1, 2. (a) Mbilimbili mbage wa ti sese ni a lingbi a zia ni nde? (Bâ foto ti couverture.) (b) Vision ni afa tënë ti dengo bê wa na aJuif so a gue na ala na kodro-wande?

NA YÂ ti ndangba vision so Ézéchiel abâ, a fa na lo mbeni ye na ndö ti mbeni mbage ti sese ni so a zia ni nde ndali ti mbeni mbilimbili kua. Mbage ni so a zia ni nde so, a mû ni pëpe na mbeni mara ti azo ti Israël ti ga ye ti ala, me a mû ni na Jéhovah. A fa nga na Ézéchiel mbeni ye na ndö ti mbeni gbata so apika bê mingi so iri ni asara si zo aye ti hinga ye na ndö ni. Mbage ti vision so afa na aJuif so a gue na ala na kodro-wande mbeni kota tënë ti dengo bê: Jéhovah ayeke duti ande na ala na ngoi so ala yeke kiri na kodro ti ala so ala ye ni mingi.

² Ézéchiel afa na e anzene nzene tënë na ndö ti matabisi so. Zia e bâ mbaï so nzoni, so ayeke kota tënë mingi ndali ti e atâ wakua ti Jéhovah.

3. Ando oku wa la Jéhovah azia ni nde? Lo zia ni nde ngbanga ti nyen? (Bâ encadré “Mbage ti sese so ala yeke zia ni nde na matabisi.”)

³ Mbage ti sese so a zia ni nde so mesure ni ayeke coudée 25 000 (kilomètre 13) ti londo na nord ti si na sud nga coudée 25 000 ti londo na est ti si na ouest. Mbage ti sese so ayeke carré so, a iri ni lani “ndo ni kue so a mû na matabisi”. A kangbi ni na ambage ota.  Mbage ni so ayeke na nduzu ayeke lani ti azo ti mara ti Lévi, na ti so ayeke na milieu a zia ni nde ndali ti temple nga na aprêtre. Ambage use so aga “sese so ayeke nzoni-kue”. Mbage ni so ayeke kete na ati kozoni so, wala “tanga ti ndo ni so angbâ” ayeke lani “ti azo ti kodro ni”. A yeke lani ndali ti gbata ni.—Ézéch. 48:15, 20.

4. Nyen la e lingbi ti manda na lege ti mbaï so asara tënë ti matabisi so a mû na Jéhovah?

⁴ Nyen la e lingbi ti manda na lege ti mbaï so asara tënë ti matabisi so a mû na Jéhovah? So a zia sese ni kozoni nde tongana matabisi so ayeke nde nga na pekoni a zia ni nde ndali ti amara, Jéhovah afa so a lingbi a bâ mbage ti sese ni so tongana kota ye mingi ahon atanga ni kue (Ézéch. 45:1). Kite ayeke dä ape so na lege ti fason so a kangbi na sese ni, aJuif so a gue na ala na kodro-wande amanda aye mingi. A lingbi ala zia vorongo Jéhovah kozo na yâ ti fini ti ala. Laso, e nga e bâ aye so e yeke sara na tapande, mandango Bible, guengo na abungbi nga na fango tënë tongana akozo ye so ayeke kota ye. Tongana e mû tapande ti Jéhovah ti zia na kozo ndo aye so ayeke na lege ni ti zia na kozo ndo, e yeke ngbâ ti zia vorongo Nzapa kozo na yâ ti fini ti e ti lâ na lâ.

5, 6. (a) Gbata ni ayeke ti zo wa? (b) Gbata ni aye pëpe ti sara tënë ti nyen? Ngbanga ti nyen?

⁵ Diko Ézéchiel 48:15. “Gbata ni” nga na sese so ayeke na terê ni aye lani ti sara tënë ti nyen? (Ézéch. 48:16-18). Na yâ ti vision ni, Jéhovah atene na Ézéchiel: ‘Ndo so a soro ni ndali ti gbata ni ayeke ti azo ti Israël kue.’ (Ézéch. 45:6, 7). Tongaso, gbata ni nga na sese so ayeke na terê ni ayeke lani pëpe “sese so ayeke nzoni-kue” so a “zia ni nde na matabisi na Jéhovah”. (Ézéch. 48:9). So e hinga kangbi ni awe, zia e bâ ye so e lingbi ti manda na lege ti gbata so laso.

