1, 2. (a) Na yâ ti chapitre so ahon, nyen la e manda na ndö ti vision ti temple so Ézéchiel abâ? (b) Ahundango ndo use wa la e yeke kiri tënë na ni na yâ ti chapitre so?

ÉZÉCHIEL abâ lani pëpe kota temple ti yingo so bazengele Paul asara tënë na ndö ni angu ngbango mingi na pekoni. Chapitre so ahon la afa ni na e. A fa nga na e so nda ti vision ni ayeke ti fa lani na azo ti Nzapa so andia ti Nzapa na ndö ti tâ vorongo Nzapa ayeke kota ye mingi. Ala yeke kiri ti duti na songo na Jéhovah gï tongana ala sara ye alingbi na andia so. Tongaso e lingbi peut-être ti bâ ndani so Jéhovah agboto lê fani use na ndö ti kota pensé so na yâ ti versê oko na lege ti tënë so: “So ndia ti temple ni la.”​—Diko Ézéchiel 43:12.

² Fadeso a lingbi e gbu li ti e na ndö ti ambeni hundango ndo use. Kozoni: Ambilimbili ye wa na ndö ti andia ti Jéhovah na ndö ti tâ vorongo Nzapa aJuif ti ngoi ti Ézéchiel alingbi ti manda na lege ti vision ti temple so? Kiringo tënë na hundango ndo so ayeke mû maboko na e ti bâ use hundango ndo ni: Vision so aye ti tene nyen ndali ti e na lâ ti nda ni so akpale ayeke dä mingi so?

3. Tongana nyen la so Ézéchiel abâ vision ni na ndö ti mbeni yongoro hoto alingbi ti pusu azo ti sara kamene?

³ Ti kiri tënë na kozo hundango ndo ni, zia e bâ ambeni ye ti vision ti temple ni so apika bê mingi. Yongoro hoto. Azo ni alingbi ti  tingbi ndo so Ézéchiel ayeke lani dä si lo bâ vision ni na prophétie ti Ésaïe so asara tënë ti kiringo na aye na place ni so andu bê mingi (És. 2:2). Me bango da ti Jéhovah na ndö ti yongoro hoto so afa na ala nyen? A fa na ala so a lingbi a yâa tâ vorongo Nzapa na nduzu mingi na ndö ti aye kue. Biani, tâ vorongo Nzapa ayeke na nduzu mingi awe ndali ti so Lo so “a yâa [lo] na nduzu mingi ahon tanga ti anzapa kue” la aleke ni (Ps. 97:9). Me azo ni asara lani part ti ala ape ti yâa ni na nduzu. Teti angu ngbangbo mingi, fani mingi ala bi nengo ti tâ vorongo Nzapa na sese, ala dö lege ni ala zia nga ala buba ni. Ti bâ so a yâa da ti Nzapa so ayeke nzoni-kue na nduzu mingi na mbeni ndo ti gloire so ayeke kota mingi, so alingbi na ni biani, apusu biani azo so aye sarango ye ti mbilimbili ti sara kamene.

4, 5. Nyen la azo so ayeke mä lani Ézéchiel alingbi peut-être ti manda na ndö ti ayanga ti gbagba ti temple so ayo na nduzu mingi?

⁴ Ayanga ti gbagba so ayo na nduzu mingi. Na tongo nda ti vision ni, Ézéchiel abâ ange so ayeke fa lege na lo ayeke mû mesure ti ayanga ti gbagba. Ayanga ti gbagba so ayo na nduzu mètre 30 tongaso (Ézéch. 40:14). Akubu ti asinziri ayeke na lege ti lingo na yâ ti temple ni. Aye so kue afa nyen peut-être na azo so agbu li na ndö ti plan ti temple so? Jéhovah atene na Ézéchiel, atene: “Bâ lege ti lingo na yâ ti temple ni mbilimbili.” Ngbanga ti nyen? Ngbanga ti so azo ti Nzapa ayeke ga lani na azo so “afâ bê ti ala na ganza pëpe” tâ na yâ ti da so ayeke nzoni-kue so a yeke voro Nzapa dä. Ye ti peko ni ayeke nyen? Jéhovah atene: “Ala yeke buba nengo ti temple ti mbi la.”​—Ézéch. 44:5, 7.

