1-3. (a) Fa aye so Ézéchiel abâ nga lo mä. (Bâ foto so ayeke na tongo nda ti chapitre so.) (b) Ngangu wa la ayeke lani na peko ti aye so Ézéchiel abâ so? A sara nyen na ndö ti lo?

ÉZÉCHIEL angbâ ayo, lo yeke bâ mbeni kota ndo so mbutu ayeke dä mingi. Lo gi ti bâ ndo ni nzoni, na pekoni lo zi lê ti lo kota. Lo hinga li ti lo na ye so lo yeke bâ so ape. Kâ na ndo ni so, mo bâ mo tene sese na yayu atingbi terê dä so, lo bâ mbeni kota pupu so ayeke ga. Me pupu ti so ni so ayeke nde mingi. Na ngoi so mbeni kota pupu so alondo na nord ayeke mû kuä ti li ti lo nga na bongo ti lo, lo bâ mbeni kota mbinda na lê ti nduzu. Wâ so ayeke na yâ ni aza, na zango ni adabe ti lo na atênë ti nginza so a tö ni aga ngu. * Na ngoi so mbinda ni ayeke ga na loro na mbage ti Ézéchiel, mbeni ye atoto ngangu na totongo ni akpa bruit ti gbâ ti aturugu so ayeke tambela.​—Ézéch. 1:4, 24.

² Na ngoi so Ézéchiel ayeke na ngu 30 tongaso, lo bâ kozo kpengba ye so, so lo yeke girisa ni lâ oko ape, na ambeni kpengba ye ni angbâ na peko. Lo bâ so “maboko ti Jéhovah” ayeke na ndö ti lo, ngangu ti yingo vulu ti Jéhovah so mbeni ye alingbi ti luti na ni ape. Aye so yingo ti Nzapa ayeke mû lege na lo ti bâ ni nga ti mä ni ayeke duti mbeni ye so adö bê mingi, a dö bê mingi  ahon a-image so azo ayeke zia na yâ ti afilm laso. Vision so Ézéchiel abâ asara si li ti lo akpe kue, lo kuku lo kpo li ti lo na sese.​—Ézéch. 1:3, 28.

³ Me ye so Jéhovah aye ayeke gï pëpe ti sara si li ti koli so akpe. Kozo vision so Ézéchiel abâ, tongana ti tanga ti avision kue so adö bê so ayeke na yâ ti mbeti ti prophétie so, aye ti fa ye mingi na lo nga na awakua ti Jéhovah laso. Zia e gbu li ti e nzoni na ndö ti aye so Ézéchiel abâ nga lo mä.

4, 5. Ézéchiel abâ lani vision so na ndo wa?

⁴ Diko Ézéchiel 1:1-3. Kozoni, zia e kiri na ndö ti ndo so aye ni apassé dä. A yeke lani na ngu 613 kozo na ngoi ti e. Tongana ti so e manda na yâ ti chapitre so ahon, Ézéchiel ayeke lani na Babylone na popo ti amba ti lo so a gue na ala na kodro so ayeke na yanga ti Ngu ti Kébar, mbeni canal so azo azi ni, so abateau alingbi ti hon dä, so ayeke mbeni maboko ti Ngu ti Euphrate so na pekoni akiri atingbi na Ngu ti Euphrate ni.

⁵ Jérusalem ayo na ala kilomètre 800. * Temple so babâ ti Ézéchiel ayeke sara lani kua ti prêtre dä aga ndo so azo ayeke sara sioni dä nga ala yeke voro ayanda dä. Trône so David nga na Salomon aduti na ndö ni lani na Jérusalem ti komande na yâ ti gloire aga fadeso mbeni buba ye. Gbia Jéhoïakin, so ayeke na mabe ape, ayeke lani na Babylone na popo ti azo so a gue na ala kâ. Sédécias, so amû place ti lo, ayeke lani na gbe ti komandema ti gbia ti Babylone na lo yeke sioni zo.​—2 aGbia 24:8-12, 17, 19.

6, 7. Ngbanga ti nyen la Ézéchiel alingbi ti pensé so lo yeke na yâ ti mbeni ngoi so ayeke ngangu mingi?

