1, 2. Ti gue oko na Ézéchiel 47:1-12, nyen la Ézéchiel abâ ni? (Bâ foto so ayeke na tongo nda ti chapitre so.)

ÉZÉCHIEL akiri abâ mbeni ye so apika bê na yâ ti temple so lo bâ na vision: Mbeni ngu alondo na yâ ti temple ni ayeke sua. Tara ti imaginé lo na ngoi so lo yeke hon na ando so ngu so lê ni avuru tarara ayeke sua dä. (Diko Ézéchiel 47:1-12.) Ngu ni alondo na yanga ti porte ti temple ni ayeke sua kete kete; na pekoni ngu ni asua asi na ndo so ada ti temple ayeke dä nduru na yanga ti gbagba ti mbage ti est. Ange so ayeke fa lege na Ézéchiel asigi na lo na ndo so temple ayeke dä, lo yeke mû mesure ti ndo ni na ngoi so ala yeke hon. Ange ni asara si Ézéchiel ahon na yâ ti ngu ni fani mingi, na prophète ni abâ so ngu ni ayeke lï hio hio, na yâ ti kete ngoi ngu ni aga kota ngu na lo lingbi ti fâ ni gï tongana lo tï ngu si.

² Ézéchiel abâ so kota ngu ni asua ague na yâ ti Mer Morte na asara si ngu ni so ingo ayeke dä mingi nga so aye ayeke na fini dä ape aga nzoni, na ndo kue so ngu ni asua dä asusu adü gbani. Nga na ayanga ti kota ngu ni lo bâ gbâ ti amara ti akeke nde nde kue so ayeke kono. Nze oko oko, akeke ni ayeke dü afini lê ti keke so ayeke nzoni ti te ni nga adü gbâ ti akugbe so ayeke kaï na kobela. Kite ayeke dä ape so, so Ézéchiel abâ aye so kue asara si bê ti lo adë nga amû na lo  beku. Me mbage ti vision ti temple so aye ti tene nyen ndali ti lo na amba ti lo so a gue na ala na kodro-wande? A ye ti tene nyen ndali ti e laso?

3. Ngbanga ti nyen la aJuif ti ngoi ti giriri ahinga lani so vision ti Ézéchiel aye ti sara tënë ti mbeni vrai kota ngu ape?

³ A-Juif ti ngoi ti giriri ahinga lani biani so vision ti kota ngu so aye ti sara tënë ti vrai ye ape. Me âmanke mbage ti Mbeti ti Nzapa so adabe ti ala na mbeni prophétie nde ti kiringo na aye na place ni, ti so prophète Joël atene peut-être ahon ngu ngbangbo use tongaso awe. (Diko Joël 3:18.) Tongana aJuif so a gue na ala na kodro-wande adiko atënë so Nzapa apusu Joël ti sû ni, ala pensé ape so “vin so anzere ayeke yuru na terê” ti avrai hoto wala “lait ayeke sua na ndö ti” akete hoto; ala pensé nga ape so mbeni ngu ayeke londo na li ti ngu so ayeke “na yâ ti da ti Jéhovah” ti sua. Legeoko nga, âmanke aJuif so a gue na ala na kodro-wande ahinga lani so vision ti prophète Ézéchiel aye pëpe ti sara tënë ti mbeni vrai kota ngu. * Tongaso, tënë ti nyen la Jéhovah aye lani ti tene na ala? Bible afa ambeni kpengba ye na ndö ti ambeni mbage ti ye so Ézéchiel abâ. Ye oko, e yeke sara tënë mbilimbili na ndö ti aye ota so e lingbi ti wara na yâ ti prophétie so, so ayeke polele na so a tene ni na ndoye ti dë bê ti e.

4. (a) Kota ngu so Ézéchiel abâ na vision asara si aJuif ayeke na beku ti wara atufa wa na mbage ti Jéhovah? (b) Tongana nyen la Bible asara kua na atënë “kota ngu” nga na “ngu” ti dë bê ti e so Jéhovah ayeke sara tufa na ndö ti azo ti lo? (Bâ encadré “Akota ngu ti atufa so alondo na Jéhovah.”)

