Nduru tënë ti atënë so a kiri a zi ndani
Teti angu mingi, Tour ti Ba Ndo aleke yâ ti fason so e mä na yâ ti ambeni tënë ti prophétie ti Ézéchiel. Nga na yâ ti mbeti so, A kiri a voro Jéhovah na lege ni tongana ti kozo awe!, a yeke wara ambeni tënë mingi so a kiri a zi ndani. Bâ wala mo lingbi ti kiri tënë na ahundango ndo so ayeke na gbe ni ge.
Aface osio ti acréature so ayeke na fini aye ti sara tënë ti nyen?
Fason so e mä yâ ni kozo: Acréature so ayeke na fini, wala achérubin, ayeke na aface osio; face oko oko aye ti sara tënë ti mbeni oko ti akota sarango ye ti Jéhovah osio.
Fini zingo ndani: Atâa so aface osio oko oko kue ti acréature so ayeke na fini aye ti sara tënë ti ambeni oko ti akota sarango ye ti Jéhovah osio, tongana a mû aface osio ni kue aye ti sara tënë ti asarango ye ti Jéhovah kue. Nga, aface osio so apika bê ti e mingi na ndö ti kota ngangu ti Jéhovah nga na gloire ti lo.
Ndani so a changé ni: Na yâ ti Bible, fani mingi a sara kua na wungo osio ti sara tënë ti ye so aye kue ayeke dä wala mbeni ye amanke dä ape. Tongaso, tongana a mû aface ni osio kue, a ye gï pëpe ti sara tënë ti asarango ye oko na oko osio so apika bê mingi, aface ni ayeke fondation ti asarango ye ti Jéhovah so apika bê mingi. Nga, face oko oko aye ti sara tënë ti kota ti mbeni créature nga na ngangu ti lo. Atâa so kue, angangu créature osio kue, so a fa ni na lege ti aface osio ti chérubin oko oko kue, ayeke na gbe ti trône ti Jéhovah. Ye so afa nzoni mingi so Jéhovah ayeke Kota gbia so akomande na ndö ti acréature kue.
Koli so ayeke na kete ye ti ziango encre ti wakuasu na yâ ni aye ti sara tënë ti zo wa?
Fason so e mä yâ ni kozo: Koli so ayeke na kete ye ti ziango encre ti wakuasu na yâ ni aye ti sara tënë ti tanga ti aChrétien so a soro ala ti gue na yayu. Na lege ti kua ti fango tënë nga na ti sarango adisciple, aChrétien so a soro ala ti gue na yayu ayeke zia laso marque na lege ti fä na ndö ti lê ti azo so ayeke ga na popo ti “azo mingi mingi”.—Apoc. 7:9.
Fini zingo ndani: Koli so ayeke na kete ye ti ziango encre ti wakuasu na yâ ni aye ti sara tënë ti Jésus Christ. Lo yeke zia marque na ndö ti lê ti azo mingi mingi na ngoi ti “kota ye ti vundu”, na ngoi so lo yeke fa azo so ayeke ataba.—Mat. 24:21.
Ndani so a changé ni: Jéhovah amû kua ti fango ngbanga na Molenge ti lo (Jean 5:22, 23). Ti gue oko na Matthieu 25:31-33, Jésus ayeke fa na nda ni azo so ayeke “ataba” nga azo so ayeke “angasa.”
Awali-ndumba use so ayeke yaya na ngambe, Oholah na Oholibah, aye ti sara tënë ti abungbi ti aChrétien ti wataka so yâ ti ala akangbi na aga Eglize Catholique na Eglize Protestant?
Fason so e mä yâ ni kozo: Oholah (Samarie, li-kodro ti Israël), so ayeke yaya ni, aye ti sara tënë ti Eglize Catholique; Oholibah (Jérusalem, li-kodro ti Juda), so ayeke ngambe ni, aye ti sara tënë ti Eglize Protestant.
Fini zingo ndani: Awali-ndumba so ayeke yaya na ngambe aye ti sara tënë ti mbeni bungbi ti aChrétien ti wataka oko ape. Me ye so e manda na lege ti awali-ndumba so ayeke tënë ti bê ti Jéhovah na ngoi so awakua ti lo be-ta-zo asara ndumba na lege ti yingo. Tënë ti bê ti lo na mbage ti abungbi ti vorongo nzapa ti wataka kue ayeke nga tongaso.
