Ala aita so aye Jéhovah mingi:

Terê ti azo so ague na kota bungbi ti lango ota so mama-tene ni ayeke “Iri ti Nzapa” na ngu 1971 na Anglais anzere mingi na ngoi so ala wara ambeni fini mbeti. A tene so ambeti so “ahon gbungo li ti zo.” Mbeni ita atene na ndö ti mbeni oko ti ambeti so, lo tene: “A yeke mbeni kete yanga ti aye so ayeke si ande so apika bê mingi so ade e wara mara ni ape.” Lo yeke sara lani tënë ti nyen? Lo yeke sara tënë ti buku so iri ni ayeke “ Les nations sauront que je suis Jéhovah ” — Comment ? Me ngbanga ti nyen la buku so apika bê ti zo mingi tongaso? Ngbanga ti so na yâ ni a kiri a fa nda ti aprophétie so ayeke na yâ ti mbeti ti Ézéchiel, aprophétie so abâ kekereke ti azo kue.

Ngbene ye na ngoi so a sigi na buku “ Les nations sauront que je suis Jéhovah ” — Comment ? ti ga na ni, wungo ti awakua ti Jéhovah ague na li ni hio mingi: wungo ti ala ayeke lani kutu oko na ndambo, laso wungo ti ala ahon kutu 8 (És. 60:22). Awakua ti Jéhovah kutu mingi so atene ayanga ti kodro ahon 900 (Zach. 8:23). Na popo ti e, azo mingi awara lani lege lâ oko ape ti manda mbeni buku so afa anzene nzene tënë na ndö ti aprophétie so yingo vulu apusu prophète Ézéchiel ti sû na mbeti.

Na ndö ni, ngbene ye na ngu 1971 ti ga na ni, fason so e mä yâ ti atâ tënë ti Bible mingi achangé ngangu na ngoi so lumière angbâ ti za ti ga kota (aProv. 4:18). Na ngu 1985 e komanse ti bâ polele tongana nyen la a diko “ambeni taba” azo ti mbilimbili na ala ga akamarade ti Nzapa (Jean 10:16; aRom. 5:18; Jacq. 2:23). Na pekoni, na ngu 1995 e bâ ti kozoni so a yeke fâ ande ndangba ngbanga na ndö ti “ataba” na “angasa” na ngoi ti “kota ye ti vundu” so ayeke ga (Mat. 24:21; 25:31, 32). Achangement so kue andu fason so e mä yâ ti mbeti ti Ézéchiel.

Na yâ ti angu so ahon ade ti ninga ape, lumière ni angbâ ti za ti ga kota. Gbu li na ndö ti aye so e manda na lege ti atoli ti Jésus. Aye ti manda so mingi aga tâ polele laso na yâ ti li ti e nga na yâ ti bê ti e. Ambeni toli ni asara tënë ti aye so ayeke si fafadeso na ngoi ti kota ye ti vundu so ayeke ga na loro. Legeoko nga, a kiri a zi nda ti ambeni prophétie so ayeke na yâ ti mbeti ti Ézéchiel. Na popo ti aprophétie so, a yeke wara prophétie na ndö ti Gog ti Magog (chapitre 38 na 39), kua ti koli so ayeke na kete ye ti ziango encre ti wakuasu na yâ ni (chapitre 9) nga popo-hoto so abio so ahule ayeke na yâ ni nga na anduru keke use so na lege ti fä a bungbi ni aga oko (chapitre 37). Afini zingo nda ti ye so achangé nga atënë so a sû ândö na yâ ti buku “ Les nations sauront que je suis Jéhovah ”​—Comment ?

Tongaso, a dö bê ti e ape so awakua ti Jéhovah mingi ahunda lani terê ti ala, ala tene: “Lawa la e yeke wara mbeni buku so afa afini nda ti ye na ndö ti aprophétie ti Ézéchiel?” Buku A kiri a voro Jéhovah: Na lege ni tongana ti kozo awe! ayeke mara ti mbeti so ala ye so. Na ngoi so mo yeke diko achapitre 22 ti mbeti so nga mo gbu li na ndö ti apendere foto so ayeke na yâ ni, a yeke dö bê ti mo mingi ti bâ so a gi nda ti aye tâ nzoni mingi ti sigi na mbeti so. E gbu li ti e nzoni nga e sambela na bê ti e kue ti hinga ngbanga ti nyen la Jéhovah azia na yâ ti Bible mbeti ti Ézéchiel so ayeke pendere mingi. E gbu li nzoni na ndö ti mara ti ahundango ndo so: Aye ti manda wa la ayeke na yâ ti mbeti ti Ézéchiel ndali ti azo so ayeke na fini na ngoi ti lo nga ndali ti e  laso? Aprophétie wa la asara tënë na ndö ti aye so ayeke si ande na yâ ti ngoi so ayeke ga? A lingbi e gi ti bâ wala ambeni ye na yâ ti aprophétie ti Ézéchiel ayeke fä ti ambeni ye nde? Akiringo tënë na ahundango ndo so afa tâ polele mingi ahon ti kozo nda ti mbeti ti Ézéchiel so e kue e ye ti diko ni.

Tongana mo diko mbeti ti Ézéchiel na tongo nda ni juska mo hunzi ni, mbage ti bungbi ti Jéhovah so ayeke na yayu ayeke dö bê ti mo mingi. Kite ayeke dä ape so a yeke dö nga bê ti mo ti hinga so Jéhovah ayeke na andia so ayeke na nduzu mingi ndali ti a-ange so ayeke na yayu nga na azo so ayeke na sese so aye ti voro lo na lege ni. Buku A voro Jéhovah na lege ni ayeke mû maboko na mo ti bâ na nene ni mingi ahon ti kozo aye so Jéhovah asara awe ndali ti awakua ti lo nga na ye so lo ga nduru ti sara ndali ti ala. Mo yeke bâ so buku so agboto lê fani mingi na ndö ti amama-tene use. Kozoni, ti nzere na Jéhovah, a lingbi e hinga so lo yeke Kota gbia ti dunia kue nga e yeda na ni. Use ni, a lingbi e voro Jéhovah na lege so lo ye nga e sara ye alingbi na andia ti lo so ayeke na nduzu mingi.

Na bê ti e kue, e ye si mbeti so asara si mo kiri mo leke na bê ti mo ti voro Jéhovah na mbeni lege so amû nengo na kota iri ti lo so ayeke nzoni-kue. Na oko ngoi ni, zia mbeti so apusu mo ti ngbâ ti ku ngoi so amara kue ayeke hinga ande so lo yeke Jéhovah.—Ézéch. 36:23; 38:23.

Zia si Jéhovah, Babâ ti e so aye e mingi, asara tufa mingi na ndö ti angangu so mo yeke sara ti mä yâ ti buku so yingo ti lo apusu Ézéchiel ti sû.