⁵ Azo so lani “afâ ganza pëpe” asara ye pëpe alingbi na commandement so Nzapa amû ni lani polele na ngoi ti Abraham (Gen. 17:9, 10; Lév. 12:1-3). Me ti azo so “afâ bê ti ala na ganza pëpe” ayeke lani sioni mingi. Ala sara kpengbango-li, ala ke ti sara ye alingbi na fango lege ti Jéhovah. A doit lani ti zia lege pëpe na azo tongaso ti lï na yâ ti da ti Jéhovah so ayeke nzoni-kue so a yeke voro lo dä. Jéhovah ake sarango ye ti handango lê ti zo, na azo ti lo azia si sarango ye ti handango lê ti zo amaï na yâ ti da ti lo. Ayanga ti gbagba nga na akubu ti asinziri so ayeke na yâ ti vision ti temple afa polele so a lingbi zo asara mara ti asioni ye so encore ape. A lingbi a ngbâ ti bata andia so ayeke na nduzu mingi na ndö ti lingo na yâ ti da ti Nzapa. Gï tongana azo ti Jéhovah asara tongaso si lo yeke iri tënë nzoni na ndö ti vorongo so ala yeke voro na lo.

6, 7. (a) Tongana nyen la Jéhovah asara kua na mur so angoro ada ti temple ti tene mbeni tënë na azo ti lo? (b) Tongana nyen la azo ti Jéhovah asara ye lani kozo na da ti lo? (Bâ kete tënë.)

⁶ Konongo ti gbagba so a sara na mur. Mbeni ye ti vision ti temple so apika bê mingi ayeke mur so angoro ndo so temple ayeke dä. Ézéchiel atene so longueur ti ambage ti mur ni oko oko alingbi na yongo ti keke ti sosongo 500 wala mètre 1555 wala kilomètre 1 na ndambo tongaso (Ézéch. 42:15-20). Ye oko, ada ti temple nga na alacour ni amû forme ti carré so mbage ni oko oko ayo gï coudée 500, wala mètre 259. Tongaso mbeni kota ndo ayeke na popo ti temple na  kota mur so angoro ni. * Ngbanga ti nyen la a zia ndo ni so angbâ senge?

⁷ Jéhovah atene: “Ni la, a yeke nzoni ala zia lege ti ndumba so ala sara na lege ti yingo nga ala zi akuâ ti agbia ti ala yongoro na terê ti mbi, na mbi yeke sara ande kodro kpu na kpu na popo ti ala.” (Ézéch. 43:9). “Akuâ ti agbia ti ala” so aye peut-être ti sara tënë ti vorongo yanda. So Jéhovah asara kua na konongo ti gbagba so a sara na mur na yâ ti vision ti temple so Ézéchiel abâ, a yeke mo bâ mo tene, lo yeke tene: “Ala zia aye ti sioni so kue angbâ yongoro kâ. Ala zia si a ga même nduru ge ape.” Tongana ala bata tâ vorongo Nzapa si aduti na sioni oko ape, Jéhovah ayeke duti na popo ti ala.

8, 9. Nyen la peut-être azo ti Jéhovah amanda na lege ti ngangu wango so lo mû na akoli so a mû na ala akua?

⁸ A mû ngangu wango na akoli so a mû na ala akua. Na ndoye Jéhovah amû nga ngangu wango na akoli so ayeke na akota kua na popo ti azo ti lo. Lo mû ngangu wango na azo ti mara ti Lévi so ague yongoro na lo na ngoi so ala komanse ti voro ayanda, me lo gonda amolenge ti Zadoc, “ala so abâ lani lege ti akua na yâ ti ndo ti [lo] so ayeke nzoni-kue, na ngoi so azo ti Israël ague yongoro”. Lo sara ye na lege ni nga na nzoni bê na groupe oko oko alingbi na asarango ye ti ala (Ézéch. 44:10, 12-16). Lo mû nga ngangu wango na amokonzi ti Israël.​—Ézéch. 45:9.