⁶ Ti bâ aye so e lingbi ti manda na lege ti gbata so, a lingbi e hinga kozoni ye so gbata ni aye pëpe ti sara tënë ni. Gbata ni alingbi pëpe ti sara tënë ti gbata ti Jérusalem nga na temple ni so a kiri a leke ni. Ngbanga ti nyen? Ngbanga ti so na yâ ti gbata so Ézéchiel abâ na vision, temple ayeke dä ape. Gbata ni aye nga pëpe ti sara tënë ti mbeni gbata nde na kodro ti Israël so a kiri a leke ni. Ngbanga ti nyen? Ngbanga ti so aJuif so a gue na ala na ngbâa si ala kiri wala ahale ti ala aleke lâ oko ape mbeni gbata so akpa ti so a fa na yâ ti vision so. Na ndö ni, gbata ni alingbi pëpe ti sara tënë ti mbeni gbata na yayu. Ngbanga ti nyen? Ngbanga ti so a leke gbata ni na ndö ti sese so ayeke “na ndo so azo kue alingbi ti gue dä”, wala ndo so a yeke sara pëpe akua so ayeke nzoni-kue dä, so ayeke nde na ada so a leke ni na ndö ti sese so a zia ni nde gï ndali ti vorongo Nzapa.—Ézéch. 42:20.

7. Gbata so Ézéchiel abâ na vision so ayeke nyen? Na bango ni a ye ti sara tënë ti nyen? (Bâ foto so ayeke na tongo nda ti chapitre so.)

⁷ Tongaso, gbata so Ézéchiel abâ so ayeke nyen? Girisa ape so lo bâ gbata ni na yâ ti oko vision so na yâ ni lo bâ sese ni (Ézéch. 40:2; 45:1, 6). Bible afa so sese ni aye ti sara tënë ti mbeni sese na lege ti yingo, tongaso gbata ni adoit ti sara tënë ti mbeni gbata na lege  ti yingo. Mingi ni, tënë “gbata” asara si zo apensé na nyen? Tënë so asara si zo apensé na azo so alango ndo oko tongana mbeni groupe na ala ga mbeni bungbi so a leke yâ ni nzoni. Tongaso, na bango ni gbata so aye atambela tâ nzoni na yâ ni so Ézéchiel abâ, so ayeke carré carré, aye ti sara tënë ti mbeni ndokua so a leke yâ ni nzoni so ayeke bâ ndo na ndö ti mbeni kodro.

8. Ndokua so ayeke bâ ndo na ndö ti nyen? Ngbanga ti nyen la e tene tongaso?

⁸ Ndokua so ayeke bâ ndo na ndö ti nyen? Vision ti Ézéchiel afa so gbata so ayeke sara kua na yâ ti kodro na lege ti yingo. Tongaso, ndokua so ayeke bâ ndo na ndö ti akua so awakua ti Nzapa ayeke sara. Me so gbata ni ayeke na ndo so azo kue alingbi ti gue dä, wala na ndo so a yeke sara pëpe akua so ayeke nzoni-kue dä so, afa nyen? A dabe ti e so gbata ni aye pëpe ti sara tënë ti mbeni ndokua so ayeke na yayu, me ti mbeni ndokua so ayeke na sese, so akomanse ti sara kua awe ndali ti nzoni ti azo kue so ayeke na yâ ti paradis ti yingo.

9. (a) Azo wa la ayeke sara kua laso na yâ ti ndokua so ayeke na sese so? (b) Nyen la Jésus ayeke sara ande na ngoi ti Komandema ti lo ti ngu saki oko?

