ENCADRÉ SO AFA YE NA ZO 1B
Tënë na ndö ti mbeti ti Ézéchiel
A lingbi ti kangbi yâ ti mbeti ti Ézéchiel tongaso:
CHAPITRE 1 TI SI NA 3
Na ngu 613 kozo na ngoi ti e, na ngoi so Ézéchiel asara kodro na popo ti aJuif so a gue na ala na Babylone, lo bâ Jéhovah na yâ ti avision na Jéhovah atokua lo ti tene prophétie na aJuif so alango na yanga ti Ngu ti Kébar.
CHAPITRE 4 TI SI NA 24
Na popo ti ngu 613 na ngu 609 kozo na ngoi ti e, Ézéchiel atene aprophétie so andu kozoni ngbanga so Nzapa afâ na ndö ti Jérusalem nga na azo ti gbata ni so asara kpengbango-li nga avoro ayanda.
CHAPITRE 25 TI SI NA 32
A komanse na ngu 609 kozo na ngoi ti e, ngu so azo ti Babylone akomanse ti sara ndangba camp na terê ti Jérusalem, tënë ti ngbanga so Ézéchiel afâ andu Jérusalem encore ape me andu fadeso akodro ti awato so angoro ala: Ammon, Édom, Égypte, Moab, Philistie, Sidon nga na Tyr.
CHAPITRE 33 TI SI NA 48
A komanse na ngu 606 kozo na ngoi ti e, Jérusalem nga na temple ni, so ayo mingi na ndo so Ézéchiel ayeke dä, angbâ na futingo ni. Na ngoi ni so, Ézéchiel aluti mingi na ndö ti mbeni tënë ti beku: pendere tënë ti kiringo na tâ vorongo Jéhovah Nzapa na place ni.
A sû atënë ti yâ ti mbeti ti Ézéchiel na lege ti molongo so aye ni asi na ni nga alingbi na atënë so a yeke sara tënë na ndö ni. Aprophétie na ndö ti futingo Jérusalem nga na temple ni aga kozo na mingi ti aprophétie so asara tënë ti kiringo na tâ vorongo Nzapa na place ni. A yeke na lege ni ndali ti so aprophétie so asara tënë ti kiringo na vorongo Nzapa na lege ni aye ti fa so a zia lani lege ti vorongo Nzapa na yâ ti temple.
Na ndö ni, Ézéchiel asara tënë kozoni na ndö ti atënë ti ngbanga so Nzapa adë na ndö ti Jérusalem. Na pekoni, lo tene aprophétie ti ngbanga na ndö ti akodro ti awato so angoro ala (chapitre 25 ti si na 32). Na nda ni, lo tene aprophétie na ndö ti kiringo na tâ vorongo Nzapa na place ni. Mbeni wandara atene na ndö ti atënë ti ngbanga so Nzapa afâ na ndö ti amara, lo tene: “Atënë ni so ayeke atënë so ayeke na lege ni ti tene ni ti fa kota ngonzo ti Nzapa kozo si a fa tënë ti nzoni bê so lo sara na azo ti lo, ndali ti so punition ti awato ti azo ti Nzapa ayeke mbeni ye so lo sara ti zi azo ti lo.”