⁹ Tongaso, Jéhovah afa polele so akoli so ayeke na komandema nga so ayeke bâ ndo na ndö ti azo ti lo ayeke kiri tënë na lo ndali ti fason so ala sara na akua ti ala. Ala yeke lakue na bezoin ti tene a mû wango na ala, a kiri na ala na nzoni lege nga a fa lege na ala. Me a lingbi ala mû li ni na sarango ye alingbi na andia ti Jéhovah.

10, 11. Nyen la afa so ambeni zo so akiri na peko ti so a gue na ala na kodro-wande asara lani ye alingbi na aye so vision ti Ézéchiel afa?

¹⁰ Eskê azo so akiri na peko ti so a gue na ala na kodro-wande asara ye alingbi na aye so vision ti Ézéchiel afa? Biani, e lingbi pëpe ti hinga mbilimbili ye so akoli na awali be-ta-zo ti ândö so ayeke pensé na ndö ti vision so apika bê so. Ye oko, Mbeti ti Nzapa afa na e aye mingi na ndö ti ye so azo so akiri asara nga na bango ndo ti ala na ndö ti tâ vorongo Jéhovah. Eskê ala sara ye lani alingbi na amama-ndia so vision ti Ézéchiel afa? Na mbeni lege e lingbi ti tene so ala sara ni, mbilimbili tongana a haka ala na akotara ti ala so asara kpengbango-li kozo ti tene a gue na ala na Babylone.

¹¹ Akoli so ayeke be-ta-zo, na tapande prophète Aggée na prophète Zacharie, prêtre nga wasungo peko ti mbeti Esdras nga na gouverneur Néhémie, ala kue asara lani ngangu ti fa na azo amama-ndia tongana ati so vision ti Ézéchiel afa (Esdras 5:1, 2). Ala fa lani na azo ni so a lingbi a yâa na nduzu mingi tâ vorongo Nzapa nga a lingbi ala zia ni kozo na aye ti sese so agbu bê ti ala nga na gingo ti wara aye so ala ye (Ag. 1:3, 4). Ala tene lani fani mingi so a lingbi azo so aye ti voro Nzapa na lege ni asara ye alingbi na andia so andu tâ vorongo Nzapa. Na tapande, Esdras na Néhémie amû lani ngangu  wango na azo ni ti tomba awali ti ala so ayeke awande, so ayeke sara lani si ala duti pëpe na kpengba songo na Jéhovah. (Diko Esdras 10:10, 11; Néh. 13:23-27, 30.) Ka ti vorongo yanda ayeke lani tongana nyen? Na bango ni, na peko ti so azo ni akiri, na nda ni mara ni ake siokpari so, so asara si ala tï na yâ ti kpale fani mingi na yâ ti mbaï ti ala. Ka ti aprêtre nga na amokonzi ayeke lani tongana nyen? Tongana ti so vision ti Ézéchiel afa, ala yeke lani na popo ti azo so Jéhovah amû na ala wango nga lo kiri na ala na nzoni lege (Néh. 13:22, 28). Ala mingi so asara terê ti ala kete asara lani ye alingbi na wango so.​—Esdras 10:7-9, 12-14; Néh. 9:1-3, 38.

