Ye ti Manda 8

Dutingo ti Sewa so Anzere na Nzapa

Ndo ti koli na yâ sewa ayeke so wa? (1)

A lingbi koli asala ye na wali ti lo tongana nyen? (2)

Akungba wa babâ ayeke na ni? (3)

Kusala ti wali na yâ sewa ayeke nyen? (4)

Ye nyen Jéhovah ahunda na ababâ na mama nga na amolenge? (5)

Bible atene nyen na ndo kangbingo tele nga na surungo mbeti ti mariage? (6, 7)

1. Mbeti ti Nzapa atene so koli ayeke beli ti sewa ti lo. (1 aCorinthien 11:3) A lingbi koli aduti gi na wali oko. A lingbi ala sala mariage mbilimbili tongana ti so ndia ahunda.​—1 Timothée 3:2; Tite 3:1.

2. A lingbi koli andoye wali ti lo legeoko tongana ti so lo ndoye lo mveni. A lingbi lo sala ye na wali ti lo tongana ti so Jésus asala na adisciple ti lo. (aEphésien 5:25, 28, 29) A lingbi lâ oko pepe lo pika wali ti lo wala lo sala mbeni ye ti sioni na lo. Nde na so, a lingbi lo ne lo na lo yekia lo.​—aColossien 3:19; 1 Pierre 3:7.

3. A lingbi babâ asala kusala ngangu ti bata sewa ti lo. A lingbi lo mu kobe, bongo, na da na wali nga na amolenge ti lo. A lingbi nga babâ amu na sewa ti lo aye ti yingo so atia lo. (1 Timothée 5:8) Lo mu li ni na yâ mungo maboko na sewa ti lo ti manda ye na ndo Nzapa nga na ndo aye so Lo leke ti sala.​—Deutéronome 6:4-9; aEphésien 6:4.

4. A lingbi wali aduti mbeni nzoni zo ti mungo maboko na koli ti lo. (Genèse 2:18) A lingbi lo mu maboko na koli ti lo ti fa ye nga ti fa lege ti sala ye na amolenge ti ala. (aProverbe 1:8) Jéhovah ahunda na wali ti bata sewa ti lo na ndoye. (aProverbe 31:10, 15, 26, 27; Tite 2:4, 5) A lingbi lo yekia koli ti lo na gbe ti bê ti lo.​—aEphésien 5:22, 23, 33.

5. Nzapa ahunda na amolenge ti mä yanga ti ababâ na mama ti ala. (aEphésien 6:1-3) Lo ku ababâ na mama ti fa ye nga ti se amolenge ti ala. A lingbi ababâ na mama amu ngoi ti duti na amolenge ti ala na amanda Mbeti ti Nzapa na ala, si ala wara ye so atia ala na lege ti yingo nga na ti bibe. (Deutéronome 11:18, 19; aProverbe 22:6, 15) A lingbi ababâ na mama ase amolenge ti ala lâ oko pepe na lege ti ngangu wala ti sala sana na ala.​—aColossien 3:21.

6. Tongana koli na wali so asala mariage ayeke na akpale ti mä tele, a yeke nzoni ala tara ti sala ye alingbi na wango ti Bible. Mbeti ti Nzapa awa e ti fa ndoye na ti mu pardon. (aColossien 3:12-14) Tene ti Nzapa afa pepe kangbingo tele tongana mbeni lege ti leke akete kpale. Me mbeni wali alingbi ti soro ti zia koli ti lo tongana (1) koli ni ake na kpengba li ti bata sewa ti lo, (2) lo sala ngangu mingi si sioni alingbi ti si na seni nga na fini ti wali ni, wala (3) ngangu kangango lege ti koli ni asala si lo lingbi pepe ti voro Jéhovah.​—1 aCorinthien 7:12, 13.

7. A lingbi koli na wali so asala mariage aduti be-ta-zo na popo ti ala. Lango sioni ayeke mbeni siokpari na tele ti Nzapa nga na tele ti koli wala wali ti zo. (aHébreu 13:4) Aye ti pitan nde nde kue na gigi ti mariage ayeke gi oko ye so Tene ti Nzapa amu lege na zo ti suru mbeti ti mariage na ti kiri ti sala mbeni. (Matthieu 19:6-9; aRomain 7:2, 3) Jéhovah ake tongana azo asuru mbeti ti mariage atä so nda ni ayeke na yâ Tene ti Nzapa pepe na ala kiri amu mbeni zo nde.​—Malachie 2:14-16.

 [Afoto na lembeti 16, 17]

Nzapa aku ababâ na mama ti fa ye na amolenge ti ala nga ti se ala

[Foto na lembeti 17]

Mbeni babâ so ayeke na ndoye amu na sewa ti lo aye ti mitele nga na ti yingo