⁴ Kota ngu ti atufa. Na yâ ti Bible, fani mingi akota ngu nga na ngu aye ti sara tënë ti atufa so amû fini so alondo na Jéhovah. Ézéchiel abâ mara ti kota ngu ni so alondo na temple ayeke sua, tongaso vision ni asara si awakua ti Nzapa ayeke na beku so atufa na lege ti yingo so amû fini na zo ayeke londo na Jéhovah ti sua na mbage ti ala tongana ala ngbâ ti voro lo na lege ni. Atufa wa? Ala yeke kiri ti wara afango lege na lege ti yingo na mbage ti aprêtre. Na lege ti asandaga so ala yeke mû na temple, ala lingbi ti kiri ti duti na beku so a yeke zi asiokpari ti ala (Ézéch. 44:15, 23; 45:17). Tongaso, ala yeke kiri ti duti nzoni-kue, mo bâ mo tene a sukula ala na ngu so ayeke nzoni-kue so alondo na temple si ayeke sua.

5. Tongana nyen la vision ti kota ngu so adë bê ti aJuif so azo kue ayeke wara atufa lakue?

⁵ Lakue azo kue la ayeke wara atufa? Vision so asara si agingo bê ti aJuif kue ahon na lege so afa tongana nyen la na lege ti miracle angu ni aga kota, angu ni asua kete kete ahon gï akilomètre use tongaso aga kota ngu (Ézéch. 47:3-5). Peut-être aJuif so a kiri na ala na kodro ti ala ayeke ga gbani; me atufa ti Jéhovah ayeke lingbi na abezoin ti ala. Kota ngu ni aye lani ti sara tënë ti aye so ayeke duti gbani gbani.

6. (a) Prophétie ni asara tënë ti zendo ti dengo bê wa? (b) Tënë ti gbotongo mê wa la ayeke nga na yâ ti vision ni? (Bâ kete tënë.)

⁶ Ngu so amû fini. Na yâ ti vision ti Ézéchiel, kota ngu ni asua atuku na yâ ti Mer Morte na asara si kota mbage ni akiri aga nzoni. Bâ so ngu ni amû fini na gbâ ti asusu, asusu nde nde so ayeke na yâ ti ngu ni ayeke tongana ati so ayeke na yâ ti Kota ngu-ingo, wala Ngu-ingo ti Méditerranée. Na yanga ti Mer Morte ni, a yeke wara même mbeni ndokua ti azo ti gbungo susu so azo ayeke wara nginza dä  mingi na popo ti akete gbata use, na bango ni, popo ti ala ayo. Ange ni atene: “Aye kue ayeke ngbâ na fini na ndo kue so ngu ni ayeke gue dä.” Ye oko, so aye ti tene so ngu so alondo na da ti Jéhovah asua asi na ambage kue ti Mer Morte ni? Ên-ën. Ange ni atene so angu so amû fini ayeke si pëpe na ambeni ndo ni so ayeke popoto so ayeke na terê ti ngu ni. A zia si “ingo amû ando ni so.” * (Ézéch. 47:8-11). Tongaso, prophétie ni aye ti sara tënë ti mbeni zendo so adë bê ti zo, so tâ vorongo Nzapa ayeke sara si aJuif ayeke kiri awara ngangu na ayeke sara si ala maï. Me mbeni gbotongo mê ayeke nga dä: Azo kue la ayeke yeda ti wara atufa ti Jéhovah ape; nga azo kue la kobela ti ala ayeke kaï ape.

7. Akeke so Ézéchiel abâ na yâ ti vision, so ayeke na yanga ti ngu ni, amû adengo bê wa na aJuif so alondo na ngbâa akiri?

⁷ Akeke so a yeke te lê ni nga ayeke kaï kobela. Ka ti akeke so ayeke na ayanga ti ngu ni ayeke tongana nyen? Ala sara si ndo ni ayeke pendere mingi, ni la ape? Ala sara si e hinga nga mbeni ye na yâ ti vision ni. Biani, a nzere na Ézéchiel na amba ti lo aJuif ti pensé na ndö ti nzerengo lê ti keke so mara ti akeke so ayeke lë ni, afini lê ni asigi nze oko oko. Pendere image so adë nga bê ti ala so Jéhovah ayeke mû na ala kobe ti yingo. Mbeni ye ni ayeke nyen encore? Bâ so “a yeke mû akugbe ti [akeke ni] ti kaï na kobela.” (Ézéch. 47:12). Jéhovah ahinga so, kozoni kue, azo so a londo na ngbâa akiri ayeke na bezoin ti tene a sava ala na lege ti yingo, na lo tene so lo yeke sara ni. A fa tongana nyen la lo sara ni na yâ ti ambeni prophétie so asara tënë ti kiringo na aye na place ni, tongana ti so e bâ na yâ ti chapitre 9 ti mbeti so.

