Ye ti Manda 4

Diable Ayeke Zo Wa?

Satan Diable​—lo londo na ndo wa? (1, 2)

Satan ahanda azo tongana nyen? (3-7)

Ngbanga ti nyen a lingbi mo ke Diable? (7)

1. Tene “diable” aye ti tene zo so atene asioni mvene na ndo mbeni zo. “Satan” aye ti tene mbeni wato wala wakengo tene. A mu a-iri so na kota wato ti Nzapa. Kozoni, lo yeke mbeni ange so ayeke mbilimbili-kue na tele ti Nzapa na yayu. Ye oko, na pekoni lo ba tele ti lo mveni kota mingi na lo ye vorongo so alingbi biani gi na Nzapa.​—Matthieu 4:8-10.

2. Ange so, Satan, asala tene na Ève na lege ti mbeni ngbo. Na tenengo na lo amvene, lo sala si Ève ake yanga ti Nzapa. Tongaso Satan asala bira na ye so ahiri ni “yanga-ti-komande” ti Nzapa, wala dutingo ti lo tongana Lo ti Nduzu Ahon Kue. Satan ahunda wala Nzapa akomande biani teti nzoni ti azo ti Lo nga na lege so alingbi. Satan adë kite wala ambeni zo ayeke ngbâ be-biani na Nzapa. Na salango ye so, Satan asala lo mveni wato ti Nzapa. A yeke ndali ni si ahiri lo Satan Diable.​—Genèse 3:1-5; Job 1:8-11; Apocalypse 12:9.

3. Satan atara ti handa azo ti voro lo. (2 aCorinthien 11:3, 14) Mbeni ye so lo mu ti handa na azo ayeke lege ti vorongo ti wataka. Tongana mbeni lege ti vorongo afa amvene na ndo Nzapa, lo sala biani ye so bê ti Satan aye. (Jean 8:44) Azo so ayeke na yâ ti alege ti vorongo ti wataka alingbi ti mä na bê ti ala kue so ala yeke voro tâ Nzapa. Me ala yeke voro biani Satan. Lo yeke “nzapa ti sese so.”​—2 aCorinthien 4:4.

4. Ye so andu ayingo sioni ayeke mbeni lege so Satan aga na azo na gbe ti ngangu ti lo. Ala lingbi ti hunda na ayingo ti bata ala, ti sala sioni na ambeni zo, ti fa ye so ayeke si kekereke, wala ti sala aye ti kpene. Satan ayeke sioni ngangu so ayeke na peko ti asalango ye so kue. Ti nzere na lê ti Nzapa, a lingbi e sala ye oko pepe so andu ayingo sioni.​—Deutéronome 18:10-12; Kusala 19:18, 19.

5. Satan ahanda nga azo na lege ti salango kota baba ti mara,  nga na lege ti vorongo abungbi ti poroso. Ambeni aba so kodoro wala mara ti ala ayeke nzoni ahon atanga ni kue. Me so ayeke tâ tene pepe. (Kusala 10:34, 35) Ambeni zo abi lê ti ala na ndo abungbi ti poroso ti leke akpale ti zo. Na salango tongaso, ala ke Royaume ti Nzapa. Royaume so ayeke oko yorö teti akpale ti e.​—Daniel 2:44.

6. Mbeni lege nde so Satan ahanda na azo ayeke ti tara ala na anzala ti bê so ayeke sioni. Jéhovah atene na e ti kpe asalango ye so ayeke siokpari ngbanga ti so lo hinga so fade ala yeke sala sioni na e. (aGalate 6:7, 8) Ambeni zo alingbi ti hiri mo ti bungbi oko na ala na yâ amara ti salango ye so. Ye oko, mo glisa pepe, so ayeke biani Satan si aye mo sala aye tongaso.​—1 aCorinthien 6:9, 10; 15:33.

7. Satan alingbi ti mu salango ngangu wala kangango lege ti sala si mo zia Jéhovah. Ambeni zo so mo ndoye ala alingbi ti sala ngonzo mingi teti so mo yeke manda Mbeti ti Nzapa. Ambeni nde alingbi ti he mo na ngia. Me fini ti mo alondo na zo wa? Satan aye si mbito asala mo na mo zia ti manda ye na ndo Jéhovah. Mu lege na Satan ti hon mo na ngangu pepe! (Matthieu 10:34-39; 1 Pierre 5:8, 9) Na kengo Diable, mo lingbi ti zia ngia na bê ti Jéhovah na mo fa so mo mu mbage ti yanga-ti-komande ti Lo.​—aProverbe 27:11.

 [Foto na lembeti 9]

Lege ti vorongo ti wataka, ye so andu ayingo sioni, na vorongo kodoro ahanda azo

[Foto na lembeti 9]

Ke Satan na mandango ye lakue na ndo Jéhovah