 ⁶ Ti zo ti mabe tongana Ézéchiel so, ngoi so ayeke lani ngangu na lo mingi. Ambeni mba ti lo so a gue na ala na Babylone alingbi ti hunda terê ti ala, atene: ‘Jéhovah azia e biani biani awe? Babylone, so akomande na ngangu nga ayeke sioni mingi, nga na gbâ ti anzapa ti wataka ti lo ayeke zi tâ vorongo Jéhovah biani biani nga ayeke zi komandema ti lo na ndö ti sese?’

⁷ So mo hinga aye so awe, komanse ti manda ye na ndö ni na lege ti dikongo apendere tënë so Ézéchiel atene na ndö ti kozo vision so lo bâ (Ézéch. 1:4-28). Na ngoi so mo yeke sara ni, gi ti zia terê ti mo na place ti Ézéchiel ti bâ aye so lo bâ nga ti mä aye so lo mä.

8. Nyen la Ézéchiel abâ na yâ ti vision? Ye ni so aye ti sara tënë ti nyen?

⁸ Nyen la Ézéchiel abâ ni lani? Ye so lo bâ akpa mbeni kota oto so apika bê ti zo mingi, so a fa ni tongana mbeni char. Na terê ni, mo yeke wara akota roue osio so acréature ti yingo osio so ayeke nde ayeke na terê ni. A fa na peko so acréature ni so ayeke achérubin (Ézéch. 10:1). Na ndö ti li ti achérubin ni, mo yeke wara mbeni kota estrade, wala mbeni ye so ayeke tongana lê ti nduzu, so aza tongana kota glace. Trône ti gloire ti Nzapa ayeke na ndö ni na Jéhovah wani la aduti na ndö ni. Me char ni aye ti  sara tënë ti nyen? A yeke na lege ni so vision so Ézéchiel abâ aye ti sara gï tënë ti ye oko: mbage ti bungbi ti Jéhovah so ayeke na yayu so ayeke ye ti gloire. Ngbanga ti nyen la e tene tongaso? Zia e bâ ambeni ye ota so asara si e tene tongaso.

9. Tongana nyen la a fa songo so ayeke na popo ti Jéhovah na acréature ti lo so ayeke na yayu tongana mbeni char?

⁹ Songo ti Jéhovah na acréature ti lo so ayeke na yayu. Bâ so na yâ ti vision so, trône ti Jéhovah ayeke na ndö ti li ti achérubin. Na yâ ti ambeni mbage ti Bible, a fa nga Jéhovah tongaso a tene lo duti na ndö ti trône na ndö ti li ti achérubin wala na popo ti ala. (Diko 2 aGbia 19:15; Ex. 25:22; Ps. 80:1.) Tâ tënë, Jéhovah aduti na ndö ti li ti achérubin vrai tongaso ape, ndali ti so lo bezoin pëpe ti tene angangu créature ti yingo so ayô lo, nga lo bezoin pëpe ti monté na yâ ti mbeni vrai char ti kpe na ni. Me achérubin amû mbage ti komandema ti lo, na lo lingbi ti tokua ala na ndo kue so lo ye ti tene ala gue ti sara ye so lo ye. Legeoko tongana a-ange kue so ayeke nzoni-kue, achérubin ayeke sara ye alingbi na adesizion so Jéhovah amû tongana awakua ti lo (Ps. 104:4). Na sarango tongaso, a yeke mo bâ tene lo “tambela” na ndö ti a-ange kue, na lege so lo yeke fa lege na ala tongana Gbia ti ala mo bâ mo tene ala yeke mbeni kota char. *

