ENCADRÉ SO AFA YE NA ZO 14A
Aye so e manda na lege ti vision ti Temple so Ézéchiel abâ
A yâa na nduzu tâ vorongo Nzapa nga a bata ni
Temple so Ézéchiel abâ na vision ayeke na nduzu mingi na ndö ti “mbeni yongoro hoto” (1). E yâa na nduzu mingi tâ vorongo Nzapa na lege so ayeke kota ye mingi na yâ ti fini ti e?
Mur so angoro ndo so temple ayeke dä (2), so angoro ada ti temple so ayeke na milieu ti mbeni kota ndo (3), adabe ti e so a lingbi e zia lâ oko pëpe si mbeni ye abuba vorongo so e yeke voro na Jéhovah. Tongana a lingbi a zia yongoro na tâ vorongo Nzapa aye so ayeke même ndali ti “azo kue”, a lingbi zo so ayeke voro Jéhovah laso aduti yongoro mingi na asioni sarango ye.—Ézéch. 42:20.
Atufa ti lakue lakue
Mbeni ngu alondo na akubu ti temple ayeke sua aga kota ngu na amû fini na aye kue ti yâ ti kodro ni nga asara si aye ti yâ ti kodro ni adü gbani (4). E yeke sara tënë na ndö ti atufa so na yâ ti chapitre 19 ti mbeti so.
A-oko ndia ndali ti azo kue
Ayanga ti gbagba so ayo na nduzu mingi ti gigi (5) nga na ti yâ ni (9) adabe ti e so Jéhovah ayeke na andia so ayeke na nduzu mingi na ndö ti nzoni sarango ye ndali ti azo kue so ayeke voro lo na lege ni. Girisa ape so konongo nga na yongo ti ayanga ti gbagba ti gigi nga na ti yâ ni kue ayeke oko. A yeke na lege ni, ndali ti so aye so ayeke mbilimbili so Jéhovah ahunda na awakua ti lo kue ayeke oko, atâa kua wa la ala yeke sara na yâ ti congrégation wala ngangu so ala yeke sara.
Tengo ye na table ti Jéhovah
Ada ti tengo kobe (8) adabe ti e so na ngoi ti giriri, azo alingbi ti te part ti ala ti ambeni sandaga so ala ga na ni na temple, mo bâ mo tene ala na Jéhovah la ayeke te ye. Ti temple ti yingo so laso aChrétien ayeke voro Jéhovah na yâ ni ayeke nde ndali ti so a mû “sandaga oko” awe (aHéb. 10:12). Me e ngbâ ti mû sandaga ti gonda.—aHéb. 13:15.
Mbeni ye so Nzapa asara ti fa so zendo ni ayeke ga tâ tënë
So a mû amesure kue nzoni na yâ ti vision ni alingbi ti hon gbungo li ti mo. Me amesure ni afa na e mbeni kota ye: Amesure so asara si e hinga biani so na nyen na nyen so Jéhovah atene lo yeke kiri na tâ vorongo Nzapa na place ni, lo yeke sara ni gï tongana amesure so ayeke na lege ni nga so achangé ape so. Atâa so Ézéchiel atene ape so lo bâ azo na yâ ti vision ni, lo sû tënë ti ngangu wango so Jéhovah amû na aprêtre, amokonzi nga na azo ti lo. A lingbi awakua ti Nzapa kue asara ye alingbi na andia ti lo so ayeke mbilimbili.