8. Nyen la afa so vision ti Ézéchiel ayeke ga tâ tënë na mbeni lege so ayeke kota mingi?

⁸ Me tongana ti so e bâ nga na chapitre 9, aJuif so alondo na ngbâa akiri abâ gï mbeni kete yanga ti gango tâ tënë ti aprophétie so. A yeke azo ni la asara si prophétie ni aga tâ tënë kue ape. Jéhovah alingbi ti sara tufa na ndö ti ala gbani tongana nyen so fani mingi ala kiri na asioni sarango ye ti ala, ala mä yanga ape nga ala bâ tâ vorongo Nzapa na nene ni ape so? Sarango ye ti ala ason bê ti amba ti ala aJuif so ayeke be-ta-zo nga asara ala vundu. Ye oko, awakua ti Jéhovah so ayeke be-ta-zo ahinga so azendo ti lo ayeke tï na ngu lâ oko ape; a yeke ga lakue tâ tënë. (Diko Josué 23:14.) Ndani la, mbeni lâ vision so Ézéchiel abâ ayeke ga tâ tënë na mbeni lege so ayeke kota mingi. Me lawa?

9. Lawa la vision ti temple so Ézéchiel abâ ayeke ga tâ tënë na mbeni lege so ayeke kota mingi?

⁹ Tongana ti so e bâ na chapitre 14 ti mbeti so, vision ti temple so Ézéchiel abâ aga tâ tënë na mbeni lege so ayeke kota mingi na ngoi so a iri ni “andangba lango,” ngoi so a yâa tâ vorongo Nzapa na nduzu mingi ahon ti kozo (És. 2:2). Na lege wa la mbage ti vision ti Ézéchiel so ayeke ga tâ tënë laso?

10, 11. (a) Atufa wa la e wara laso so ayeke tongana ngu so asua? (b) Tongana nyen la atufa so alondo na Jéhovah amû ndo ti si na azo kue so abezoin ni na lâ ti nda ni so?

¹⁰ Kota ngu ti atufa. Ngu so alondo na da ti Jéhovah asua adabe ti e na atufa wa laso? Biani, a dabe ti e na aye kue so Jéhovah amû  na e ti kpengba e. Kota ye ni ayeke fini ti Christ so lo mû na sandaga ti zi e so ayeke na ngangu ti sukula ye, so asara si a lingbi ti pardonné asiokpari ti e. A haka nga atâ tënë ti Bible so ayeke nzoni-kue na ngu so ayeke sukula na ye nga so amû fini (aÉph. 5:25-27). Tongana nyen la atufa so asua na ngoi ti e?

¹¹ Na ngu 1919, wungo ti awakua ti Jéhovah asi saki mingi ape, nga a nzere na ala mingi ti wara akobe ti yingo so ala bezoin ni. Angu mingi na pekoni, wungo ti ala angbâ ti gue na li ni. Laso, wungo ti awakua ti Nzapa ahon kutu miombe. Ala kue angbâ ti wara ngu ti tâ tënë so ayeke nzoni-kue? En. A fa na e nda ti gbâ ti atâ tënë ti Bible. Na yâ ti angu ngbango oko so ahon, awakua ti Nzapa awara aBible, abuku, apériodique, abrochure nga na atract milliard mingi. Legeoko tongana kota ngu so Ézéchiel abâ na yâ ti vision, atâ tënë so ayeke nzoni-kue amû ndo hio mingi asara si azo so aye ti hinga ye na ndö ti Nzapa awara aye so ala bezoin ni na yâ ti dunia kue. A ninga mingi awe azo ayeke wara ambeti ti Nzapa so a imprimé ni. Nga laso, na lege ti site jw.org, azo alingbi ti wara mara ti ambeti so na ndö ti Internet na ayanga ti kodro ahon 900. Angu ti tâ tënë so ayeke nzoni-kue asara nyen na ndö ti azo so aye ti sara ye na lege ni?

