•   Mo ye ti sara gï ye gbagburu tongaso; me koli wala wali ti mo aye ti leke aye kue kozo si.

•   Mo yeke ti mo kpô na mo yeke sara tënë mingi ape, me koli wala wali ti mo aye ti duti na popo ti azo.

 Eskê koli wala wali ti mo ayeke na mbeni sarango ye so ason ka bê ti mo? Tongana mo zia bê ti mo gï na ndö ni apeut ti ga na kpale na yâ ti mariage ti mo. Ti vrai ni, Bible atene so “zo so angbâ lakue ti kiri na ndö ti mbeni tënë asara si akota kamarade akangbi.”—aProverbe 17:9.

 A hon ti tene mo zia si mbeni défaut ti koli wala wali ti mo asara si aga na kpale na milieu ti ala, peut-être mo peut ti gi bâ ni na mbeni lege nde.

Na yâ ti article so e yeke bâ:

 Tongana koli wala wali ti mo ayeke na mbeni sarango ye so ayeke son ka bê ti mo

 Ambeni couple atene ti ala nyen

 Lege ti sara lisoro

 Mbeni sarango ye ti koli wala wali ti mo so ason bê ti mo apeut ti ga mbeni sarango ye so anzere na mo. Bâ ambeni tapande ni ota:

 “Mingi ni koli ti mbi ayeke sara ye yeke yeke wala lo yeke mû temps mingi ti leke terê si lo sigi. Me, sarango ye ni so la asara si lo yeke kanga bê, même na mbi. Parfois sarango ye ti lo ni yeke yeke ayeke son bê ti mbi, me a yeke nga ye so mbi ye na mbage ti lo la.”—Chelsea.

 “Wali ti mbi ayeke leke ka aye na adétail ni kue; lo ye ti contrôlé aye kue na ason bê ti mbi. Na mbeni mbage, so lo yeke gi ti leke aye ni kue asara si lakue lo yeke leke aye na temps.”—Christopher.

 “Koli ti mbi ayeke tenir compte ti aye hio hio ape, a yeke son bê ti mbi. Na oko ngoi ni, so lo yeke calme na yâ ti asarango ye ti lo la ayeke kozo ye so mbi ye na mbage ti lo. So na yâ ti angangu situation lo yeke kpô asara si mbi ye lo.”—Danielle.

 Tongana ti Chelsea, Christopher, nga na Danielle, ala bâ so anzoni sarango ye nga na awokongo ti koli wala wali ti ala ayeke ambage nde nde ti même qualité ni. Tongana ti so lê ti nginza ayeke na ambage use, mo peut ape ti sara tënë ti mbeni wokongo sân ti sara tënë ti nzoni mbage ni.

 Ti vrai ni, ambeni sarango ye ayeke dä so nzoni mbage ni ayeke dä ape. Na tapande, Bible afa so ambeni zo ayeke “nduru ti sara ngonzo”. (aProverbe 29:22). Tongana ayeke tongaso, zo ni adoit ti sara kue ti zia lege ti “songo bê, ngonzo, dengo kongo na ndö ti zo na zonga.” a—aÉphésien 4:31.

 Me tongana ayeke mbeni défaut la ayeke son bê ti mo, sara ye alingbi na wango ti Bible so atene: “Ala ngbâ ti kanga bê na amba ti ala na popo ti ala . . . même tongana mbeni zo ayeke na tënë ti dema.”—aColossien 3:13.

 Na ndö ni, gi ti bâ nzoni mbage ti sarango ye ni. Peut-être sarango ye ni so la ayeke même kozo ye so anzere lani na mo na mbage ti koli wala wali ti mo. Mbeni koli so iri ti lo ayeke Joseph atene: “Tongana mo bâ gï défaut so ayeke son bê ti mo, a yeke tongana ti so mo bâ gï yanga ti mbeni diamant so aza so apeut ti fâ mo na kä ahon ti bâ pendere ni.”

 Kozo ni, zo oko oko apeut ti gbu li na ndö ti aquestion so ayeke na gbe ni ge. Na pekoni ala sara lisoro na ndö ti akiringo tënë ni legeoko.

•   Eskê mo pensé so koli wala wali ti mo ayeke na mbeni défaut so asara si aga na kpale na popo ti mo na lo? Tongana ayeke tongaso, défaut ni ayeke nyen?

•   Eskê a yeke mbeni kota défaut, wala gï senge songo bê?

•   Eskê mbeni nzoni côté ti défaut ni ayeke dä? Tongana a yeke tongaso, a yeke so wa? Ngbanga ti nyen la mo ye nzoni mbage ti défaut ti koli wala wali ti mo?