Ye ti Manda 10

Asalango Ye so Nzapa Ake

A lingbi mo ba aye so Nzapa atene ayeke sioni tongana nyen? (1)

Amara ti bungbingo ti koli na wali wa ayeke sioni? (2)

Tongana nyen a lingbi Chrétien aba mvene? (3) ngia ti nginza? (3) nzi? (3) salango ngangu? (4) salango ye ti ayingo sioni? (5) nyongo samba ahon ndo ni? (6)

Tongana nyen mbeni zo alingbi ti zi tele ti lo na yâ ti asioni salango ye tongaso? (7)

1. Awakua ti Nzapa andoye ye so ayeke nzoni. Me a lingbi nga ala manda ti ke sioye. (Psaume 97:10) So aye ti tene kpengo ambeni salango ye so Nzapa ake. Ambeni ti asalango ye so ayeke so wa?

2. Pitan: Bungbingo koli na wali kozo na mariage, lango sioni, bungbingo na nyama, na mbeni zo ti sewa, nga na bungbingo koli na koli, kue ayeke akota siokpari ti ke Nzapa. (Lévitique 18:6; aRomain 1:26, 27; 1 aCorinthien 6:9, 10) Tongana mbeni koli na wali ade asala mariage pepe me aduti oko, a lingbi ala kangbi tele wala ala sala mariage na lege so ndia ahunda.​—aHébreu 13:4.

3. Mvene, Ngia ti Nginza, Nzi: Jéhovah Nzapa alingbi ti tene mvene pepe. (Tite 1:2) A lingbi azo so aye ti ga nzoni na lê ti lo atene mvene pepe. (aProverbe 6:16-19; aColossien 3:9, 10) Kota bê ayeke na yâ mbage oko oko kue ti ngia ti nginza. Tongaso aChrétien ayeke mu mbage ti ala na yâ ti mbeni mara ti ngia ti nginza oko pepe, tongana pasa, mandako ti mbarata, na karte ti nginza. (aEphésien 5:3-5) Na aChrétien asala nzi pepe. Ala vo pepe aye  so ala hinga anzi ni nzingo wala ala mu ye ti zo pepe na peko ti lo.​—Exode 20:15; aEphésien 4:28.

4. Kota Ngonzo, Salango Ngangu: Ngonzo so akanga ndo ni pepe alingbi ti gue na zo ti sala ye ti ngangu. (Genèse 4:5-8) Zo so asala ngangu alingbi ti duti ndeko ti Nzapa pepe. (Psaume 11:5; aProverbe 22:24, 25) A yeke sioni ti futa kula wala ti kiri sioni teti sioni so ambeni zo alingbi ti sala na e.​—aProverbe 24:29; aRomain 12:17-21.

5. Atene ti Magie na Salango Ye ti Ayingo Sioni: Ambeni zo ahunda ngangu ti ayingo sioni ti tara ti sava akobela. Ambeni nde abi yorö na ndo awato ti ala ti tene ala tï kobela wala même ti fâ ala. Ngangu so ayeke na peko ti asalango ye so kue ayeke Satan. Tongaso a lingbi aChrétien amu mbage ti ala pepe na yâ ti mbeni oko ti aye so. (Deutéronome 18:9-13) Dutingo lakue ndulu na Jéhovah ayeke lege ti nzoni ahon ti bata tele na ayorö so ambeni zo alingbi ti bi na ndo e.​—aProverbe 18:10.

6. Nyongo Samba Ahon Ndo Ni: A yeke sioni pepe ti nyon kete vin, bière, na ambeni ngangu samba nde. (Psaume 104:15; 1 Timothée 5:23) Me nyongo samba mingi wala ahon ndo ni ayeke sioni na lê ti Nzapa. (1 aCorinthien 5:11-13; 1 Timothée 3:8) Nyongo samba ahon ndo ni alingbi ti buba seni ti mo na ti sala sioni na sewa ti mo. A lingbi nga ti pusu mo ti tï hio na gbe ti ambeni tara.​—aProverbe 23:20, 21, 29-35.

7. Fade azo so angbâ ti sala aye so Nzapa atene ayeke sioni aga “ahéritier ti royaume ti Nzapa pepe.” (aGalate 5:19-21) Tongana mo ndoye biani Nzapa na mo ye ti nzere na lê ti lo, mo lingbi ti zi tele ti mo na asalango ye so. (1 Jean 5:3) Manda ti ke ye so Nzapa atene ayeke sioni. (aRomain 12:9) Bungbi oko na azo so ayeke na nzoni tambela. (aProverbe 13:20) Afon mo Chrétien so ayeke biazo alingbi ti mu maboko na mo. (Jacques 5:14) Kozoni kue, na yâ sambela zia bê ti mo kue na Nzapa ti mu maboko na mo.​—aPhilippien 4:6, 7, 13.

[Afoto na alembeti 20, 21]

Nzapa ake nyongo samba ahon ndo ni, nzi, ngia ti nginza, na asalango ye ti ngangu