Ndani so a changé ni: Mbeni versê oko ti Bible afa ape so Oholah nga na Oholibah aye ti sara tënë ti abungbi ti aChrétien ti wataka. Israël na Juda ayeke lani tongana awali ti Jéhovah so ayeke be-ta-zo, me abungbi ti aChrétien ti wataka ayeke na mara ti songo so na Jéhovah lâ oko ape. Na ndö ni, so na chapitre 16 nga na chapitre 23 ti mbeti ti Ézéchiel a haka awakua ti Nzapa so ayeke be-ta-zo na lo ape na awali-ndumba afa so beku ayeke dä ti tene ala changé nga ala kiri alë songo na Jéhovah. Abungbi ti aChrétien ti wataka, so ayeke mbage ti Babylone, Ngangu gbata, ayeke na beku so ape.
Eskê Jérusalem ti ândö aye ti sara tënë ti abungbi ti aChrétien ti wataka?
Fason so e mä yâ ni kozo: Jérusalem, so azo ni ayeke lani be-ta-zo ape, aye ti sara tënë ti abungbi ti aChrétien ti wataka. Ni la, futingo ti Jérusalem aye ti sara tënë ti futingo so ayeke si ande na abungbi ti aChrétien ti wataka.
Fini zingo ndani: Azo ti Jérusalem so ayeke be-ta-zo ape ayeke sara aye tongana vorongo yanda nga na asioni ye so amû ndo. Sarango ye ti ala so adabe ti e biani na aye so abungbi ti aChrétien ti wataka ayeke sara, me e tene encore ape so Jérusalem ayeke fä ti abungbi ti aChrétien ti wataka.
Ndani so a changé ni: Mbeni versê oko afa ape so Jérusalem ayeke fä ti abungbi ti aChrétien ti wataka. Jérusalem ti ândö avoro lani Nzapa na lege ni, me abungbi ti aChrétien ti wataka asara ni lâ oko ape. Nga, atâa so na yâ ti mbeni ngoi Jéhovah apardonné azo ti Jérusalem, beku ti tene lo pardonné abungbi ti aChrétien ti wataka ayeke dä oko ape.
Vision ti popo-hoto ti abio so ahule aga tâ tënë tongana nyen?
Fason so e mä yâ ni kozo: Na ngu 1918 a gue na aChrétien so a soro ala ti gue na yayu, so a sara aye ti ngangu na ala, na ngbâa na Babylone, Ngangu gbata; so a ngbâ kete kua ti ala akaï, ala yeke tongana akuâ. Nduru ngoi ti ngbâa so ahunzi na ngu 1919 na ngoi so Jéhovah akiri na ala na fini tongana awafango tënë ti Royaume.
Fini zingo ndani: Dutingo ngbâa na lege ti yingo so asara si ala yeke tongana akuâ aninga mingi nga akomanse angu mingi kozo na ngu 1918. A komanse na yâ ti angu 100 na a hunzi na ngu 1919 nga a gue oko mingi na yongoro ngoi ti maïngo ti alê ti kobe ti toli ti Jésus na ndö ti blé na asioni pere.
Ndani so a changé ni: Dutingo ngbâa ti azo ti Israël ti giriri aninga lani mingi, a komanse na ngu 740 kozo na ngoi ti e na a hunzi na ngu 537 kozo na ngoi ti e. So prophétie ti Ézéchiel asara tënë ti “abio so ahule” wala abio so “ahule tâ ngangu” afa so azo so abio ni asara tënë ti ala akui aninga mingi awe. A fa nga so a yeke kiri na abio ni na fini yeke yeke nga a yeke ninga.
Bungbingo anduru keke use ti tene aga gï oko aye ti tene nyen?
Fason so e mä yâ ni kozo: Na ngoi ti Kozo bira so amû sese kue, na yâ ti mbeni nduru ngoi, tanga ti aChrétien so a soro ala ti gue na yayu so ayeke be-ta-zo aduti beoko ape, me na pekoni ala kiri aduti beoko na ngu 1919.