⁹ Azo wa la ayeke sara kua na yâ ti ndokua so ayeke na sese so? Na yâ ti vision ti Ézéchiel, zo so ayeke mû li ni na ndö ti gouvernement ti gbata ni ayeke “mokonzi ni”. (Ézéch. 45:7). Lo yeke lani zo so ayeke bâ ndo na ndö ti azo, me lo yeke mbeni prêtre ape wala lo yeke zo ti mara ti Lévi ape. Mokonzi ni asara si e pensé mbilimbili na a-ita-koli so ayeke bâ ndo na ndö ti acongrégation laso, so a soro ala na lege ti yingo ti gue na yayu ape. A mû aberger so ayeke bi bê na azo so na popo ti “ambeni taba”, so ayeke sara terê ti ala kete na sese; ala yeke awakua ti gouvernement ti Christ so ayeke na yayu (Jean 10:16). Na ngoi ti Komandema ti ngu saki oko ti Christ so ayeke ga, Jésus ayeke soro ande “na ndö ti sese kue” a-ancien so alingbi, wala “amokonzi”, ti zia ala na kua (Ps. 45:16). Na gbe ti fango lege ti Royaume so ayeke na yayu, ala yeke bâ ande lege ti aye so agbu bê ti awakua ti Nzapa na ngoi ti Komandema ti ngu saki oko ti Christ.

10. Iri ti gbata ni ayeke nyen? Iri ni afa tënë ti dengo bê wa?

¹⁰ Diko Ézéchiel 48:35. Iri ti gbata ni ayeke “Jéhovah ayeke kâ.” Iri so afa na e biani so gbata ni ayeke ndo so aye so asi dä asara si zo ahinga so Jéhovah ayeke na ndo ni so. So Jéhovah afa na Ézéchiel gbata so ayeke na milieu ti ndo ni, a yeke mo bâ mo tene lo yeke tene na aJuif so a gue na ala na kodro-wande, lo tene: ‘Mbi yeke kiri ti duti na ala.’ So ayeke mbeni tënë ti dengo bê so akpengba zo!

11. Aye wa la e lingbi ti manda na lege ti vision ti Ézéchiel na ndö ti gbata ni nga na nda ti iri ni?

¹¹ Aye wa la e lingbi ti manda na lege ti mbage ti prophétie ti Ézéchiel so? Iri ti gbata ni adë bê ti e awakua ti Nzapa laso so Jéhovah ayeke biani na awakua be-ta-zo ti lo so ayeke na sese laso na lo yeke duti ande na ala lakue. Nda ti iri ni so afa nga mbeni kpengba tâ tënë: A sigi na gbata ni ti mû ngangu na ambeni zo ape,  me ti sara ye tongana Jéhovah so ayeke sara ye na ndoye nga na lege ni. Na tapande, Jéhovah amû na ndokua ni pëpe ngangu ti sara mbeni ye tongana kangbingo yâ ti sese tongana ti so azo so ayeke na yâ ti ndokua ni aye. Me Jéhovah aye ti tene azo so ayeke na yâ ti ndokua ni ayeda na fason so a kangbi na yâ ti sese ni, wala na akua, so lo wani lo mû na awakua ti lo, so na popo ti ala a yeke wara “azo ti mawa”.​—aProv. 19:17; Ézéch. 46:18; 48:29.

12. (a) Mbeni ye ti gbata ni so apika bê ti zo ayeke so wa? A fa nyen? (b) Mbage ti vision so adabe ti aChrétien so ayeke bâ ndo na ndö ti acongrégation na kota ye wa?

