Na yâ ti mbeni couple, a yeke ka facile ape tongana aye so agbu bê ti koli na wali ni ayeke nde nde, aye so ala yeke na habitude ti sara ayeke nde nde nga asarango ye ti ala ayeke nde nde. A peut ti duti ngangu mingi na ala ti mä terê na ndö ti ambeni tënë tongana:

•   Ngoi so zo oko oko ayeke passé na afami ti lo

•   Tongana nyen la ala doit ti sara kua na nginza ti ala

•   Eskê ala doit ti dü amolenge wala ala doit ti dü ape

 Nyen la mo peut ti sara tongana mo na wali wala koli ti mo amä terê ape na ndö ti ambeni tënë?

•  Ye so ala doit ti hinga

•  Ye so ala peut ti sara

 Ti mä terê aye ti tene pëpe so bango ndo ti ala kue ayeke gï oko. Même mbeni koli na wali ti lo so amä ka terê mingi, na ambeni ngoi ala peut ti duti na oko bango ndo ape, même na ndö ti akota tënë.

 “Mbi kono na yâ ti sewa so asara fami mingi. Na aweekend, e yeke gue e passé ka temps na a-âta ti e, ababâ kete ti e, a-omba nga na akoya ti e. Ti mbage ti koli ti mbi, ala yeke sara ka ni mingi tongana ti e ape. Tongaso mbi na koli ti mbi e yeke na abango nde nde na ndö ti ngoi so e doit ti mû ti passé na afami ti e nga ti sara lisoro na ala so alango ayo na e.”—Tamara.

 “Ndali ti so fason so a bata na e ayeke nde nde, mbi na wali ti mbi e yeke na abango ndo nde nde na ndö ti aye so e doit ti dépensé nginza ti e na ndö ni. Na akozo nze so aga na peko ti so e sara mariage, a si parfois so e papa na ndö ni. A yeke gï na peko ti so e sara lisoro fani mingi na ndö ni awe la e ga ti mä terê na ndö ni.”—Tyler.

 Ambeni tënë ayeke dä so ti leke ni, a lingbi mbeni oko la asara sacrifice. Na tapande, tongana terê ti babâ wala mama ti mbeni ason na a bezoin ti bâ lege ti lo, wala mbeni aye ti dü amolenge me mbeni aye ti lo ape. a

 “Mbi na wali ti mbi e sara déjà lisoro fani mingi awe na ndö ti tënë ti dungo molenge. Me lo ngbâ gï ti pensé na ndö ni, na pensé ti mbi na lo na ndö ti tënë ni akiri aga encore tâ nde mingi na ti mba. Mbi bâ ti mbi ye so e peut ti sara ti mä terê na ndö ni ape.”—Alex.

 Tongana ala yeke na abango nde nde aye ti fa pëpe so yâ ti songo ti ala ayeke gue ti buba awe la. Ambeni wandara atene so tongana mo na koli wala wali ti mo amä terê pëpe na ndö ti mbeni ngangu tënë, sara kue ti tene na nda ni mo wara ye so mo ye, même si ti wara ni a hunda ti tene mo divorcé. Me mara ti “solution” tongaso afa so mo pensé mingi gï na mo wani ahon ti bâ na nene ni zendo so mo mû na gbele Nzapa ti ngbâ na koli wala wali ti mo, atâa nyen la asi.

 Ala sara kue ti sara ye alingbi na zendo so ala mû na ngoi ti mariage ti ala. Tongana ala leke na bê ti ala ti ngbâ ti sara ye alingbi na zendo so ala mû lani, a yeke sara si ala yeke sara kua maboko na maboko ti leke akpale so ala tingbi na ni.

 Mama-ndia ti Bible: “Ye so Nzapa abungbi na gbe ti joug oko, zia zo akangbi yâ ni pëpe.”—Matthieu 19:6.

 Ala diko ngere ti ye ni. Na tapande, tongana mbeni oko aye ti dü molenge na mbeni aye ti lo ape, a yeke duti ande nzoni tongana ala gbu li na ndö ti aye so:

•   Songo ti mariage ti ala ayeke tongana nyen.

   Eskê songo ti ala akpengba nzoni nga apeut ti mû lege na ala ti hon ndö ti akpale so ababâ na amama ayeke wara na ndö ti tënë ti batango molenge?

•   Aye so ababâ na amama adoit ti sara.

   Kua ti babâ na mama ayeke gï ti mû kobe, bongo nga na ndo ti lango na amolenge ape; ambeni ye ayeke dä so a ku nga na mbage ti ala ti sara.

•   Moyen ti ala.

   Eskê ala peut ti zia équilibre na popo ti kua ti nginza ti ala, sewa ti ala nga na ambeni kua ni nde?

 Mama-ndia ti Bible: “Zo wa na popo ti ala, tongana lo ye ti sara mbeni tour, lo yeke duti kozoni pëpe ti diko ngere ni”?—Luc 14:28.

 Ala bâ aye kue so angoro tënë ni. Ye so ayeke mû ande lege na ala ti leke ambeni tënë so andu kpale ni. Na tapande, na ndö ti tënë ti dungo molenge, lo so lo ye ti lo ti dü ape so apeut ti hunda terê ti lo na ahundango tënë so:

•   ‘So mbi tene mbi ye ti dü ape so, eskê vrai tënë ti mbi ni ayeke so mbi ye ti dü lâ oko ape wala mbi ye ti dü fafadeso ape?’

•   ‘Eskê mbi ye ti dü ape ngbanga ti so mbi yeke na kite so mbi peut ti duti mbeni nzoni babâ wala mama?’

•   ‘Eskê mbi sara mbeto ti tene koli ti mbi wala wali ti mbi asara ka ti mbi encore ape?’

 Na mbage, lo so aye ti dü molenge so apeut ti hunda terê ti lo na ahundango tënë so:

•   ‘Eskê e yeke prêt ti sara kua ti babâ na mama awe?’

•   ‘Eskê e yeke na moyen ti bata molenge?’

 Mama-ndia ti Bible: “Ndara so alondo na nduzu ayeke . . . sara ye ahon ndö ni pëpe.”—Jacques 3:17.

 Bâ anzoni ye so ayeke na yâ ti tënë ti mba ti mo ni. Azo use apeut ti bâ mbeni même ndo, me aye so ala bâ ayeke nde nde. Legeoko nga, mbeni koli na wali apeut ti tingbi na mbeni kpale na yâ ti sewa ti ala na ala peut ti duti na abango ndo nde nde na ndö ni, na tapande tongana a ndu fason so ala doit ti dépensé nginza ti ala. Tongana ala ye ti sara lisoro na ndö ti atënë so ala yeke na bango nde nde na ndö ni, a yeke nzoni ti komanse na mbeni ye so ala mä terê na ndö ni.

•   Aye wa la ala use kue amä terê na ndö ni ti sara?

•   Anzoni ye wa la ayeke na yâ ti tënë ti zo oko oko?

•   Ti tene songo ti mariage ti ala angbâ ti kpengba, eskê mbeni zo oko wala ala use kue apeut ti changé bango ndö ti ala tongaso si ala mä terê ape?

 Mama-ndia ti Bible: “Zia zo oko oko angbâ ti gi ye so asara nzoni na mba ti lo, me pëpe ye so asara nzoni gï na lo wani.”—1 aCorinthien 10:24.