12. Na alege wa la Jéhovah airi tënë nzoni na ndö ti azo so akiri na peko ti so a gue na ala na kodro-wande?

¹² So azo ti Jéhovah amä wango, lo iri tënë nzoni na ndö ti ala. Azo ni ayeke lani na kpengba songo na Jéhovah, ala yeke na nzoni seni nga aye atambela na lege ni. Teti angu mingi aye atambela tongaso ape (Esdras 6:19-22; Néh. 8:9-12; 12:27-30, 43). Ngbanga ti nyen la aye atambela nzoni tongaso? A yeke ngbanga ti so na nda ni azo ni akomanse ti sara ye alingbi na andia ti Jéhovah so ayeke mbilimbili na ndö ti tâ vorongo Nzapa. Aye so vision ti temple afa andu bê ti azo mingi so ayeke mä wango. Tongaso, na nduru tënë, e lingbi ti tene so vision ti temple so Ézéchiel abâ amû maboko na azo so akiri na peko ti so a gue na ala na kodro-wande na akpengba lege use. (1) A fa na ala anzoni ye ti manda na ndö ti andia ti tâ vorongo Nzapa nga a fa na ala tongana nyen la a lingbi ala sara ye alingbi na andia so. (2) A fa mbeni prophétie so adë bê. A fa so a yeke  kiri ande na tâ vorongo Nzapa na place ni, na a fa nga tongana nyen la Jéhovah ayeke iri tënë nzoni na ndö ti azo ti lo tongana ala ngbâ lakue ti voro lo na lege ni. Me laso e ye ti hinga: Eskê vision so ayeke ga tâ tënë fadeso?

13, 14. (a) E hinga tongana nyen so vision ti temple so Ézéchiel abâ aga tâ tënë na ngoi ti e? (b) Vision ni amû maboko na e laso na alege use wa? (Bâ nga encadré 13A, “Aye ti manda nde nde na ndö ti atemple nde nde.”)

¹³ E lingbi ti hinga na bê ti e kue so vision ti temple so Ézéchiel abâ, a bâ e laso? En. Girisa ape ye so ague oko na popo ti vision ti da ti Nzapa so ayeke nzoni-kue so ayeke na ndö ti “mbeni yongoro hoto” so Ézéchiel abâ na prophétie so Ésaïe atene so “hoto so da ti Jéhovah ayeke na ndö ni” ayeke “luti nganganga na ayo ahon tanga ti ahoto”. Ésaïe atene na e mbilimbili so prophétie ti lo ayeke ga tâ tënë na “andangba lango ni,” wala “na lâ ti nda ni.” (Ézéch. 40:2; És. 2:2-4; kete tënë na gbe ni; bâ nga Michée 4:1-4.) Aprophétie so akomanse ti ga tâ tënë na ngoi ti lâ ti nda ni so ngbene ye na ngu 1919 na ngoi so a yâa tâ vorongo Nzapa na nduzu mingi, a kiri na ni na place ni mo bâ mo tene a zia ni na ndö ti mbeni yongoro hoto. *

¹⁴ Tongaso, vision so Ézéchiel abâ andu biani tâ vorongo Nzapa laso. Tongana ti so vision so amû lani maboko na aJuif so akiri na kodro ti ala, vision so amû maboko na e laso na alege use. (1) A fa anzoni ye so e lingbi ti manda na ndö ti lege so e lingbi ti sara ye alingbi na andia ti Jéhovah na ndö ti tâ vorongo Nzapa. (2) A yeke atënë ti prophétie so adë bê ti e so a yeke kiri na tâ vorongo Nzapa na place ni nga azo ti Jéhovah ayeke wara atufa ti lo.

15. Nyen la a lingbi e girisa ape na ngoi so e yeke gi aye so e lingbi ti manda na lege ti vision ti temple so Ézéchiel abâ?

¹⁵ Zia e bâ fadeso ambeni mbilimbili ye na yâ ti vision ti Ézéchiel. Imaginé so e na Ézéchiel la e yeke tambela ti bâ temple so apika bê mingi so lo bâ lani na vision. Girisa ape so e yeke bâ pëpe kota temple ti yingo; me e yeke gi gï aye so e lingbi ti manda so andu tâ vorongo Nzapa laso. Ambeni ye ti manda ni ayeke so wa?

16. Nyen la e lingbi ti manda na lege ti amesure kue so a mû na yâ ti vision so Ézéchiel abâ? (Bâ foto so ayeke na tongo nda ti chapitre so.)