¹² Mbeni ye nde ti gbata “Jéhovah ayeke kâ” so apika bê ti zo ayeke so wa? Atâa so agbata ti giriri ayeke na agbagba ti batango zo so ayanga ni ayeke mingi ape, gbata so ayeke ti lo na ayanga ti gbagba 12 (Ézéch. 48:30-34). Wungo ti ayanga ti gbagba ni, so ayeke mingi, (ota na ambage oko oko kue ti gbata ni so ayeke carré carré) afa so a yeke ngangu ape na awakua ti Nzapa kue ti ga nduru na azo so ayeke na yâ ti ndokua ti gbata ni na azo ti yâ ti ndokua ni ayeke lakue dä. Na ndö ni, so gbata ni ayeke na ayanga ti gbagba 12 afa so gbata ni azi na azo kue, “azo ti Israël kue.” (Ézéch. 45:6). So gbata ni azi na azo kue adabe ti aChrétien so ayeke bâ ndo na ndö ti acongrégation na mbeni kota ye. Jéhovah aye ti tene ala sara si a yeke ngangu ape na azo kue so ayeke na yâ ti paradis ti yingo ti ga nduru na ala nga ala duti lakue dä.

13. Nyen la Jéhovah atene na ndö ti akua nde nde so azo ni ayeke sara?

¹³ Zia e kiri na ngoi ti Ézéchiel na e bâ ambeni nzene nzene tënë so lo sû na ndö ti vision ti kangbingo yâ ti sese ni so lo bâ so aye mingi ayeke dä. Jéhovah asara tënë ti azo so ayeke sara mara ti akua nde nde. A lingbi aprêtre, wala “azo ti kua ti temple,” amû asandaga nga ala ga nduru na Jéhovah ti sara kua na lo. Nga a lingbi azo ti mara ti Lévi, wala “azo ti kua ti temple,” ‘abâ lege ti kusala ni nga na aye kue so a yeke sara na yâ ni.’ (Ézéch. 44:14-16; 45:4, 5). Nga, azo ti kua ayeke sara kua nduru na gbata ni. Azo ti kua so ayeke azo wa?

14. Azo ti kua so ayeke sara kua nduru na terê ti gbata ni adabe ti e na nyen?

¹⁴ Azo ti kua so ayeke sara kua nduru na terê ti gbata ni alondo na popo ti “amara ti Israël kue”. Ala yeke sara mbeni kua so amû maboko. Kua ti ala ayeke ti lu akobe so “ayeke ga [ande] ti azo so ayeke sara kua na yâ ti gbata ni”. (Ézéch. 48:18, 19). Eskê ye so a leke so adabe ti e na mbeni ye so lege azi na e ti sara ni laso? En. Laso lege azi na azo kue so ayeke na yâ ti paradis ti yingo ti mû maboko na kua ti aita ti Christ so a soro ala ti gue na yayu nga na kua ti aita so a soro ala na popo ti “azo mingi mingi” ti mû li ni (Apoc. 7:9, 10). Mbeni kota ye so e yeke sara ti mû maboko na ala ayeke ti yeda na afango lege so alondo na ngbâa be-ta-zo.

15, 16. (a) Mbeni tënë wa la ayeke na yâ ti vision ti Ézéchiel? (b) E yeke na pasa ti mû mbage ti e na yâ ti akua wa so ayeke tongana akua ti ala?

¹⁵ Na yâ ti vision ti Ézéchiel a yeke wara mbeni tënë nde so e lingbi ti manda ye na lege ni na ndö ti kua ti e ti fango tënë. Tënë  wa? Jéhovah atene so amembre ti amara 12 so ayeke azo ti mara ti Lévi ape ayeke sara kua na ando use: na yâ ti lacour ti temple nga na ndo ti tengo pere ti anyama ti gbata ni. Kua ti nyen la ala yeke sara na ando ni so? Amara kue ‘ague ti voro Nzapa’ na yâ ti lacour ti temple na lege so ala yeke mû asandaga na Jéhovah (Ézéch. 46:9, 24). Amembre ti amara ni kue aga ti mû maboko na gbata ni na lege so ala fâ yaka na ndö ti sese ti gbata ni. Nyen la e lingbi ti manda na lege ti tapande ti azo ti kua so?