10. Nyen la afa so achérubin mingi la ayeke na terê ti char ti yayu me a yeke gï ala osio ape?

¹⁰ Char ni aye ti sara gï tënë ti achérubin ape. Wungo ti achérubin so Ézéchiel abâ ayeke osio. Mingi ni, Bible asara kua na  wungo so ti sara tënë ti aye so akpa terê wala ti mbeni ye so alingbi kue wala mbeni ye so andu azo kue. Tongaso, a yeke na lege ni so, so achérubin osio ayeke dä, a ye ti sara tënë ti amolenge ti Jéhovah ti yingo kue so ayeke be-ta-zo. Bâ nga so aroue ni nga même achérubin ni ayeke na gbâ ti lê, ye so aye ti fa so a yeke gbâ ti acréature ti yingo la ayeke sara hange, me a yeke gï ala osio ape. Atënë so Ézéchiel atene afa so char ni ayeke kota mingi na asara même si achérubin so apika bê ti zo mingi so aga kete (Ézéch. 1:18, 22; 10:12). Legeoko nga, mbage ti bungbi ti Jéhovah so ayeke na yayu ayeke kota mingi na acréature ti yingo mingi ayeke na yâ ni, me gï achérubin osio ape.

11. Vision wa la Daniel abâ so akpa ti Ézéchiel? A sara si e hinga nyen?

¹¹ Daniel abâ vision ti aye so ayeke na yayu so akpa ti Ézéchiel. A gue lani na prophète Daniel na Babylone na lo sara angu mingi kâ, na lo kue lo bâ lani mbeni vision ti aye so ayeke na yayu. Bâ so na yâ ti vision so lo bâ, lo bâ trône ti Jéhovah ayeke nga na aroue. Vision so Daniel abâ aluti mingi na ndö ti kota sewa ti Jéhovah ti yingo so ayeke na yayu. Daniel abâ amolenge ti Jéhovah ti yingo ‘saki oko fani saki oko nga saki bale-oko fani saki bale-oko’ ayeke luti na gbele lo. Ala yeke dä na ngoi so a yeke fâ ngbanga, zo oko oko na place ti lo (Dan. 7:9, 10, 13-18). A yeke na lege ni ti tene so vision so Ézéchiel abâ aye ti sara tënë ti oko bungbi ti acréature ti yingo so ayeke ye ti gloire so.

12. Ngbanga ti nyen la tongana e manda aversê, na tapande aversê so asara tënë ti vision ti char ti yayu so Ézéchiel abâ, ayeke bata e?

¹² Jéhovah ahinga so tongana e azo e zia li ti e gï na ndö ti aye ti yingo so ayeke atâ ye, “aye so lê ayeke bâ pëpe” tongana ti so bazengele Paul atene, ayeke bata e. Ngbanga ti nyen? Ngbanga ti so, so e yeke azo ti mitele, e yeke zia li ti e mingi na ndö ti “aye so lê ayeke bâ,” akpale ti e so ayeke gï teti kete ngoi. (Diko 2 aCorinthien 4:18.) Mingi ni, Satan ayeke sara kua na apensé ti e so ti pusu e ti ga azo so ayeke pensé gï na aye ti mitele. Ti mû maboko na e ti dö sese na lo, na ndoye, Jéhovah afa na e aversê, na tapande prophétie ti Ézéchiel, ti dabe ti e na ndö ti kota ti sewa ti Jéhovah so ayeke na yayu so apika bê ti zo mingi.

13, 14. (a) Tongana nyen la Ézéchiel afa aroue so lo bâ? (b) Ngbanga ti nyen la a yeke na lege ni so char ti Jéhovah ayeke na aroue?

¹³ Kozoni, Ézéchiel aluti mingi na ndö ti achérubin osio, nga na yâ ti chapitre 4 ti mbeti so, e yeke bâ ye so acréature so nga ye so ala kpa ni afa na e na ndö ti Jéhovah. Ye oko, na terê ti achérubin ni, Ézéchiel abâ aroue osio, na bango ni aroue ni ayeke na aplace osio, na a sara si a mû forme ti carré. (Diko Ézéchiel 1:16-18.) A kpa mo bâ mo tene a sara aroue ni na chrysolithe, mbeni tênë ti nginza so lumière alingbi ti hon na yâ ni so ayeke na couleur ti jaune wala vert. Pendere tênë so aza zango.