¹⁶ Nda ti amesure so kue ayeke nyen? Ézéchiel abâ ange so terê ti lo akpa cuivre ayeke mû mesure ti aye ti temple nzoni, lo mû mesure ti amur, ti ayanga ti gbagba ni, ti akubu ti asinziri, ti alacour nga na ti gbalaka. Gbâ ti anzene nzene tënë so alingbi ti hon gbungo li ti zo so ayeke diko ni (Ézéch. 40:1–42:20; 43:13, 14). Me gbu li na ndö ti akpengba ye so e lingbi ti manda na lege ti anzene nzene tënë so. Na lege ti anzene nzene tënë so, Jéhovah aluti mingi na ndö ti ndani so andia ti lo ayeke kota ye. Lo la lo lu andia ni me pëpe asenge zo. Azo so atene so fason so zo ayeke voro na Nzapa ayeke kota ye ape ahanda terê ti ala ngangu. Na ndö ni, so a mû mesure ti temple ni nzoni, Jéhovah adë bê ti e so nyen na nyen a yeke kiri na tâ vorongo Nzapa na place ni. Zendo ti Nzapa so ayeke ga tâ tënë tâ gï tongana ti amesure so a mû ni nzoni so. Tongaso, Ézéchiel ayeda biani so a kiri na tâ vorongo Nzapa biani na place ni na lâ ti nda ni so.

17. Nyen la konongo ti gbagba ti temple so a sara na mur a lingbi ti dabe ti e na ni laso?

 ¹⁷ Mur so angoro ndo so temple ayeke dä. Tongana ti so e bâ fade, Ézéchiel abâ mbeni mur so angoro ndo so temple so lo bâ na vision ayeke dä. Mur so ayeke mbeni kpengba dango bê so afa so a lingbi azo ti Nzapa azia aye ti sioni kue ti vorongo nzapa ti wataka yongoro na tâ vorongo Nzapa, ala sara lâ oko pëpe si da ti Nzapa aga sioni. (Diko Ézéchiel 43:7-9.) E bezoin nga oko wango so laso. Na peko ti so a zi azo ti Nzapa na ngbâa na Babylone, Ngangu gbata, na peko ti so ala sara ngu ngbangbo mingi kâ, Christ azia ngbâa be-ta-zo ti lo so ayeke sara ye na ndara na ngu 1919. Mbilimbili ngbene ye na ngoi ni so ti ga na ni, azo ti Nzapa asara ngangu ti zi terê ti ala na afango ye ti wataka nga na asarango ye so andu vorongo yanda nga na sarango ye ti apaïen. E yeke sara kue ti zia yongoro na tâ vorongo Nzapa aye so ayeke sioni na lege ti yingo. Na ndö ni, e yeke dë même buze ape na yâ ti aDa ti Royaume, e bungbi pëpe tâ vorongo Nzapa ti e na mara ti aye tongaso.​—Marc 11:15, 16.

18, 19. (a) Nyen la e lingbi ti manda na lege ti ayanga ti gbagba so ayo na nduzu mingi? (b) A lingbi e sara ye tongana nyen tongana azo agi ti kiri na andia ti Jéhovah so ayeke na nduzu mingi na gbe ni? Mû mbeni tapande ti fa ni.

