Ye ti Manda 2

Nzapa Ayeke Zo Wa?

Tâ Nzapa ayeke zo wa, na iri ti lo ayeke nyen? (1, 2)

Lo yeke na mara ti tele wa? (3)

Akota lengo ti lo ayeke so wa? (4)

A lingbi e voro lo na lege ti ayanda? (5)

Alege use so e lingbi ti manda ye na ndo Nzapa ayeke so wa? (6)

1. Azo avoro aye mingi. Me Mbeti ti Nzapa atene na e so TÂ Nzapa ayeke gi oko. Lo leke aye kue na yayu nga na sese. Teti so lo mu na e fini, a lingbi e voro gi Lo oko.—1 aCorinthien 8:5, 6; Apocalypse 4:11.

2. Nzapa ayeke na akete iri mingi, me tâ iri ti lo ayeke gi oko. Iri ni so ayeke JÉHOVAH. Na yâ aBible mingi, a zi iri ti Nzapa na a zia SEIGNEUR wala NZAPA na place ni. Me na ngoi so a sû giriri Bible, iri ti Jéhovah so asigigi na yâ ni ndulu na fani 7 000!​—Exode 3:15; Psaume 83:19 (83:18, NW).

3. Jéhovah ayeke na tele, me so ayeke tongana ti e pepe. Bible atene “Nzapa ayeke Yingo.” (Jean 4:24) Yingo ayeke mbeni mara ti fini so ayeke kota mingi ahon ti e. Zo oko ade aba Nzapa pepe. Jéhovah aduti na yayu, me lo lingbi ti ba aye kue. (Psaume 11:4, 5; Jean 1:18) Ye oko, yingo ti nzoni-kue ayeke nyen? A yeke pepe mbeni zo tongana Nzapa. Nde na so, a yeke ngangu ti Nzapa ti sala na kua.​—Psaume 104:30.

4. Mbeti ti Nzapa afa na e alengo ti Jéhovah. A fa so akota lengo ti lo ayeke ndoye, mbilimbili, ndara, na ngangu. (Deutéronome 32:4; Job 12:13; Esaïe 40:26; 1 Jean 4:8) Mbeti ti Nzapa atene na e so lo sala nga be-nzoni, nzobe, lo mu pardon, lo mu ye mingi, nga lo yeke na be-nze-pepe. Tongana amolenge so amä yanga, a lingbi e tara ti sala tongana lo.​—aEphésien 5:1, 2.

5. A lingbi e zuku wala e sambela na gbele afoto na ayanda na yâ vorongo ti e? Pepe! (Exode 20:4, 5) Jéhovah atene a lingbi e voro gi lo oko. Fade lo kangbi gloire ti lo na mbeni zo wala mbeni ye nde pepe. Ayanda ayeke na ngangu oko pepe ti mu maboko na e.​—Psaume 115:4-8; Esaïe 42:8.

6. Tongana nyen e lingbi ti hinga Nzapa nzoni ahon? Mbeni lege ni ayeke ti ba aye so lo leke nga ti gbu li mingi na ndo ye so ala fa na e. Aye so Nzapa aleke afa na e so lo yeke na kota ngangu nga na kota ndara. E ba ndoye ti lo na yâ aye kue so lo sala. (Psaume 19:2-7 [19:1-6, NW]; aRomain 1:20) Mbeni lege so e lingbi ti hinga ye na ndo Nzapa ayeke ti manda Bible. Na yâ ni lo fa na e aye mingi ahon na ndo mara ti Nzapa so lo yeke. Lo sala nga tene na e na ndo ye so lo leke ti sala nga ye so lo hunda na e ti sala.​—Amos 3:7; 2 Timothée 3:16, 17.

 [Afoto na lembeti 5]

E manda ye na ndo Nzapa na lege ti aye so lo leke nga na lege ti Bible