 ¹⁴ Vision so Ézéchiel abâ agboto lê mingi na ndö ti aroue ti char ni. Mbeni trône so ayeke na aroue. Ye so ayeke tâ nde mingi. E lingbi ti pensé mingi na mbeni trône so gere ni aluti nzoni na mbeni ndo na a yeke na lege ni ti pensé tongaso, ndali ti so agbia ti sese ayeke na komandema gï na ndö ti mbeni mbilimbili ndo. Me komandema ti Jéhovah ayeke nde mingi na ti azo. Tongana ti so Ézéchiel ayeke gue ti bâ, mbeni ye alingbi ti kanga lege na komandema ti Jéhovah ape (Néh. 9:6). Ti tâ tënë ni, Kota Gbia ti dunia kue alingbi ti komande na ndo kue.

15. Ézéchiel atene nyen na ndö ti lege so a leke na aroue ni nga na konongo ni?

¹⁵ Konongo ti aroue ni apika bê ti Ézéchiel mingi. Lo tene: “Ajante ti ala ayo na nduzu mingi a sara si bê ti zo adö.” E lingbi ti bâ na yâ ti li ti e Ézéchiel so ayeke yô lê ti lo na nduzu ti bâ akota jante so aza zango so ayo na nduzu mingi. Lo kiri lo tene tënë so, so apika bê mingi, lo tene: “Alê amû terê ti ajante ti [aroue] ni osio kue.” Me peut-être ye so apika bê ti zo mingi ayeke lege so a leke na aroue ni so ayeke nde. Lo tene: “Na bango aroue ni nga na lege so a leke na ni, a yeke mo bâ mo tene a mû roue oko a yôro na yâ ti mbeni.” So aye ti tene nyen la?

16, 17. (a) So aroue ni alï yâ ti terê aye ti tene nyen? (b) Aroue ni afa nyen na ndö ti fason so char ti Jéhovah ayeke hon na ni?

¹⁶ Na bango ni, roue oko oko so Ézéchiel abâ ayeke aroue use so a yôro ni na yâ ti mba, aroue ni alinda yâ ti mba na ayanga ni asigi mbage na mbage. Ndani la aroue ni asara ye so Ézéchiel asara tënë ni, lo tene: “Na ndembe so ala yeke gue, ala lingbi ti hon na acoin osio sân ti tourné.” Nyen la aroue ni so afa na ndö ti char ti yayu so Ézéchiel abâ?

¹⁷ Aroue ni ayo na nduzu mingi asara si tongana atourné même fani oko, a yeke hon ayo. Vision ni afa so char ni ahon na loro tongana sungo ti awâ ti bekpa (Ézéch. 1:14). Na ndö ni, azo aye ti sara mara ti aroue so ayeke nde mingi so, me ala lingbi ti sara ni ape. Char so alingbi ti changé lege sân ti hon yeke wala même ti tourné. Me a yeke hon kirikiri tongaso ape. Alê so ayeke na terê ti ajante ni afa polele so char ni ayeke bâ aye kue so angoro ni na ambage kue.

18. Nyen la e manda na ndö ti konongo ti aroue ni so apika bê ti zo mingi nga na gbâ ti alê so ayeke na terê ni?

¹⁸ Tongaso, nyen la Jéhovah afa na Ézéchiel nga na azo kue so ayeke be-ta-zo na ndö ti mbage ti bungbi ti lo so ayeke na yayu? Pensé na ndö ti aye so e bâ ni juska ge. Aroue so a sara na aye so aza zango nga na konongo ni afa gloire ti mbage ti bungbi ti Jéhovah so ayeke na yayu so apika bê mingi. Gbâ ti alê so ayeke na terê ti aroue ni afa so mbage ti bungbi ni so abâ aye kue. Lê ti Jéhovah abâ aye kue (aProv. 15:3; Jér. 23:24). Na ndö ni, lo yeke na a-ange kutu mingi so ayeke awakua ti lo so lo lingbi ti tokua ala na ndo kue na yâ ti dunia, na ala lingbi ti bâ aye nzoni na ti ga ti fa peko ni na Kota Gbia ti ala.​—Diko aHébreu 1:13, 14.

19. So char ti Jéhovah ayeke hon na loro mingi nga alingbi ti changé lege hio afa na e nyen na ndö ti Jéhovah nga na mbage ti bungbi ti lo so ayeke na yayu?

