Ye ti Manda 1

Lege ti Hinga na Ye so Nzapa Ahunda na Mo

Nene sango wa ayeke na yâ Mbeti ti Nzapa? (1)

Zo wa ayeke na gunda ni? (2)

Ngbanga ti nyen a lingbi mo manda Mbeti ti Nzapa? (3)

1. Bible ayeke mbeni matabisi ti ngele ngangu so alondo na Nzapa. A yeke tongana mbeti so mbeni babâ ti ndoye atokua na amolenge ti lo. A fa na e tâ tene na ndo Nzapa—mara ti Nzapa wa lo yeke nga na ye so lo hunda. A fa tongana nyen ti hon ndo ti akpale na tongana nyen ti wara tâ ngia. Gi Bible oko si atene na e ye so a lingbi e sala ti nzere na lê ti Nzapa.​—Psaume 1:1-3; Esaie 48:17, 18.

2. A yeke akoli nde nde so wungo ti ala ayeke ndulu na 40 si asû Mbeti ti Nzapa na yâ ti mbeni ngoi so aninga ngu 1 600, a to nda ni na ngu 1513 kozoni na ngoi ti e. A yeke mbeni bungbi ti akete buku 66. Yingo ti Nzapa apusu azo so ti sû Bible. Ala sû na mbeti abibe ti lo, me ti ala mveni pepe. Tongaso a yeke Nzapa na yayu, me mbeni zo na ndo sese pepe, si ayeke Mveni ti Bible.​—2 Timothée 3:16, 17; 2 Pierre 1:20, 21.

3. Nzapa asala kue si a sû peko ti Bible na lege ni na a bata ni nzoni. Wungo ti aBible so asala ayeke mingi ahon tanga ti abuku kue. A yeke pepe azo kue si ayeke duti ande na ngia ti ba mo na mandango Mbeti ti Nzapa, me zia si ye so akanga lege na mo pepe. Fini ti mo ti lakue lakue ayeke ga na lege ti hingango ye ti mo na ndo Nzapa nga na salango ye so bê ti lo aye, atä na gbe ti aye ti ngangu.​—Matthieu 5:10-12; Jean 17:3.