Kete tënë na

mo so mo yeke diko mbeti so:

“Ga mo mû peko ti mbi.” (Marc 10:21). Ti tâ tënë ni, na tenengo tënë so, Jésus Christ ayeke tisa e nga ti mû peko ti lo. Mo yeda na tisango ndo so? Tongana mo yeda, gigi ti mo ayeke changé mingi. Ngbanga ti nyen?

Jéhovah atokua lani oko Molenge ti lo na sese ti mû fini ti lo tongana ngere so a futa ti zi na azo (Jean 3:16). Gango so lo ga lani na sese ayeke gi ti kui ndali ti e pëpe, me ti fa nga na e tongana nyen ti duti na fini. Na yâ ti aye kue so lo sara, lo duti be-ta-zo na Babâ ti lo na lo zia ngia na bê ti Lo. Nga Jésus afa na e tongana nyen ti mû tapande ti Babâ ti lo. Atënë so Molenge ni atene nga na aye so lo sara afa biani alege ti sarango ye ti Babâ ti lo nga na ye so bê ti Lo aye.​—Jean 14:9.

Bible atene so Jésus “[a]zia na [e] mbeni tapande si [e] mû tâ gi peko ti gere ti lo mbilimbili.” (1 Pierre 2:21). Tongana e ye ti ga nduru na Jéhovah, tongana e ye si gigi ti e aga nzoni laso nga tongana e ye ti ngbâ na ndo ti lege so ague na fini ti lakue lakue, a lingbi e mû tâ gi peko ti gere ti Christ mbilimbili.

Ti mû peko ti Jésus tongaso, a yeke nzoni e gi ti hinga tënë nzoni na ndo ti gigi ti lo na tango so lo de na sese. Tongaso, ye so a fa na ndo ti Jésus na yâ ti Bible, a yeke nzoni e manda ni mbilimbili. Ti gbu li na ndo ti aye so Jésus atene na asara nga ti bâ tongana nyen ti mû tapande ti lo na lege ti atënë ti e nga na sarango ye ti e ayeke mû maboko na e ti bâ polele tongana nyen ti mû peko ti lo.

Zia buku so amû maboko na mo ti maï ndoye ti mo na mbage ti Jésus nga na Jéhovah. Nga, zia ndoye so apusu mo ti mû tâ gi peko ti gere ti Jésus mbilimbili tongaso si mo zia ngia na bê ti Jéhovah laso nga lakue lakue.

Awasarango mbeti ni