 ¹⁹ Nga, e bâ so char ni ayeke hon na loro mingi nga alingbi ti changé lege hio. Gbu li ti mo na ndö ti kota kangbi so ayeke na popo ti mbage ti bungbi ti Jéhovah so ayeke na yayu na agouvernement, andokua nga na abungbi so azo asigi na ni. Abungbi ni so ahinga pëpe tongana nyen ti leke akpale so ayeke na yâ ti dunia nga abungbi ni so alingbi pëpe ti changé alingbi na ye so asi. Ndani la a yeke futi ni. Me char ti Jéhovah afa nzoni mingi so Nzapa so ayeke fa lege na ni ayeke sara ye ahon ndö ni ape nga lo yeke changé alingbi na ye so asi. Tongana ti so nda ti iri ti Jéhovah afa, lo lingbi ti ga ye kue so lo bezoin ni ti sara ye so bê ti lo aye (Ex. 3:13, 14). Na tapande, lo lingbi ti ga hio mbeni ngangu Zo ti bira ti tiri ndali ti azo ti lo, me hio lo lingbi ti changé ti ga mbeni Zo ti nzoni bê so apardonné siokpari ti azo so achangé bê ti ala na lo dë bê ti ala atâa so vundu ahon ndö ti ala.​—Ps. 30:5; És. 66:13.

20. Ngbanga ti nyen la a lingbi char ti Jéhovah apika bê ti e mingi?

²⁰ Ti si ge, vision so Ézéchiel abâ alingbi ti pusu e ti hunda terê ti e: ‘Char ti Jéhovah apika bê ti mbi mingi?’ A lingbi e girisa ape so char ni so ayeke tambela laso. A lingbi e pensé lâ oko ape so Jéhovah, Molenge ti lo nga na a-ange kue abâ pëpe mbeni kpale so adécouragé e. Nga, a lingbi e gi bê ti e pëpe so Nzapa ayeke mû na e ye so e bezoin ni na ngoi ni ape wala so bungbi ti lo ayeke changé ape alingbi na mbeni fini kpale so alondo na yâ ti dunia so ayeke changé gï changengo. A yeke nzoni e dabe ti e so bungbi ti Jéhovah ayeke sara kua lakue. Ézéchiel amä mbeni go so alondo na yayu adekongo, atene: “Roue so atourné”, na bango ni, so ayeke mbeni commandement so a mû na aroue ni ti gue na mbeni ndo (Ézéch. 10:13). Lege so bungbi ti Jéhovah ayeke tambela na ni apika bê ti e mingi. Me Jéhovah wani la apika bê ti e mingi ahon tanga ti aye kue.

21, 22. Tongana nyen la e lingbi ti fa ye so asara si aye ti char ni kue atambela legeoko?

²¹ Lê ti Ézéchiel ague fadeso na nduzu na ndö ti aroue ni; na ndö ti aroue ni lo bâ “ye so ayeke tongana lê ti nduzu so aza tongana kota glace so asara si bê ti zo adö”. (Ézéch. 1:22). A gbara ye so ayeke tongana lê ti nduzu so na ndö ti li ti achérubin ni, a za nga lumière alingbi ti hon na yâ ni. Zo so ahinga tongana nyen la amasini ayeke sara kua alingbi ti duti na gbâ ti ahunda na ndö ti char ni. Na tapande, ambeni zo alingbi ti hunda terê ti ala: ‘Nyen la asara si ye ni so aluti na ndö ti aroue ni? Tongana nyen la aroue ni alingbi ti sara kua sân ti tene ambeni wen asara si atingbi terê?’ Girisa ape so a yeke pëpe andia so afa lege na tambelango ti aye so a créé ni la ayeke fa lege na char so, ndali ti so char ni aye ti sara tënë ti mbeni ye, mbeni vrai ye so  ayeke na yayu. Bâ nga kpengba tënë so: “Yingo so ayeke sara kua na ndö ti acréature ni ayeke nga na yâ ti aroue ni.” (Ézéch. 1:20, 21). Yingo wa la ayeke sara kua na ndö ti achérubin nga na aroue ni so?

