Ye ti Manda 15

Mungo Maboko na Ambeni Zo ti Sala Ye so Bê ti Nzapa Aye

Ngbanga ti nyen a lingbi mo fa na ambeni zo ye so mo yeke manda? (1)

Mo lingbi ti kangbi nzo tene na zo wa? (2)

Ye wa tambela ti mo alingbi ti sala na ndo ti ambeni zo? (2)

Na ngoi wa mo lingbi ti fa tene legeoko na kongrégation? (3)

1. Ti si na ndo so, mo manda awe anzoni ye mingi na yâ Bible. A lingbi hingango ye so ague na mo ti gi ti wara alengo ti Chrétien. (aEphésien 4:22-24) Hingango ye tongaso ayeke kota ye mingi teti mo ti wara fini ti lakue lakue. (Jean 17:3) Ye oko, a lingbi ambeni zo amä nzo tene si ala lingbi ti sö fini ti ala nga. A lingbi atâ Chrétien kue asala tene ti témoin na azo. A yeke komandema ti Nzapa.​—aRomain 10:10; 1 aCorinthien 9:16; 1 Timothée 4:16.

2. Mo lingbi ti to nda ni na kangbingo anzoni ye so mo yeke manda na ala so ayeke ndulu na mo. Sala tene ni na sewa ti mo, andeko, akamarade ti ekole, nga na azo ti ndo ti kua ti mo. Tongana mo yeke sala ni, duti na nzobe nga na benze-pepe. (2 Timothée 2:24, 25) Dabe mo so azo aba mingi tambela ti zo ahon ti mä ye so lo yeke tene. Tongaso nzoni tambela ti mo alingbi ti gboto azo ti mä tene so mo yeke fa na ala.​—Matthieu 5:16; 1 Pierre 3:1, 2, 16.

3. Tongana ngoi ayeke hon, mo lingbi ti lë alengo so ahunda ti to nda ti fa tene legeoko na kongrégation ti aTémoin ti Jéhovah so ayeke ndulu na mo. Ye so ayeke mbeni kota kapa na yâ guengo na li ni ti mo. (Matthieu 24:14) So ye ti mu ngia tongana mo lingbi ti mu maboko na ambeni zo nde ti ga wakua ti Jéhovah na ti wara fini ti lakue lakue!​—1 aThessalonicien 2:19, 20.