¹⁸ Ayanga ti gbagba so ayo na nduzu mingi. Tongana e gbu li ti e na ndö ti ayanga ti gbagba so ayo na nduzu mingi so Ézéchiel abâ, aye wa la e lingbi ti manda dä? Kite ayeke dä ape so ayanga ti gbagba so ayo na nduzu mingi ti vision ti temple so afa na aJuif so a gue na ala na kodro-wande so Jéhovah ayeke na andia ti nzoni sarango ye so ayeke na nduzu mingi. Tongana na ngoi ti giriri a yeke tongaso, ka ti laso a yeke tongana nyen? E yeke voro Jéhovah na yâ ti kota temple ti lo ti yingo. Laso a yeke kota ye mingi ti voro Nzapa na handango lê ti zo pëpe (aRom. 12:9; 1 Pi. 1:14, 15). Na lâ ti nda ni so, Jéhovah ayeke fa lege na azo ti lo yeke yeke ti sara ye alingbi tâ na andia ti lo na ndö ti nzoni sarango ye. * Na tapande, a yeke zi na yâ ti congrégation azo so asara siokpari si ake ti changé bê ti ala (1 aCor. 5:11-13). Na ndö ni, ada ti sinziri so ayeke na ayanga ti lingo na yâ ti gbagba so alingbi ti dabe ti e so laso, tongana a ndu tënë ti vorongo Jéhovah, zo so Nzapa ake asarango ye ti lo alingbi pëpe ti lï na yâ ni. Na tapande, mbeni zo so ayeke sara sioni ye na hondengo ni alingbi ti ga na abungbi na yâ ti mbeni Da ti Royaume, me lo lingbi pëpe ti nzere na lê ti Jéhovah juska lo sara ye so Nzapa ahunda na lo awe si lo nzere na lê ti lo (Jacq. 4:8). So ayeke mbeni pendere lege ti bata tâ vorongo Nzapa na yâ ti ngoi so sarango ye ti azo abuba mingi.

¹⁹ Bible atene kozo awe so dunia so ayeke ga sioni mingi kozo si a futi ni. A tene: “Azo ti sioni na azo ti handango azo ayeke ngbâ gï ti sara sioni ahon ti kozo ti gue na ni, ala yeke handa azo na azo ayeke handa ala.” (2 Tim. 3:13). Laso a ngbâ ti handa azo mingi ti pensé so andia ti Jéhovah so ayeke na nduzu mingi akanga lege na zo ngangu, aga ngbene ye awe wala ayeke na lege ni ape. Mo yeke zia si a handa mo? Na tapande, tongana mbeni zo agi ti ga na mo ti yeda so andia ti Nzapa na ndö ti bungbingo koli na koli wala wali na  wali ayeke na lege ni ape, mo yeke yeda na ni? Wala mo yeke yeda na Jéhovah Nzapa, so lo tene na yâ ti Bible polele so azo so ayeke sara mara ti aye tongaso ‘ayeke sara ye ti kamene’? Nzapa awa e ti bâ pëpe so sioni sarango ye ayeke nzoni (aRom. 1:24-27, 32). Tongana e tingbi na mara ti akpale tongaso, a yeke nzoni e bâ na yâ ti li ti e vision ti temple so Ézéchiel abâ so ayanga ti gbagba ni ayo na nduzu mingi nga e dabe ti e na tënë so: Jéhovah ayeke kiri na gbe ni pëpe andia ti lo so ayeke mbilimbili atâa so sioni dunia so ayeke pusu azo ti ke ni. Eskê e yeke yeda na Babâ ti e ti yayu nga e mû mbage ti ye so ayeke na lege ni?