²² Kite ayeke dä ape so a yeke yingo vulu ti Jéhovah, ngangu so ahon angangu kue na yâ ti dunia. Ngangu so la asara si aye ti char ni kue atambela legeoko, a mû ngangu na char ni nga a yeke fa lege na hongo ti char ni. Zia e bata atënë so na li ti e na e bâ na li ti e ye so lê ti Ézéchiel ayeke bâ na ngoi so lo tourné lê ti lo na ndö ti Lo so ayeke fa lege na char ni.

23. Atënë wa la Ézéchiel asara kua na ni ti sara tënë ti Jéhovah? Ngbanga ti nyen?

²³ Diko Ézéchiel 1:26-28. Na ngoi so Ézéchiel ayeke sara tënë na ndö ti vision so, fani mingi lo sara kua na atënë tongana “akpa,” “ye so akpa,” nga na “ye so ayeke tongana.” Me na yâ ti aversê so lo kiri lo sara kua na atënë ni so mingi. Ye so lo bâ ni apika bê ti lo mingi, ni la a yeke ngangu na lo ti fa ni nzoni. Lo bâ so “mbeni ye so akpa tênë ti saphir ayeke dä, na a kpa trône.” Mo lingbi ti bâ na yâ ti li ti mo mbeni trône so a sara na kota tênë ti saphir so ayeke bleu? Na ndö ti trône ni, “mbeni ye ayeke dä so akpa zo.” Zo ni ayeke kota zo mingi.

24, 25. (a) Arc-en-ciel so angoro trône ti Jéhovah adabe ti e na nyen? (b) Na ambeni ngoi mara ti avision tongaso asara nyen na ndö ti akoli so ayeke na mabe?

 ²⁴ Kota zo so Ézéchiel abâ lo, lo bâ lo gï tongaso me polele ape, ndali ti so wâ, so afa gloire ti Jéhovah, alondo na terê ti hanche ti lo ti kiri na mbage ti gbe ni, nga a londo na hanche ti lo ni ti gue na mbage ti nduzu. Prophète so ayeke gi ti bâ ndo nzoni. Ye so lo bâ na pekoni apika bê mingi. “Mbeni zango ye angoro terê ti lo kue na akpa arc-en-ciel so ayeke na yâ ti mbinda na ngoi so ngu apika mingi.” Terê ti mo anzere lâ oko ape na ngoi so mo bâ mbeni arc-en-ciel? Ye so adabe ti e na kota gloire ti Zo so acréé aye kue. Apendere couleur ti arc-en-ciel ni alingbi nga ti dabe ti e na mbele ti siriri so Jéhovah asara tënë ni na peko ti kota ngu so apika na ngoi ti Noé (Gen. 9:11-16). Atâa so Jéhovah ayeke Nzapa so ngangu ti lo ahon angangu kue, lo yeke Nzapa ti siriri (aHéb. 13:20).Siriri ayeke mingi na bê ti lo na lo mû ni na azo kue so avoro lo na bê ti ala kue.

²⁵ So Ézéchiel abâ gloire ti Jéhovah Nzapa asara nyen na ndö ti lo? Lo fa ye so asi, lo tene: “Na ngoi so mbi bâ ni, mbi kuku, mbi kpo li ti mbi na sese.” So ye ni apika bê ti Ézéchiel mingi nga lo kpe mbeto ti Nzapa, lo tï na sese. Ambeni prophète asara nga tongaso na ngoi so ala bâ ambeni vision so Jéhovah afa na ala; aye so ala bâ so adoit lani ti sara si ala sara terê ti ala kete na asara si li ti ala akpe kue (És. 6:1-5; Dan. 10:8, 9; Apoc. 1:12-17). Me ambeni ngoi na pekoni, ye so Jéhovah afa na akoli so akpengba ala mingi. Ézéchiel akpengba biani. Tongaso, tongana e diko ambaï tongaso, a lingbi a sara e tongana nyen?

