti e aga nzoni ahon ti kozo ape, wala asara si gigi ti e ayo ape (Matthieu 6:27). Lo tene nga so tongana e zia Nzapa na kozo ndo na yâ ti fini ti e, e bezoin ti gi bê ti e ahon ndö ni na ndö ti kekereke ape. So Nzapa ayeke bâ lege ti akeke nga na anyama, e yeke sûr so lo yeke bâ ande nga lege ti azo so avoro lo.—Matthieu 6:25, 26, 28-33.