“Zia si ala hinga so mbi yeke Nzapa.A yeke gonda kota ti mbi na popo ti amara, a yeke gonda kota ti mbi na ndö ti sese.”—Psaume 46:10, Mbeti ti Nzapa ti fini dunia.

 “Zia, si mo hinga Mbi yeke Nzapa. Fade a yâa iri ti Mbi na popo ti amara, fade a yâa iri ti Mbi na sese so.”—Psaume 46:10 [11], a La Sainte Bible en Sango.

 Nzapa awa azo kue ti voro lo nga ti hinga so lo la lo yeke na droit ti komande na ndö ti sese kue. Zo apeut ape ti dë kite na ngangu ti lo nga na komandema ti lo, nga azo kue so aye ande ti ngbâ na fini lakue lakue adoit ti hinga ni.—Apocalypse 4:11.

 “Zia si ala hinga so mbi yeke Nzapa.” Ambeni Bible akiri na peko ti kozo tënë ti versê ni na “duti kpô.” Ye so asara si mingi ti azo apensé so tënë ti versê ni aye ti sara tënë ti nengo zo wala ti dutingo kpô na yâ ti eglize. Me, tënë ti Hébreu so a kiri peko ni na “zia si ala hinga so mbi yeke Nzapa” ayeke mbeni tisango ndo so alondo na Jéhovah b Nzapa wani ndali ti amara kue, lo wa ala ti sara kpengbango-li na lo ape nga ti tene ala hinga so gï lo oko la lo lingbi ti tene a voro lo.

 A yeke wara mara ti tënë ni so na Psaume 2. Na yâ ni, Nzapa atene so lo yeke punir azo kue so asara kpengbango-li na lo. Na mbage, ala so ayeda na komandema ti Nzapa ayeke bâ ndo na mbage ti lo ti tene lo fa lege na ala, lo mû na ala ndara nga na ngangu. So ala bâ ndo na “mbage ti lo ti bata terê ti ala” asara si ala yeke na ngia nga ala sentir terê ti ala nzoni, mbilimbili na ngoi ti akpale.—Psaume 2:9-12.

 “A yeke gonda kota ti mbi na popo ti amara, a yeke gonda kota ti mbi na ndö ti sese.” Ândö, a gonda Jéhovah Nzapa na ngoi so lo sara lani kua na ngangu ti lo ti bata azo ti lo (Exode 15:1-3). Na yâ ti ngoi so ayeke ga, lo yeke sara ande si a gonda lo na mbeni lege so ayeke nde na ngoi so azo kue so ayeke na ndö ti sese ayeke woko terê ti ala na gbe ti komandema ti lo nga ala yeke voro lo.—Psaume 86:9, 10; Ésaïe 2:11.

 Mbeni mbeti atene so Psaume 46 ayeke “mbeni bia so ahe ni ti gonda kota ti Nzapa so ayeke na ngangu ti bata azo ti lo.” Na ngoi so azo ti Nzapa ayeke he lani Psaume 46, ala yeke fa so ala yeke na confiance so Nzapa ayeke na ngangu ti bata ala nga ti mû maboko na ala (Psaume 46:1, 2). Atënë ti bia ni adabe ti ala so Jéhovah ayeke lakue na ala.—Psaume 46:7, 11.

 Ti tene ala duti na confiance so Jéhovah Nzapa ayeke na ngangu ti bata ala, zo ti sungo psaume ni awa ala ti gbu li na ndö ti aye so ahon gbungo li ti zo so Jéhovah asara (Psaume 46:8). Atënë ti Psaume ni afa so Nzapa ayeke na ngangu ti hunzi abira (Psaume 46:9). Ti tâ tënë ni, Jéhovah ahunzi lani abira na ngoi ti azo ti Israël na lege so lo bata azo ti lo si awato asara sioni na ala ape. Ye oko, Bible amû zendo so na yâ ti kete ngoi Nzapa ayeke sara ande si abira ahunzi na ndö ti sese kue.—Ésaïe 2:4.

 Eskê Jéhovah angbâ ti aidé awakua ti lo laso? En. A yeke ndani la bazengele Paul a-encouragé lani aChrétien ti sara confiance na Jéhovah ti aidé ala (aHébreu 13:6). Atënë so ayeke na Psaume 46 apusu e ti sara confiance na ngangu so Nzapa ayeke na ni ti bata azo ti lo. Atënë ni a-aidé e ti bâ Nzapa tongana “ndo so e kpe dä ti bata terê ti e nga na ngangu ti e.”—Psaume 46:1.

 Bâ nduru vidéo so ti bâ ambeni ye so ayeke na yâ ti mbeti ti Psaume.