26. Tongana nyen la vision so Ézéchiel abâ adoit ti kpengba lo?

²⁶ Tongana Ézéchiel ayeke lani na agingo bê na ndö ti dutingo ti azo ti Nzapa na Babylone, vision so lo bâ adoit lani ti kpengba lo. A yeke polele so atâa azo ti Nzapa so ayeke be-ta-zo ayeke na Jérusalem wala na Babylone wala na mbeni ndo nde, ye so la ayeke kota ye ape. Char ti Jéhovah so apika bê mingi alingbi ti bâ ndo na ndö ti ala. Ngangu ti Satan alingbi lâ oko pëpe ti kanga lege na Nzapa so ayeke fa lege na mbage ti bungbi ti lo ti gloire so ayeke na yayu. (Diko Psaume 118:6.) Ézéchiel abâ nga so char ti Jéhovah so ayeke na yayu ayo na azo mingi ape. Ndani la aroue ni andu sese (Ézéch. 1:19). Tongaso, Jéhovah ayeke pensé mingi na awakua be-ta-zo ti lo so a gue na ala na Babylone. Babâ ti ala ti ndoye ayeke lakue nduru na ala ti bâ lege ti ala.

27. Vision so Ézéchiel abâ aye ti fa nyen na e laso?

²⁷ Vision so Ézéchiel abâ andu nga e laso? En. Girisa ape so Satan ayeke leke ti kanga lege ngangu na tâ vorongo Jéhovah. A nzere na lo ti sara si e yeda so e yeke gï e oko, e yo mingi na Babâ ti e ti yayu nga na bungbi ti lo. Zia lâ oko ape si mara ti amvene tongaso alï bê ti mo wala pensé ti mo (Ps. 139:7-12). Legeoko  tongana Ézéchiel, e yeke na araison mingi ti tene vision so apika bê ti e. Peut-être e yeke tï, lê ti e na sese tongana Ézéchiel ape. Me ngangu ti mbage ti bungbi ti Jéhovah so ayeke na yayu, loro ni, fason so a yeke changé lege hio nga so a yeke changé ti lingbi na ye so asi nga na sungo ti gloire ni adoit ti pika bê ti e.

28, 29. Nyen la afa so na yâ ti ngu ngbangbo oko so ahon char ti Jéhovah ayeke tambela?

²⁸ Girisa nga ape so mbeni mbage ti bungbi ti Jéhovah so ayeke na sese. Tâ tënë, azo so ayeke mbilimbili-kue ape la ayeke na yâ ti mbage ti bungbi so ayeke na sese. Me gbu li ti mo na ndö ti aye so Jéhovah asara na sese. Na yâ ti dunia kue, Jéhovah asara si asenge zo asara aye so ala lingbi fade ti sara ni na ngangu ti ala wani ape (Jean 14:12). Tongana e diko buku Royaume ti Nzapa akomanse kua awe! e lingbi ti dabe ti e na kota kua ti fango tënë so apika bê mingi so a sara na yâ ti ngu ngbangbo oko so ahon. E lingbi nga ti dabe ti e na kota kua so bungbi ti Jéhovah asara ti fa ye na atâ Chrétien, ti sö benda na yâ ti angbanga so andu kua ti e nga ti sara kua na aye so awandara asigi na ni ti sara ye so bê ti Nzapa aye.

²⁹ Tongana e gbu li ti e na ndö ti aye kue so a sara ti kiri na tâ vorongo Nzapa na place ni na lâ ti nda ni ti sioni dunia so, e yeke bâ polele so char ti Jéhovah ayeke tambela. A yeke mbeni kota pasa la e yeke na ni ti duti na yâ ti bungbi ti Jéhovah ti voro Kota Gbia ti dunia.​—Ps. 84:10.

30. Nyen la e yeke manda na yâ ti chapitre ti peko?

³⁰ E lingbi ti manda aye mingi na lege ti vision so Ézéchiel abâ. Na yâ ti chapitre ti peko, e yeke manda ye mingi na ndö ti “acréature so ayeke na fini” osio so apika bê, wala achérubin. Nyen la e lingbi ti manda na ndö ti Jéhovah Nzapa, Kota Gbia ti dunia, na lege ti ala?