Ândö na yâ ti ambeti ti e, a tene Jérusalem ti ândö so azo ti yâ ni ayeke a-apostat aye ti sara tënë ti abungbi ti ­aChrétien ti wataka. Azo ti Jérusalem so ayeke be-ta-zo ape ayeke sara aye tongana vorongo yanda nga na asioni ye so amû ndo. Sarango ye ti ala so adabe ti e biani na aye so abungbi ti aChrétien ti wataka ayeke sara. Ye oko, na yâ ti angu so ahon ade ti ninga ape, na yâ ti ambeti ti e, so na popo ni mo yeke wara ti so mo yeke diko so, a tene encore ape so mbeni prophétie ti Bible aye ti sara tënë ti mbeni ye nde. A yeke tene ni gï tongana Bible afa ni polele tongaso. Eskê mbeni versê ti Bible ayeke dä so amû lege na e ti tene so Jérusalem ti ândö aye ti sara tënë ti abungbi ti aChrétien ti wataka? Ên-ën.

Bâ ye so: Na mbeni ngoi ândö Jérusalem ayeke ndo so a yeke voro Nzapa dä na lege ni; ambeni ngoi na pekoni, azo ti Jérusalem aga a-apostat. Me abungbi ti aChrétien ti wataka avoro Nzapa na lege ni lâ oko ape. Tâ gï na ngoi so abungbi ti aChrétien ti wataka abâ gigi na ngu 300 tongaso, ala fa lakue gï aye so ayeke na lege ni ape.

Na ndö ni, na peko ti so azo ti Babylone afuti lani Jérusalem, Jéhovah akiri abâ gbata ni na nzoni lê na akiri aga ndo so a yeke voro lo na lege ni dä. Me Nzapa abâ abungbi ti aChrétien ti wataka na nzoni lê lâ oko ape, nga tongana a futi ala na ngoi ti kota ye ti vundu awe, ala yeke kiri ti bâ gigi lâ oko ape.

Na ndö ti ye so e bâ so, e lingbi ti tene nyen? Tongana e gbu li ti e na ndö ti aprophétie so aga tâ tënë na ndö ti Jérusalem so azo ni ayeke lani be-ta-zo ape, e lingbi ti tene: ‘A yeke legeoko na aye so e yeke bâ na yâ ti abungbi ti ­aChrétien ti wataka laso.’ Me na bango ni mbeni versê ti Bible amû lege na e ape ti tene so Jérusalem aye ti sara tënë ti abungbi ti aChrétien ti wataka.