AMATANGA so laso azo mingi ayeke sala na yâ akodoro nde nde, atâa a yeke amatanga ti vorongo nzapa wala amatanga ti poroso, alondo na yâ ti Bible pëpe. Me tongana a yeke tongaso, amatanga ni alondo tongana nyen? Tongana lege azi na mo ti gi nda ti ambeni ye na yâ mbeni da ti batango mbeti, bê ti mo ayeke dö ti bâ tënë so akota buku ti sese so atene na ndo ti amatanga so a yeke sala ni mingi na ndo so mo lango dä. Zia e bâ gi ambeni buku ni.

Pâques. Mbeni kota bakari (The Encyclopædia Britannica) atene so “a yeke wara ti lo mbeni tënë tongaso pëpe na yâ Testament ti Fini so afa so aChrétien ayeke sala lani Matanga ti Pâques” tongana ti so a sala ni laso. Matanga ti Pâques ni alondo tongana nyen? A londo na anzapa ti wataka. Tâ tënë, a tene so Matanga ti Pâques ayeke ti dabe na londongo ti Jésus na popo ti akuâ; ye oko, aye so asala na tele ti matanga ni ayeke ti aChrétien pëpe.

Matanga ti Fini Ngu. Kodoro oko oko ayeke na lango ti lo ti sala matanga ti fini ngu nga lege so lo yeke sala na ni. Mbeni kota bakari (The World Book Encyclopedia) afa ndo so matanga ni alondo dä, lo tene: “A yeke na ngu 46 ti ngoi ti e si togbia ti Rome so iri ti lo ayeke Jules César atene so fade lango 1 ti nze ti janvier ayeke duti Kozo Lango ti Fini Ngu. A-Romain azia lango ni tongana lango ti nzapa ti ala Janus, so ayeke nzapa ti ayanga-da na ti sala si aye ato nda ni. Iri ti janvier so a mû na nze ni alondo na iri ti lo Janus so lani ayeke na alê osio, use abâ ndo na devant, na use abâ ndo na peko.” Tongaso, Matanga ti Fini Ngu alondo na apaïen.

Ambeni matanga ni. Lege ayeke pëpe ti sala lisoro na ndo ti amatanga kue so azo ayeke sala na ndo lê sese. Ye oko, amatanga so agi ti yä iri ti azo na nduzu wala ti sala sabango ti abungbi so azo azia na sese ayeke amatanga so Jéhovah ake ni (Jérémie 17:5-7; Kusala 10:25, 26). Girisa nga pëpe so lege so amatanga ti avorongo nzapa abâ gigi na ni amû lege ti hinga bango ndo ti Nzapa na ndo ni (Esaïe 52:11; Apocalypse 18:4). Akpengba-ndia ti Bible so a fa ni na chapitre 16 ti buku so ayeke mû maboko ande na mo ti hinga bango ndo ti Nzapa na ndo ti salango amatanga so azo ayeke sala me so andu tënë ti nzapa pëpe.