20. Adango bê wa so akpengba zo azo so ayeke na popo ti “azo mingi mingi” awara na yâ ti vision so Ézéchiel abâ?

²⁰ Alacour. Na ngoi so Ézéchiel abâ lacour so ayeke na gigi ti temple so akono mingi, a doit lani ti nzere na lo mingi ti pensé na ndö ti gbâ ti azo so alingbi ti ga dä ti voro Jéhovah na ngia. Laso, aChrétien ayeke voro Nzapa na yâ ti mbeni temple so ayeke kota mingi. Azo so ayeke na popo ti “azo mingi mingi,” so ayeke voro Jéhovah na yâ ti lacour so ayeke na gigi ti temple ti Jéhovah ti yingo, awara na yâ ti vision ti Ézéchiel adango bê so akpengba zo (Apoc. 7:9, 10, 14, 15). Ézéchiel abâ lani so ada ti tengo kobe ayeke na yâ ti alacour ni, ando so azo so ayeke voro Nzapa alingbi ti te part ti ala ti asandaga ti beoko so ala ga na ni (Ézéch. 40:17). Na mbeni lege, ala na Jéhovah Nzapa alingbi ti te ye, mbeni ye so afa so ala yeke na songo ti siriri na lo. Laso, e yeke mû pëpe asandaga tongana ti so aJuif ayeke sara lani na gbe ti Ndia ti Moïse. Me e yeke mû “sandaga ti gonda”  na ngoi so e yeke voro Nzapa na lege ni, na tapande na lege ti acommentaire ti e nga na atënë so e tene na ngoi ti abungbi wala na fango tënë so afa so e yeke na mabe (aHéb. 13:15). Akobe ti yingo so Jéhovah ayeke mû na e ayeke kpengba nga e. A dö bê ti e ape so e pensé tongana amolenge ti Coré so ahe bia na Jéhovah, atene: “Lango oko na lê ti alacour ti da ti mo ayeke nzoni ahon lango saki oko na mbeni ndo nde!”​—Ps. 84:10.

21. Nyen la aChrétien so a soro ala ti gue na yayu alingbi ti manda na lege ti bungbi ti aprêtre ti yâ ti vision so Ézéchiel abâ?

²¹ Bungbi ti aprêtre. Ézéchiel abâ lani so ti gue na lacour so ayeke na yâ ni kâ, aprêtre na azo ti mara ti Lévi ayeke lï na ayanga ti gbagba so ayeke tongana ti so azo ti amara so ayeke aprêtre ape ayeke hon dä ti gue na lacour so ayeke na gigi. Ye so ayeke lani mbeni ye so adabe ti azo so ayeke na yâ ti bungbi ti aprêtre so a lingbi ala kue asara nga ye alingbi na andia ti Jéhovah na ndö ti tâ vorongo Nzapa. Ka ti laso ayeke tongana nyen? Laso na popo ti awakua ti Nzapa mo yeke wara pëpe bungbi ti aprêtre, me a tene na aChrétien so a soro ala ti gue na yayu, a tene: “Ala yeke ‘mara so a soro ni awe, mbeni bungbi ti aprêtre so ayeke sara kua tongana agbia.’” (1 Pi. 2:9). Aprêtre ti Israël ti giriri ayeke voro lani Nzapa na yâ ti mbeni lacour so ayeke nde. Laso, aChrétien so a soro ala ti gue na yayu ayeke voro Nzapa na mbeni ndo nde na amba ti ala aChrétien ape, me ala yeke na mbeni songo so ayeke nde na Jéhovah, lo mû ala ti ga amolenge ti lo (aGal. 4:4-6). Nga, aChrétien so a soro ala ti gue na yayu alingbi ti wara na yâ ti vision so Ézéchiel abâ adango bê so alingbi ti mû maboko na ala. Na tapande, ala bâ so a yeke mû lani wango na aprêtre nga a yeke fa lege na ala. A yeke nzoni aChrétien kue agirisa ape so e yeke mbage ti “kundu oko ti ataba” so ayeke sara kua na gbe ti “berger oko.”​—Diko Jean 10:16.

22, 23. (a) Nyen la a-ancien ti laso alingbi ti manda na lege ti mokonzi so a sara tënë ti lo na yâ ti vision so Ézéchiel abâ? (b) Nyen la ayeke si peut-être na yâ ti angoi so ayeke ga?

