Na Ézéchiel chapitre 23, e bâ so a fa tâ polele na gigi nda ti awakua ti Nzapa ndali ti so ala yeke be-ta-zo ape. Na yâ ti aye mingi, chapitre so ague oko na chapitre 16. Tongana ti chapitre 16, chapitre 23 asara tënë ti sarango ndumba. A tene so Jérusalem ayeke ngambe ti Samarie. Achapitre ni use kue afa tongana nyen la ngambe ni amû peko ti yaya ni na sarango ndumba me na pekoni lo hon yaya ti lo ni na sarango sioni ye nga na sarango lango-​sioni. Na chapitre 23, Jéhovah amû iri na aita ti wali use so: lo mû na yaya ni, so ti tene Samarie so ayeke li-kodro ti royaume ti amara bale-oko, iri ti Oholah; lo mû na ngambe ni, so ti tene Jérusalem so ayeke li-kodro ti Juda, iri ti Oholibah. *​—Ézéch. 23:1-4.

Ambeni ye ayeke dä so akpa terê na yâ ti achapitre use so. Peut-être ati so ayeke kota mingi ayeke so: Kozo, awali-ndumba ni ayeke awali ti Jéhovah na pekoni ala handa lo. Nga, mbeni zendo so amû na zo beku ayeke dä. Chapitre 23 afa polele pëpe beku ti kiringo ti vo azo, me a gue oko na chapitre 16 na ngoi so Jéhovah atene: ‘Mbi yeke sara ande si sarango ye ti buba ti mo nga na ndumba ti mo ahunzi.’​—Ézéch. 16:​16, 20, 21, 37, 38, 41, 42; 23:4, 11, 22, 23, 27, 37.

Ândö na yâ ti ambeti ti e, e tene so aita ti wali use so, Oholah na Oholibah, aye ti sara tënë ti abungbi ti aChrétien ti wataka so yâ ti ala akangbi na aga Eglize Catholique na Eglize Protestant. Ye oko, na peko ti so e sambela, e gbu li ti e nga e gi nda ti ye nzoni, e hunda terê ti e na ambeni kpengba hundango ndo. Eskê abungbi ti aChrétien ti wataka ayeke lani wali ti Jéhovah na mbeni lege? Ala te lani mbele na lo? A yeke polele so ala sara ni ape. Abungbi ti aChrétien ti wataka ayeke même lani dä ape na ngoi so Jésus ate “fini mbele” na Israël ti yingo; ala yeke pëpe na popo ti aChrétien so a soro ala ti gue na yayu so ayeke mbeni mara na lege ti yingo (Jér. 31:​31; Luc 22:​20). Abungbi ti aChrétien ti wataka abâ gigi angu mingi na peko ti kuâ ti abazengele. Ala bâ gigi na yâ ti angu 300, ala yeke mbeni bungbi ti a-apostat so asara aye ti sioni so na yâ ti bungbi ni a yeke wara “asioni pere”, so ayeke atâ Chrétien ape, so Jésus asara tënë ti ala na yâ ti prophétie ti lo na ndö ti blé na asioni pere.​—Mat. 13:24-30.

Mbeni kota kangbi so ayeke na popo ti aita ti wali use so na abungbi ti aChrétien ti wataka ayeke so: Jéhovah atene so beku ayeke dä ti tene a sö Jérusalem nga na Samarie so ayeke be-ta-zo ape (Ézéch. 16:41, 42, 53-55). Eskê Bible amû mara ti beku tongaso na abungbi ti aChrétien ti wataka? Ên-ën. Legeoko tongana ti tanga ti abungbi ti vorongo nzapa so ayeke na yâ ti Babylone, Ngangu gbata, abungbi ti aChrétien ti wataka ayeke na beku oko ape.

Tongaso, Oholah na Oholibah aye pëpe ti sara tënë ti abungbi ti aChrétien ti wataka. Ye oko, na lege ti ala e hinga mbeni kpengba ye: e hinga tënë ti bê ti Jéhovah na ndö ti azo so abuba iri ti lo so ayeke nzoni-kue nga so asara ye pëpe alingbi na andia ti lo na ndö ti tâ vorongo Nzapa. Tënë ayeke na li ti abungbi ti aChrétien ti wataka mbilimbili ndali ti gbâ ti a-eglize ti ala so atene ala yeke sara kua na iri ti Nzapa so ayeke wa ti Bible. Mbeni ye ni encore ayeke so ala tene Jésus Christ, Molenge ti Jéhovah so lo ye lo mingi, la ayeke mokonzi ti ala. Me tënë ti ala ni ayeke mvene ndali ti so ala tene so Jésus ayeke mbage ti trinité nga ala ke yanga so Jésus amû so ayeke polele ti ngbâ lakue ti duti “ti dunia so pëpe”. (Jean 15:​19). So abungbi ti aChrétien ti wataka angbâ ti voro ayanda nga ala yeke mû mbage na yâ ti aye so azo ti poroso aleke ti handa na azo, ala fa so ala yeke biani mbage ti Babylone, Ngangu gbata, “kota wali-ndumba”. (Apoc. 17:⁠1). Kite ayeke dä ape so a lingbi ala wara oko ngbanga so ayeke ku abungbi ti vorongo nzapa ti wataka kue.