Ye ti Manda 6

Royaume ti Nzapa Ayeke Nyen?

Royaume ti Nzapa aduti na ndo wa? (1) Gbia ti lo ayeke zo wa? (2)

Ambeni zo ayeke dä so fade akomande legeoko na Gbia ni?

Tongana a yeke tongaso, ala yeke oke? (3)

Ye nyen afa so e yeke na lâ ti nda ni? (4)

Fade Royaume ti Nzapa ayeke sala nyen teti azo? (5-7)

1. Tongana lo yeke giriri na sese, Jésus afa na azo so amu peko ti lo ti sambela teti Royaume ti Nzapa. Royaume ayeke mbeni ngorogbia so mbeni gbia si amu li ni. Royaume ti Nzapa ayeke mbeni ngorogbia so ayeke nde. A zia gere ni na yayu na fade a komande na ndo sese so. Fade a sala si iri ti Nzapa aga nzoni biani, wala nzoni-kue. A yeke mu lege ti tene a sala na ndo sese ye so bê ti Nzapa aye legeoko tongana ti so asala na yayu.​—Matthieu 6:9, 10.

2. Nzapa amu giriri zendo so fade Jésus ayeke ga Gbia ti Royaume ti Lo. (Luc 1:30-33) Tongana Jésus ayeke na sese, lo fa na gigi so lo yeke duti mbeni Mokonzi so ayeke na nzobe, mbilimbili, na so alingbi kue. Tongana lo kiri na yayu, azia lo na ndo mbata tongana Gbia ti Royaume ti Nzapa fade fade pepe. (aHébreu 10:12, 13) Na ngu 1914, Jéhovah amu na Jésus ngangu ti komande so Lo sala zendo ni na lo giriri. A to nda ni kâ, Jésus ayeke komande na yayu tongana Gbia so Jéhovah ahiri na kusala.​—Daniel 7:13, 14.

3. Jéhovah asoro nga ambeni koli na wali so ayeke be-ta-zo na ndo sese ti gue na yayu. Fade ala komande na Jésus tongana agbia, ajuge, na aprêtre na ndo azo. (Luc 22:28-30; Apocalypse 5:9, 10) Jésus ahiri amokonzi so ayeke komande legeoko na lo na yâ Royaume ti lo “kete kundu.” Wungo ti ala ayeke 144 000.​—Luc 12:32; Apocalypse 14:1-3.

4. Gi so Jésus aga Gbia, lo tomba Satan na asioni ange ti lo na yayu na lo bi ala ndulu na sese. A yeke ndali ni si aye aga sioni mingi ge na ndo sese, ngbele ye na ngu 1914. (Apocalypse 12:9, 12) Abira, anzala ti kobe, akobela ti futi kodoro, guengo na li ni ti kengo ndia​—aye so kue ayeke mbage ti “fä” so afa na gigi Jésus ayeke komande na so aye ti sese so ayeke na lâ ti nda ni ti ala.​—Matthieu 24:3, 7, 8, 12; Luc 21:10, 11; 2 Timothée 3:1-5.

5. Na yâ ngoi kete, fade Jésus ayeke fâ ngbanga ti azo, na kangbingo popo ti ala tongana ti so mbeni berger akangbi popo ti angasangbaga na angasa. “Angasangbaga” ayeke ala so ayeke fa na gigi ande so ala duti be-biani na gbe ti lo. Fade ala wara fini ti lakue lakue na ndo sese. “Angasa” ayeke ala so ayeke ke ande Royaume ti Nzapa. (Matthieu 25:31-34, 46) Na yâ ngoi so aga ndulu, fade Jésus afuti azo kue so ayeke tongana angasa. (2 aThessalonicien 1:6-9) Tongana mo ye ti duti oko ti “angasangbaga” ti Jésus, a lingbi mo mä tene ti Royaume na mo sala ye alingbi na ye so mo manda.​—Matthieu 24:14.

6. Laso a kangbi yâ ti sese na akodoro mingi. Ala oko oko ayeke na ngorogbia ti ala. Mingi ni, amara so atiri bira na popo ti ala. Me fade Royaume ti Nzapa ayeke mu place ti angorogbia kue ti azo. Fade lo yeke komande tongana oko ngorogbia na ndo sese kue. (Daniel 2:44) Na ngoi ni kâ, fade bira, kengo ndia, na salango ngangu ayeke mbeni pepe. Fade azo kue ayeke duti na ndo oko na yâ ti siriri nga na beoko.​—Michée 4:3, 4.

7. Na ngoi ti Komandema ti Ngu Saki Oko ti Jésus, fade abe-ta-zo ayeke ga mbilimbili-kue, na sese kue aga mbeni paradis. Ti si na nda ti angu saki oko, fade Jésus ayeke hunzi aye kue so Nzapa ahunda na lo ti sala. Tongaso fade lo kiri na Royaume ni na Babâ ti lo. (1 aCorinthien 15:24) Ngbanga ti nyen mo sala tene pepe na akamarade ti mo nga na azo so mo ndoye ala mingi na ndo ye so Royaume ti Nzapa ayeke sala ande?

 [Foto na lembeti 13]

Na gbe ti komandema ti Jésus, fade kengo tele wala sioni bibe na ndo ambeni zo ayeke mbeni pepe