²² Mokonzi. Na yâ ti vision ti Ézéchiel, mokonzi ayeke mbeni kota zo. Lo yeke ti mara ti aprêtre ape, na yâ ti temple lo yeke sara kua na gbe ti fango lege ti aprêtre. Ye oko, a yeke polele so lo yeke bâ ndo na ndö ti azo na lo yeke mû maboko na ala ti mû asandaga (Ézéch. 44:2, 3; 45:16, 17; 46:2). Tongaso, lo yeke mbeni tapande ndali ti aita-koli so laso ayeke sara ambeni kua na yâ ti congrégation. A-Chrétien so ayeke a-ancien, so na popo ti ala mo yeke wara asurveillant so ayeke gue na ando nde nde, abezoin ti ngbâ ti woko terê ti ala na gbe ti ngbâa be-ta-zo so a soro amembre ni ti gue na yayu (aHéb. 13:17). A-ancien ayeke sara kua ngangu ti mû maboko na azo ti Nzapa ti mû asandaga ti gonda na Nzapa na ngoi ti abungbi nga na fango tënë (aÉph. 4:11, 12). Nga, a-ancien alingbi ti bâ fason so Jéhovah asuku lani na amokonzi ti Israël ndali ti so ala sara ye na komandema ti ala na lege ni ape (Ézéch. 45:9). Legeoko nga, a-ancien aku ti tene a mû wango na ala nga a fa lege na ala. Ala yeda na alege kue so Jéhovah asara kua na ni ti leke ala si ala lingbi ti bâ ndo na ndö ti aita nzoni nga ti kpengba ala nzoni na lege ti yingo.​—Diko 1 Pierre 5:1-3.

 ²³ Jéhovah ayeke ngbâ ti mû na e a-ancien so alingbi nga so ayeke bâ ndo na ndö ti e na ndoye na yâ ti Paradis so ayeke ga. Laso a yeke fa na a-ancien mingi tongana nyen la ala lingbi ti duti aberger so ahinga ti mû maboko na zo nzoni, ye so ayeke mû nga maboko na ala ti sara tongaso na yâ ti Paradis (Ps. 45:16). A nzere mingi ti gbu li na ndö ti fason so aita-koli so ayeke mû ande maboko na e na yâ ti fini dunia. Peut-être e yeke mä ande yâ ti vision ti Ézéchiel polele tongana ti ambeni prophétie so asara tënë ti kiringo na aye na place ni na ngoi so Jéhovah aye. Peut-être ambeni mbage ni ayeke ga ande tâ tënë na yâ ti angoi so ayeke ga, e lingbi ti mä yâ ti gango tâ tënë ni kue laso ape. E yeke hinga ande ni na yâ ti angoi so ayeke ga.

24, 25. Tongana nyen la vision ti Ézéchiel afa atufa so azo ti Jéhovah ayeke wara tongana ala ngbâ na yâ ti tâ vorongo Nzapa??

²⁴ Ti hunzi na ni, zia e dabe ti e na mbeni kota ye so apassé na yâ ti vision ti Ézéchiel. Jéhovah aga na yâ ti temple so Ézéchiel abâ na yâ ti vision, na lo tene na azo ti lo so lo yeke ngbâ na yâ ni na ngoi kue so ala ngbâ be-ta-zo na andia ti lo na ndö ti tâ vorongo Nzapa (Ézéch. 43:4-9). So Jéhovah aga na yâ ti temple ni asara nyen na ndö ti azo ti lo nga na kodro ti ala?

²⁵ Na yâ ti vision ni, a sara kua na atënë ti aprophétie use so adë bê ti zo ti sara tënë ti atufa ti Nzapa: (1) Mbeni ngu so alondo na akubu ti temple ti Nzapa asua ti mû fini na aye kue na yâ ti kodro ni na asara si aye ti yâ ti kodro ni adü gbani; nga (2) a kangbi yâ ti kodro ni na lege ni nga nzoni, na temple ni nga na ndo so temple ni ayeke dä ayeke tâ na milieu. Aversê so aye ti tene nyen ndali ti e laso? A yeke kota ye ti hinga ni ndali ti so e yeke na mbeni ngoi so Jéhovah alï na yâ ti kota temple ti yingo, lo zi saleté so ayeke dä nga lo yeda na fason ti vorongo lo so ayeke tâ nzoni-kue (Mal. 3:1-4). E yeke sara tënë na ndö ti aprophétie use so na yâ ti chapitre 19 ti si na chapitre 21 ti mbeti so.