Eskê koli wala wali ti mo atene na mo so lo yeke gi bê ti lo na ndö ti fason so mo yeke nyon na sämba? Tongana ayeke tongaso, ambeni ye ayeke dä so mo doit ti bâ ni.

Na yâ ti article so e yeke bâ:

•  Nyongo sämba ahon ndö ni ayeke buba yâ ti mariage ti mo nga na seni ti mo

•  Eskê sân sämba mo yeke duti gbä?

•  Kpe ti tene so sämba apeut ti sara sioni na mo ape

•  Ye so mo peut ti sara

 Nyongo sämba ahon ndö ni apeut ti sara si mo wara akobela nde nde tongana kobela ti bê, cirrhose ti foie nga na cancer. Nyongo sämba ahon ndö ni ayeke ga na kpale na seni ti zo; me a yeke ga nga na kpale na yâ ti mariage, na tapande, sarango ye ti ngangu na zo, kpale ti nginza, dutingo be-ta-zo na mba ape nga na divorce.

 Bible atene so tongana zo anyon sämba ahon ndö ni ‘ayeke dë lo tongana ngbo, nga a yeke sara sioni na lo tongana poison ti sioni ngbo.’ (aProverbe 23:32). Tongana nyen la mo peut ti hinga so sân sämba mo yeke duti gbä?

 Ahundango tënë so ayeke na gbe ni ge ayeke aidé mo ti hinga wala sân sämba mo yeke duti gbä:

•   Eskê a yeke ka ngangu na mo ti hinga limite ti mo?

•   Eskê lakue mo yeke pensé na ndö ti mbeni lango so mo yeke nyon ande na sämba?

•   Eskê mo yeke nyon sämba atâa so mo hinga so ayeke ga na kpale na yâ ti gigi ti mo, même na yâ ti mariage ti mo?

•   Eskê nzara ti nyongo sämba asara mo atâa so mo tara ti zia lege ni?

•   Eskê mo na koli wala wali ti mo ayeke papa na ndö ti nombre ti sämba so mo yeke nyon?

•   Eskê fason so mo yeke nyon na sämba ahon ti kozo?

•   Eskê mo yeke nyon sämba na hondengo ni wala mo yeke honde ni na yanga-da wala na place ti kua?

 Tongana mo kiri tene en na mbeni oko wala na mingi ti ahunda so, ye so afa so sân sämba mo yeke duti gbä. Nyongo sämba ahon ndö ni apeut ti sara si mo ga ngbâa ni.

 Eskê koli wala wali ti mo ayeke tene na mo so lo yeke gï bê ti lo na ndö ti fason so mo yeke nyon na sämba? Tongana ayeke tongaso, peut-être na bango ndo ti mo, mo bâ so ayeke mbeni kpale ape wala mo yeke gi ti justifié terê ti mo. Peut-être mo peut ti bi tënë ni na li ti ambeni zo, mbilimbili na ndö ti koli wala wali ti mo, na mo peut ti tene mara ti atënë tongaso:

•   “Tongana fade mo yeke sara ye na mbi nzoni, ka mbi peut ti nyon sämba tongaso ape.”

•   “Tongana fade kua ti mo ayeke sara zo stress tongana ti mbi so, ka mo nga kue mo yeke nyon sämba tongana ti mbi.”

•   “Mbi hinga gbâ ti azo so ayeke nyon sämba ahon mbi.”

 Tongana mo tene mara ti atënë tongaso, eskê mo yeke bâ so nyongo sämba ayeke kota ye ahon mariage ti mo? Nyen la ayeke kota ye mingi na popo ti nyongo sämba ahon ndö ni nga na mariage ti mo?

 Mama-ndia ti Bible: “Koli so asara mariage awe ayeke gi bê ti lo . . . ti bâ tongana nyen lo lingbi ti nzere na lê ti wali ti lo.”—1 aCorinthien 7:33.

•   Bâ na nene ni atënë ti bê ti koli wala wali ti mo. Même tongana koli wala wali ti mo angbâ ti gi bê ti lo na ndö ti fason so mo yeke nyon na sämba, peut-être a lingbi mo sara ambeni changement. Tongana mo peut ti sara achangement ape na ndö ti fason so mo yeke nyon na sämba atâa so koli wala wali ti mo ayeke gi bê ti lo na ndö ni, a fa so nyongo sämba ni ayeke mbeni kpale.

   Mama-ndia ti Bible: “Zia zo oko oko angbâ ti gi ye so asara nzoni na mba ti lo, me pëpe ye so asara nzoni gï na lo wani.”—1 aCorinthien 10:24.

•   Gi ti hinga ye so ayeke pusu ka mo ti nyon sämba mingi. Ti tene mbeni turugu asö benda na yâ ti mbeni bira, lo bezoin ti hinga akode so wato ti lo ayeke gi ti attaqué na lo. Legeoko nga, ti hon ndö ti kpale ti nyongo sämba ahon ndö ni so ayeke tongana mbeni wato, mo doit ti hinga ye so ayeke pusu mo ti nyon sämba ahon ndö ni nga tongana nyen la ayeke tongana mbeni kuku ndali ti azo. Mo bezoin nga ti hinga ye so mo peut ti sara ti zia lege ti nyongo sämba ahon ndö ni na ti tene mo kiri mo tï na yâ ti nyongo ye ni encore ape.

   Mama-ndia ti Bible: ‘Ala gbanzi terê ti ala na anzara ti mitele so ayeke tiri na ala.’—1 Pierre 2:11.

•   Gi mungo maboko. Na yâ ti andokua ti seni, a leke ambeni ye ti mû maboko na azo so awara akpale ti nyongo sämba ahon ndö ni, so andu mbilimbili acentre ti traitement, aprogramme so ayeke aidé azo ti zia lege ti nyongo sämba ahon ndö ni nga na ahôpital. Mo peut nga ti hunda mbeni kamarade ti mo ti aidé mo ti hinga aye so ayeke pusu mo ti nyon sämba ahon ndö ni. Tongana mo bâ so nzara ni akiri, mo peut ti iri lo ti fa na mo ye so mo peut ti sara.

   Mama-ndia ti Bible: “Tâ kamarade aye mba ti lo na ngoi kue nga lo yeke mbeni ita so a dü lo ndali ti angoi ti vundu.”—aProverbe 17:17.

 Nyongo sämba ahon ndö ni ayeke mbeni tënë so ayeke ngangu mingi na so gï dikongo anduru article na ndö ni la apeut ape ti aidé mo ti zia lege ni, wala gï ti tene na yanga mo tene: “Mbi yeke nyon, me mingi ape” la ayeke asara si mo zia lege ni. Me, a yeke nzoni mo hinga so fason ti nyongo sämba ti mo apeut ti sara aye mingi na ndö ti seni ti mo nga na mariage ti mo.

 Ti hinga aye mingi na ndö ni: Diko a-article so a fa na gbe ni ge ti hinga tongana nyen la ambeni zo azia lege ti nyongo sämba ahon ndö ni.

 “Mbi yeke mbeni zo ti sarango ye na ngangu na zo encore ape”

 “Kamene asara encore mbi ape”

 “La rue est devenue ma maison”

 Bâ nga vidéo‘Gigi ti mbi anzere lani na mbi encore ape’