“Zia Jéhovah asara tufa na ndö ti mo na lo bata mo. Zia Jéhovah asara si lê ti lo asu na ndö ti mo na lo sara nzoni na mo. Zia Jéhovah abâ ndo na mbage ti mo na lo mû na mo siriri.”—Nombre 6:24-26, Mbeti ti Nzapa ti fini dunia.

 “L’Éternel airi tënë nzoni na ndö mo, na Lo bata mo. L’Éternel asara si lê ti Lo asu na ndö mo, na Lo sara be-nzoni na mo. L’Éternel ayâa lê ti Lo na ndö mo, na Lo mû na mo siriri.”—Nombre 6:24-26, La Sainte Bible en Sango.

 So ayeke tënë so Aaron, kozo kota prêtre ti Israël, ayeke tene lani ti sara tufa na ndö ti azo ti Israël (Exode 28:1). Atënë ti tufa ni so alondo na Nzapa (Nombre 6:22, 23). Nzapa atene lani na Moïse, lo tene: “Mo tene na Aaron nga na amolenge ti lo, mo tene: ‘Lege so ala yeke iri tufa na ndö ti azo ti Israël ayeke so,’” na pekoni Nzapa afa na lo atënë so ayeke na Nombre 6:24-26. Aprêtre so ayeke lani be-ta-zo asara ye alingbi na yanga so Nzapa amû so. Ala bâ nga iri ti Jéhovah Nzapa na nene ni. a Versê 27 atene: “Ala [aprêtre ni a]yeke zia iri ti mbi na ndö ti azo ti Israël, si mbi sara tufa na ndö ti ala.”

 “Zia Jéhovah asara tufa na ndö ti mo na lo bata mo.” Jéhovah ayeke sara tufa na ndö ti awakua ti lo na lege so lo yeke bata ala, lo yeke fa lege na ala, nga lo yeke sara si ye ti ala aga nzoni (aProverbe 10:22). Na Nombre 6:24-26, tënë “mo” aye ti sara tënë ti zo oko oko. Ye so apeut ti fa nzara so Nzapa ayeke lani na ni ti sara tufa gï na ndö ti mara ti Israël ape, me nga na ndö ti zo oko oko ti mara ni.

 “Zia Jéhovah asara si lê ti lo asu na ndö ti mo na lo sara nzoni na mo.” Ti hunda ti tene Nzapa “asara si lê ti lo asu na ndö ti” mbeni zo ayeke mbeni hunda so prêtre ni ayeke tene na Nzapa ti sara nzoni bê na zo ni nga ti yeda na lo. b A peut nga ti kiri peko ti tënë so na: “A yeke nzoni KOTA GBIA abâ mo na nzoni lê.” (Nombre 6:25, Mbeti ti Nzapa, Tënë so amu fini). Jéhovah ayeke sara nzoni bê na azo ti lo na lege so lo yeke bâ mawa ti ala nga lo yeke sara nzoni na ala.—Ésaïe 30:18.

 “Zia Jéhovah c abâ ndo na mbage ti mo na lo mû na mo siriri.” Jéhovah “abâ ndo” na ndö ti awakua ti lo na lege so lo yeke fa lege na ala na ndoye nga lo yeke mû na ala siriri. Ti gue oko na tënë ti mbeni mbeti, “tënë ti Hébreu (shalom) so a kiri peko ni na siriri aye gï pëpe ti sara tënë ti kpale ti bira so ayeke dä ape, me aye ti sara tënë ti nzoni seni so zo ayeke na ni nga nzoni songo na Nzapa.”

 Ti bâ nzoni na lege ti atufa so ayeke na yâ ti aversê so, azo ti Israël adoit lani ti mä yanga ti Jéhovah (Lévitique 26:3-6, 9). Tongana ala mä yanga ti Jéhovah, lo yeke sara ye alingbi na tënë ti lo. A yeke ye so asi lani na ngoi ti komandema ti ambeni gbia, tongana Salomon nga na Ézéchias.—1 aGbia 4:20, 25; 2 Chronique 31:9, 10.

 Atâa so a hunda na aChrétien ti tene peko ti atënë ti tufa so ape, ala peut ti duti na oko sentiment ni so tongana ala yeke sambela ndali ti amba ti ala aChrétien wala ti encouragé ala (1 aThessalonicien 5:11, 25). Jéhovah achangé ape. Lo ye lakue ti sara tufa na ndö ti awakua ti lo so ayeke be-ta-zo nga ti bata ala. Atâ Chrétien apeut ti duti na siriri na hingango so “lê ti lo asu na ndö” ti ala na lege so lo fa so lo yeda na ala.

 Akozo chapitre bale-oko ti mbeti ti Nombre asara tënë ti aye so Nzapa afa na azo ti Israël na ngoi so ala yeke sara camp nduru na Hoto ti Sinaï ti gue na Sese ti zendo. Na yâ ti ngu oko so ala sara kodro kâ, Jéhovah aleke yâ ti ala nga lo mû na ala andia so a iri ni Mbele ti Ndia.

 Jéhovah afa nga na Moïse tongana nyen la Aaron nga amolenge ti lo so ayeke aprêtre ayeke iri tufa na ndö ti azo ti Israël (Nombre 6:22, 23). Ti londo na ngoi ni so ti gue na ni, Aaron nga na ahale ti lo ayeke sara kua na atënë so ayeke na Nombre 6:24-26 ti iri tufa na ndö ti mara ni. Ambeni ngoi na pekoni, atënë ti tufa ni so aga ye so aprêtre ayeke tene ni na peko ti ndangba sandaga so ala yeke yâa na Nzapa na temple lâ na lâ.

 Bâ nduru vidéo so ti bâ ambeni ye so ayeke na yâ ti mbeti ti Nombre.