Fini zingo ndani: Prophétie ni afa so Jéhovah ayeke sara ande si awakua ti lo aga oko. Na peko ti ngu 1919, tongana ngoi ayeke hon, gbâ ti azo so ayeke na beku ti duti na fini na ndö ti sese abungbi oko na tanga ti aChrétien so a soro ala ti gue na yayu. Agroupe so use kue ayeke voro Jéhovah tongana zo oko.
Ndani so a changé ni: Prophétie ni afa pëpe so mbeni nduru keke oko la yâ ni afâ aga use nga na pekoni akiri aga oko. Tongaso, prophétie ni afa pëpe so a yeke mbeni groupe oko la yâ ni akangbi nga na pekoni akiri abungbi oko. Me a fa tongana nyen la agroupe use ayeke ga oko.
Gog ti Magog ayeke zo wa?
Fason so e mä yâ ni kozo: Gog ti Magog ayeke mbeni iri so a mû na Satan na peko ti so a tomba lo na yayu.
Fini zingo ndani: Gog ti Magog aye ti sara tënë ti mbeni bungbi ti amara na ndö ti sese so ayeke ga ande na bira na terê ti atâ wakua ti Jéhovah na ngoi ti kota ye ti vundu.
Ndani so a changé ni: Ye so prophétie ni afa na ndö ti Gog, mbilimbili so atene lo yeke ga kobe ti yanga ti andeke nde nde so ayeke te kuâ ti anyama nga a mû na lo mbeni ndo ti tene a lu lo dä, afa so Gog ayeke mbeni créature ti yingo ape. Na ndö ni, bira so Gog ayeke ga na ni ague oko na ti so mbeti ti Daniel nga na mbeti ti Apocalypse atene na ndö ti bira so amara ti sese ayeke ga na ni na terê ti awakua ti Nzapa. —Dan. 11:40, 44, 45; Apoc. 17:14; 19:19.
Eskê Ézéchiel abâ lani kota temple ti yingo so bazengele Paul asara tënë na ndö ni so?
Fason so e mä yâ ni kozo: Temple so Ézéchiel abâ na vision ayeke oko temple ti yingo so bazengele Paul afa ndani.
Fini zingo ndani: Ézéchiel abâ lani pëpe temple ti yingo so abâ gigi na ngu 29, me lo bâ lani mbeni pendere vision so na yâ ni a fa tongana nyen la a yeke kiri ti voro Jéhovah na lege ni tongana ti so a fa na yâ ti Ndia ti Moïse na peko ti so azo ti Israël alondo na ngbâa akiri. Ye so yingo vulu apusu Paul ti tene na ndö ti temple ti yingo aluti mingi na ndö ti kua so Jésus, so ayeke Kota Prêtre, asara ti londo na ngu 29 ti si na ngu 33. Temple so Ézéchiel abâ na vision, so a sara tënë ti kota prêtre lâ oko na yâ ni ape, aluti mingi na ndö ti kiringo na aye na place ni na lege ti yingo so akomanse na ngu 1919. Tongaso, e gi pëpe ti hinga wala anzene nzene ye kue so afa na ndö ti temple nga na amesure ti temple so Ézéchiel abâ na vision aye ti sara tënë ti mbeni ye. Me a lingbi e zia li ti e kozoni na ndö ti aye so e lingbi ti manda na lege ti vision ti Ézéchiel na ndö ti andia ti Jéhovah ndali ti tâ vorongo Nzapa.
Ndani so a changé ni: Temple so Ézéchiel abâ na vision ayeke nde na temple ti yingo na alege so ayeke kota mingi. Na tapande, na yâ ti temple so Ézéchiel abâ na vision, a mû gbâ ti anyama na sandaga; na yâ ti temple ti yingo, gï sandaga oko la a mû awe, “gï fani oko biani biani awe”. (aHéb. 9:11, 12). Na yâ ti angu ngbangbo mingi kozo na gango ti Christ, ade ngoi ti tene Jéhovah afa atâ tënë so alï mingi na ndö ti temple ti yingo alingbi lani ape.
