Ye ti Manda 3

Jésus Christ Ayeke Zo Wa?

Ngbanga ti nyen a hiri Jésus Molenge ti Nzapa so ayeke “kozo ti ye kue”? (1)

Ngbanga ti nyen a hiri lo “Tene ni”? (1)

Ngbanga ti nyen Jésus aga na sese tongana zo? (2-4)

Ngbanga ti nyen lo sala giriri aye ti kpene? (5)

Fade Jésus ayeke sala nyen na ngoi so ayeke ga? (6)

1. Jésus aduti na yayu tongana mbeni zo ti yingo kozoni si lo ga na ndo sese. Lo yeke kozo ye so Nzapa aleke, na tongaso a hiri lo Molenge ti Nzapa so ayeke “kozo ti ye kue.” (aColossien 1:15; Apocalypse 3:14) Jésus ayeke gi oko Molenge so Nzapa mveni aleke lo. Jéhovah asala kusala na Jésus tongana “wakode” ti lo na yâ lekengo tanga ti aye kue na yayu nga na sese kozoni si lo ga zo ti mitele. (aProverbe 8:22-31; aColossien 1:16, 17) Nzapa asala nga kusala na lo tongana kota watokua ti Lo. Ndali ni, a hiri Jésus “Tene ni.”​—Jean 1:1-3; Apocalypse 19:13.

2. Nzapa atokua Molenge ti Lo na sese na ziango fini ti lo na yâ ti Marie. Tongaso Jésus ayeke pepe na mbeni babâ na lege ti mitele. A yeke nda ni la si lo wara pepe mbeni siokpari wala wokongo ti mitele. Nzapa atokua Jésus na sese ngbanga ti aye ota: (1) Ti fa na e tâ tene na ndo Nzapa (Jean 18:37), (2) ti bata be-biani so ayeke mbilimbili-kue, na tongaso azia mbeni tapande teti e ti mu pekoni (1 Pierre 2:21), na (3) ti mu fini ti lo na sadaka si a zi e na gbe ti siokpari nga na kui. Ngbanga ti nyen a hunda ye so?​—Matthieu 20:28.

3. Na kengo komandema ti Nzapa, kozo koli, Adam, asala ye so Mbeti ti Nzapa ahiri ni “siokpari.” Ni la, Nzapa afâ ngbanga ti kuâ na ndo ti lo. (Genèse 3:17-19) Lo lingbi mbeni pepe na aye so Nzapa ahunda, tongaso lo yeke mbilimbili-kue mbeni pepe. Yeke yeke lo ga mbakoro na lo kui. Adam amu siokpari na amolenge ti lo kue. Ndali ni, e nga e ga mbakoro, e tï kobela, na e kui. A lingbi ti sö azo tongana nyen?​—aRomain 3:23; 5:12.

4. Jésus ayeke la ni zo ti mbilimbili-kue legeoko tongana Adam. Ye oko, nde na Adam, Jésus amä yanga ti Nzapa mbilimbili atä na gbe ti tara ti kota ahon. Tongaso lo lingbi ti mu fini ti lo ti mbilimbili-kue na sadaka ti futa na siokpari ti Adam. A yeke ye so Bible asala tene ni tongana “kota ngele.” Na lege so, a lingbi ti zi amolenge ti Adam na gbe ti ngbanga ti kuâ. Azo kue so amä na bê na Jésus alingbi ti wara pardon ti asiokpari ti ala nga na fini ti lakue lakue.​—1 Timothée 2:5, 6; Jean 3:16; aRomain 5:18, 19.

5. Tongana Jésus ayeke na sese, lo kaï kobela ti azo, nzala ti kobe, na akota pupu. Lo zingo même awakinda. Ngbanga ti nyen lo sala aye ti kpene? (1) Lo ba mawa ti azo so ayeke hu pono, na lo ye ti mu maboko na ala. (2) Aye ti kpene ti lo afa na gigi so lo yeke Molenge ti Nzapa. (3) Ala fa ye so lo yeke sala ande teti azo kue so amä yanga na ngoi so lo komande tongana Gbia na ndo sese.​—Matthieu 14:14; Marc 2:10-12; Jean 5:28, 29.

6. Jésus akui na Nzapa ayä lo na popo ti awakinda tongana mbeni zo ti yingo, na lo kiri na yayu. (1 Pierre 3:18) A to nda ni na ngoi ni so, Nzapa asala si lo ga Gbia. Na yâ ngoi kete fade Jésus ayeke lungula sioni nga na pono kue na ndo sese so.​—Psaume 37:9-11; aProverbe 2:21, 22.

 [Afoto na lembeti 7]

Kusala ti Jésus giriri andu fango ye, salango aye ti kpene, na même mungo fini ti lo teti e