12. (a) Tongana nyen la e bâ fason so tâ tënë andu bê ti azo na amû maboko na ala ti duti na mabe na Jéhovah? (b) Tënë ti gbotongo mê wa so alingbi na e laso ayeke na yâ ti vision ni? (Bâ nga kete tënë.)

¹² Ngu so amû fini. A tene na Ézéchiel, atene: “Aye kue ayeke ngbâ na fini na ndo kue so ngu ni ayeke gue dä.” Gbu li na ndö ti fason so tâ tënë asi na azo kue so aga na yâ ti kodro so a kiri na e dä na lege ti yingo. Atâ tënë ti Bible andu bê ti azo kutu mingi na amû maboko na ala ti duti na mabe na Jéhovah. Ye oko, mbeni tënë ti gbotongo mê so alingbi na ngoi ti e ayeke na yâ ti vision ni: A yeke azo kue la ayeke ngbâ ti yeda na tâ tënë ape. Legeoko tongana ti alando nga na ando so ayeke popoto so ayeke na terê ti Mer Morte na yâ ti vision ti Ézéchiel, ambeni zo ayeke dä so na mbeni ngoi bê ti ala achangé na mbage ti tâ tënë, ala sara ye alingbi na tâ tënë encore ape. * Zia ye so asi na e lâ oko ape.—Diko Deutéronome 10:16-18.

13. Aye ti manda wa la e lingbi ti wara laso na lege ti akeke so ayeke na yâ ti vision ti Ézéchiel?

¹³ Akeke so a yeke te lê ni nga ayeke kaï kobela. Eskê akeke so ayeke na ayanga ti ngu so Ézéchiel abâ na yâ ti vision afa na e ambeni ye ti manda so ayeke kpengba e laso? En. Girisa ape so akeke so alë afini nzerengo lê ti keke nze oko oko nga akugbe ni ayeke kaï kobela (Ézéch. 47:12). Tongaso, akeke ni adabe ti e so e yeke sara na Nzapa so ayeke mû na e gbâ ti kobe nga lo sava e na mbeni lege so ayeke kota mingi, na lege ti yingo. Laso na lege ti yingo, azo ti dunia ayeke na kobela nga ala yeke na kota nzara. Me pensé na ndö ti aye so Jéhovah amû na e. A si na mo awe ti hunzi ti diko mbeni article ti mbeni périodique ti e, ti he ndangba bia na ngoi ti mbeni kota bungbi, ti hunzi ti bâ mbeni vidéo wala mbeni kapa ti télédiffusion nga na pekoni mo bâ so a yeke mbeni tufa ti wara mara ti kobe ti yingo so? Biani, e yeke te gbâ ti kobe (És. 65:13, 14). Kobe ti yingo so e yeke te ni ayeke sara si e kpengba na lege ti yingo? Anzoni wango so  a mû na e, so aluti na ndö ti Bible, amû maboko na e ti kpe ti sara asiokpari tongana lango-sioni, kota bê nga sarango ye na mabe ape. Jéhovah aleke nga mbeni ye ti mû maboko na aChrétien ti hon ndö ti kobela na lege ti yingo so aga na peko ti sarango kota siokpari. (Diko Jacques 5:14.) Biani, a sara tufa na ndö ti e, gï tongana ti so vision ti akeke so Ézéchiel abâ ni afa.

14, 15. (a) Nyen la e manda na lege ti ando so ayeke popoto, so ayeke na terê ti ngu ni, so aga nzoni ape na yâ ti vision ti Ézéchiel? (b) Tongana nyen la e bâ nzoni na lege ti kota ngu so Ézéchiel abâ na vision?