¹⁶ Laso, amembre ti azo mingi mingi ayeke na pasa ti sara kua so ayeke tongana ti so a sara na yâ ti vision ti Ézéchiel. Ala yeke voro Jéhovah “na yâ ti temple ti lo” na lege so ala mû na lo asandaga ti gonda (Apoc. 7:9-15). Ala yeke sara ni na lege so ala mû mbage na kua ti fango tënë nga ala fa atënë ti mabe ti ala na kota go na ngoi ti abungbi. Ala bâ mara ti vorongo Jéhovah so tongana kua so a lingbi ala sara ni kozo na tanga ti akua kue (1 Chron. 16:29). Na ndö ni, azo mingi na popo ti awakua ti Nzapa ayeke mû maboko na bungbi ti Jéhovah na anzoni lege mingi. Na tapande, ala yeke mû maboko na kua ti lekengo aDa ti Royaume nga na ada ti Béthel nga ti bata ni, nga ala yeke mû maboko na yâ ti gbâ ti ambeni kua nde so bungbi ti Jéhovah ayeke sara. Ambeni amû nginza ti mû maboko na akua so. Ala sara akua so kue, so ayeke tongana fango  yaka, “ndali ti gloire ti Nzapa.” (1 aCor. 10:31). Ala sara kua ti ala na yapungo terê nga na ngia ndali ti so ala hinga so “a yeke mara ti asandaga tongaso la si anzere” na Jéhovah (aHéb. 13:16). Eskê mo yeke sara kua nzoni na alege so azi so?

17. (a) Kota gango tâ tënë wa ti vision ti Ézéchiel e yeke bâ ande ni na yâ ti ngoi so ayeke ga? (b) Na ngoi ti Komandema ti ngu saki oko ti Christ, azo wa la ayeke wara ande anzoni ye ti peko ti ndokua so ayeke tongana gbata?

¹⁷ Eskê na yâ ti ngoi so ayeke ga, vision ti Ézéchiel na ndö ti mungo matabisi ayeke ga ande tâ tënë na mbeni lege so ayeke kota mingi? En. Bâ ye so: Ézéchiel abâ lani na vision mbage ti sese so a iri ni “sese so ayeke nzoni-kue” na milieu ti sese ni (Ézéch. 48:10). Legeoko nga, na peko ti Harmaguédon, atâa ndo wa la e yeke dä na ndö ti sese, Jéhovah ayeke duti ande na e (Apoc. 21:3). Na ngoi ti Komandema ti ngu saki oko ti Christ, ndokua so ayeke tongana gbata, so ti tene azo na ndö ti sese so a yeke mû ande kua na ala ti bâ lege ti aye so agbu bê ti awakua ti Nzapa, ayeke sara ande kua na yâ ti dunia kue na lege so ayeke fa lege nga ayeke mû wango na ndoye na azo kue so ayeke duti ande na ndö ti “fini sese”, so ti tene fini bungbi ti azo.—2 Pi. 3:13.

18. (a) Ngbanga ti nyen la e lingbi ti hinga na bê ti e kue so ndokua so ayeke tongana gbata ayeke sara ande kua maboko na maboko na komandema ti Nzapa? (b) Iri ti gbata ni amû na e kota dengo bê wa?

¹⁸ Ngbanga ti nyen la e lingbi ti hinga na bê ti e kue so ndokua so ayeke tongana gbata ayeke ngbâ ande ti sara kua maboko na maboko na komandema ti Nzapa? Ngbanga ti so Bible afa polele so gbata so ayeke na sese so ayeke na ayanga ti gbagba 12 akpa tâ gï gbata so ayeke na yayu so ayeke na ayanga ti gbagba 12, so ti tene Fini Jérusalem, so na yâ ni a yeke wara agbia 144 000 so ayeke komande legeoko na Christ (Apoc. 21:2, 12, 21-27). Ye so afa so ndokua so ayeke na sese ayeke sara ande ye ague oko na adesizion kue so Royaume ti Nzapa so ayeke na yayu ayeke mû nga ayeke sara kue ti sara ye alingbi na ni. Biani, iri ti gbata “Jéhovah ayeke kâ” adë bê ti e oko oko kue so tâ vorongo Nzapa ayeke ngbâ ande lakue lakue na ayeke maï lakue lakue na yâ ti Paradis. Tâ pendere gigi ti kekereke la ayeke ku e so!