¹⁴ E lingbi nga ti manda mbeni ye na lege ti ando so ayeke popoto so ayeke na terê ti ngu so aga nzoni ape so. E yeke ke lâ oko ape ti tene Jéhovah asara tufa gbani gbani na ndö ti e. A yeke duti ye ti vundu ti ngbâ na kobela tongana ti azo mingi so ayeke na yâ ti dunia so ayeke na kobela (Mat. 13:15). Me e yeke na ngia ti bâ nzoni na lege ti kota ngu ti atufa. Tongana e nyon ngu ti tâ tënë so ayeke nzoni-kue so ayeke na yâ ti Bible na nzara ni, e fa atâ tënë so na azo na fango tënë nga tongana a-ancien so ngbâa be-ta-zo afa ye na ala afa lege na e na ndoye, adë bê ti e nga amû maboko na e, e lingbi ti pensé na kota ngu so Ézéchiel abâ na vision. Kota ngu so asara si na ndo kue so asua dä aye angbâ na fini na adü nga aye awara sava.

¹⁵ Me vision ti kota ngu so ayeke ga tâ tënë na yâ ti angoi so ayeke ga tongana nyen? Tongana ti so e yeke bâ ande, kota ngu so ayeke sua ande na mbeni lege so ayeke kota mingi na yâ ti Paradis.

16, 17. (a) Na lege wa la ngu ti fini so ayeke mû ndo ande mingi na yâ ti Paradis? (b) Tongana nyen la e lingbi ti bâ nzoni na lege ti kota ngu ti atufa so na yâ ti Paradis?

¹⁶ Mo bâ terê ti mo na yâ ti Paradis na terê ti akamarade ti mo nga na afami ti mo, na gigi ti mo anzere na mo mingi? Ti manda ye na ndö ti kota ngu so Ézéchiel abâ na vision alingbi ti mû maboko na e ti bâ terê ti e tâ polele na yâ ti Paradis. Na lege wa? Zia e kiri e bâ ambage ota ti vision ni so ayeke polele na so afa sarango ye na ndoye.

¹⁷ Kota ngu ti atufa. Na mbeni lege, kota ngu na lege ti fä so ayeke mû ndo ande mingi na yâ ti Paradis, ndali ti so aye ti nzoni so ayeke ga na pekoni ayeke duti ande na lege ti yingo nga na lege ti mitele. Na ngoi ti Komandema ti ngu saki oko ti Jésus, Royaume ti Nzapa ayeke mû ande maboko na azo so ayeke be-ta-zo ti wara ye ti nzoni na lege ti ye so a futa ti zi azo na mbeni lege so ayeke tâ kota mingi. Yeke yeke, ala yeke ga ande mbilimbili-kue. Akobela, adocteur, a-infirmier nga na ahôpital ayeke duti ande dä encore ape. Ngu ti fini so ayeke sua ande na yâ ti fini ti azo kutu mingi so asö kuâ na Harmaguédon, so ti tene “azo mingi mingi” so ayeke sigi na yâ ti “kota ye ti vundu”. (Apoc. 7:9, 14). Ye oko, atâa so tongo nda ti suango ti kota ngu ti atufa so ayeke pika ande bê mingi, a yeke kete mingi tongana a haka ni na ti so ayeke sua ande na peko. Tongana ti so Ézéchiel abâ na vision, kota ngu so ayeke mû ndo ande ti kaï abezoin so ayeke kota mingi.

18. Na lege wa la “kota ngu so amû fini na zo” ayeke ga ande kota mingi na ngoi ti Komandema ti ngu saki oko ti Christ?

¹⁸ Ngu so amû fini. Na ngoi ti Komandema ti ngu saki oko ti Christ, “kota ngu so amû fini na zo” ayeke ga ande kota mingi (Apoc. 22:1).  Azo kutu mingi, même azo milliard mingi, ayeke zingo ande na kuâ na a yeke mû lege na ala ti ngbâ na fini lakue lakue na yâ ti Paradis. Na popo ti atufa ti Jéhovah so ayeke ga ande na lege ti Royaume a yeke kiri na gbâ ti azo so akui na fini, so ti tene azo so alango na yâ ti fuku ti sese so ayeke na ngangu pëpe (És. 26:19). Ye oko, eskê azo kue so a yeke zingo ala ayeke ngbâ ande na fini teti lakue lakue?

19. (a) Nyen la afa so afini ngu ti tâ tënë so alondo na Nzapa ayeke sigi ande na yâ ti Paradis? (b) Na lege wa la na yâ ti ngoi so ayeke ga ambeni zo ayeke ga tongana ‘ando so ingo amû ni’?

¹⁹ A yeke na zo oko oko ti soro. Na ngoi ni so, a yeke zi ande afini rouleau. Tongaso na yâ ti angu so alondo na Jéhovah so adë bê a yeke wara ande afini tâ tënë so a sigi na ni, so ti tene afini fango lege na lege ti yingo. Ti gbu li na ndö ti aye so ayeke si ande anzere na zo mingi, ni la ape? Ye oko, ambeni zo ayeke ke ande ti wara tufa so, ala yeke soro ti ke ti mä yanga ti Jéhovah. Peut-être ambeni ayeke sara ande kpengbango-li na ngoi ti Komandema ti ngu saki oko ti Christ, me a yeke zia ande lege na ala pëpe ti ga na wusuwusu na yâ ti Paradis (És. 65:20). E lingbi ti dabe ti e na vision ti Ézéchiel nga ti pensé na ando so ayeke popoto so ayeke na terê ti ngu so aye adü dä ape, so “ingo amû ando ni so.” Azo ti kpengbango-li so ake ti nyon pendere ngu so amû fini na zo so ayeke tâ azo ti buba. Na peko ti Komandema ti ngu saki oko ti Christ, mbeni groupe ti azo ti kpengbango-li ayeke mû ande mbage ti Satan. Azo kue so ake komandema ti  Jéhovah so ayeke mbilimbili, oko ye la ayeke si ande na ala: kuâ ti lakue lakue.—Apoc. 20:7-12.

20. Nyen la a leke ni ti tene aga na e aye ti nzoni na ngoi ti Komandema ti ngu saki oko ti Christ adabe ti e na akeke so Ézéchiel abâ lani?

²⁰ Akeke so a yeke te lê ni nga ayeke kaï kobela. Jéhovah aye pëpe ti tene mbeni zo na popo ti e aperdre pasa ti warango fini ti lakue lakue. Ti mû maboko na e ti gbu pendere pasa so lo ye ti mû na e, lo yeke kiri ande ti leke biani mbeni ye so ayeke tongana akeke so Ézéchiel abâ lani. Me na yâ ti Paradis, Jéhovah ayeke ga ande na anzoni ye na azo na lege ti mitele nga na lege ti yingo. Jésus Christ na amba ti lo 144 000 ayeke komande ande na yayu tongana agbia teti ngu saki oko. Tongana mbeni bungbi ti aprêtre, azo 144 000 ayeke sara ande si azo awara aye ti nzoni so aga na lege ti fini ti Christ so lo mû ti zi azo, ala yeke mû ande maboko na azo so ayeke be-ta-zo ti ga mbilimbili-kue (Apoc. 20:6). Ye so a leke ti sava e na lege ti mitele nga na lege ti yingo so adabe ti e na akeke so Ézéchiel abâ na ayanga ti kota ngu, akeke so alë anzoni lengo so ayeke nzoni ti te ni nga akugbe ni asava kobela. Vision ti Ézéchiel so ague oko na mbeni pendere tënë ti prophétie so bazengele Jean asû. (Diko Apocalypse 22:1, 2.) Akugbe ti keke so Jean abâ ayeke “ti sava na kobela ti amara.” Azo kutu mingi so ayeke be-ta-zo ayeke bâ ande nzoni na peko ti kua ti prêtre so azo 144 000 ayeke sara.

21. Ti gbu li na ndö ti kota ngu so Ézéchiel abâ na vision asara mo tongana nyen?

²¹ Tongana mo gbu li na ndö ti kota ngu so Ézéchiel abâ na vision, bê ti mo asi na siriri nga na beku, ni la ape? Ngoi so angbâ na devant ti e ayeke tâ pendere mingi! Gbu gï li kete, a sara ngu saki mingi awe, Jéhovah afa na e gbâ ti aprophétie ti mû maboko na e ti imaginé gigi ti e na yâ ti Paradis, lo kanga bê lo ngbâ ti tisa e ti duti dä ti bâ kota gango tâ tënë ti aprophétie so, atâ ye so a mû zendo ni na lege ti aprophétie so. Mo yeke duti ande dä? Peut-être mo yeke hunda terê ti mo eskê place ayeke duti ande dä biani ndali ti mo na yâ ti Paradis. Zia e bâ fadeso tongana nyen la atënë ti kongo nda ni ti prophétie ti Ézéchiel adë bê ti e.